ଭୁବନେଶ୍ୱର,୧୪/୧୦/୨୦୨୬(ଓଡ଼ିଶା ସମାଚାର)- ଅକ୍ଟୋବର ମାସକୁ ‘ଧ୍ୟାନର ଅଭାବ ଓ ଅତିସକ୍ରିୟତା ବିକାର’ (ADHD) ସଚେତନତା ମାସ’ ଭାବରେ ପାଳନ କରାଯାଉଥିବା ପରିପ୍ରେକ୍ଷୀରେ ସମାଜର ଦିବ୍ୟାଙ୍ଗ ବ୍ୟକ୍ତିବିଶେଷଙ୍କ ପାଇଁ କାର୍ଯ୍ୟ କରୁଥିବା ସଂସ୍ଥା ‘ଅଭିଷ୍ଟ ଚାରିଟେବଲ୍ ଟ୍ରଷ୍ଟ’ ପକ୍ଷରୁ ଏକାମ୍ର କାନନ ବଟାନିକାଲ୍ ଗାର୍ଡେନ୍ରେ ଏକ ଗଣଦୌଡ଼ର ଆୟୋଜନ ହୋଇଯାଇଛି । ଶହେରୁ ଅଧିକ ଲୋକ ଏହି ଉଦ୍ଦେଶ୍ୟକୁ ସମର୍ଥନ କରି ଦୌଡ଼ରେ ଅଂଶଗ୍ରହଣ କରିଥିଲେ । ଏହି ଦୌଡ଼ର ଲକ୍ଷ୍ୟ ଥିଲା ‘ଧ୍ୟାନର ଅଭାବ ଓ ଅତିସକ୍ରିୟତା ବିକାର’ (ADHD) ବିଷୟରେ ସଚେତନତା ସୃଷ୍ଟି କରିବ ।
ADHD ହେଉଛି ଛୋଟପିଲା ଏବଂ ବୟସ୍କମାନଙ୍କ ମଧ୍ୟରେ ଦେଖାଯାଉଥିବା ଏକ ସ୍ନାୟୁଗତ ବିକାରଜନିତ ସମସ୍ୟା । ଏଥିରେ ପୀଡ଼ିତ ଜଣେ ବ୍ୟକ୍ତି ମନୋଯୋଗର ଅଭାବ କିମ୍ବା ଅତ୍ୟଧିକ ଚଞ୍ଚଳତା ବା ଆବେଗିକ ପ୍ରତିକ୍ରିୟାଶୀଳତା କିମ୍ବା ଉଭୟ ସମସ୍ୟାର ସମ୍ମୁଖୀନ ହୋଇଥାନ୍ତି । ଆମେରିକାର ‘ସେଣ୍ଟର ଫର୍ ଡିଜିଜ୍ କଣ୍ଟ୍ରୋଲ୍’ ଅନୁଯାୟୀ, ଆମେରିକୀୟ ନାଗରିକମାନଙ୍କ ୬% (୧୫.୫ ନିୟୁତ) ଲୋକଙ୍କ ପାଖରେ ଏହି ସମସ୍ୟା ଦେଖାଯାଏ । ବର୍ତ୍ତମାନ ଅନେକ ବୟସ୍କ ମଧ୍ୟ ଏହି ରୋଗର ନିରାକରଣ ବା ଚିହ୍ନଟ ପାଇଁ ଆଗେଇ ଆସୁଥିବା ଦେଖିବାକୁ ମିଳୁଛି ।
ADHD ଜଣେ ବ୍ୟକ୍ତିର କାର୍ଯ୍ୟ ସମ୍ପାଦନ କ୍ଷମତା, ଯୋଜନା ପ୍ରସ୍ତୁତି ଏବଂ କାର୍ଯ୍ୟ ଶେଷ କରିବା ପ୍ରକ୍ରିୟାକୁ ମଧ୍ୟ ପ୍ରଭାବିତ କରିଥାଏ । କେତେକ କ୍ଷେତ୍ରରେ, ପୀଡ଼ିତ ବ୍ୟକ୍ତି ‘ଟାସ୍କ ପାରାଲିସିସ୍’ (କାର୍ଯ୍ୟ ଆରମ୍ଭ କରିବାରେ ଅକ୍ଷମତା)ର ଶିକାର ହୋଇପାରନ୍ତି । କୌଣସି ଦଳଗତ କ୍ରୀଡ଼ା ପାଇଁ ଅସମର୍ଥ ହେଉଥିବାବେଳେ ଦୌଡ଼, ସାଇକେଲ୍ ଚାଳନା ଏବଂ ପହଁରିବା ଭଳି ବ୍ୟକ୍ତିଗତ କ୍ରୀଡ଼ା ସେମାନଙ୍କ ପାଇଁ ସର୍ବୋତ୍ତମ ଅଟେ । ତେଣୁ, ‘ADHD ସଚେତନତା ମାସ’ ପାଳନ କରିବା ଏବଂ ଏହା ସମ୍ପର୍କରେ ବ୍ୟାପକ ସଚେତନତା ସୃଷ୍ଟି କରିବା ଲକ୍ଷ୍ୟରେ ଏହି ଗଣଦୌଡ଼ର ଆୟୋଜନ କରାଯାଇଥିଲା ।
ଏହି କାର୍ଯ୍ୟକ୍ରମ ଆଜି ସକାଳ ୬ଟାରେ ଆରମ୍ଭ ହୋଇ ସକାଳ ୮ଟାରେ ଶେଷ ହୋଇଥିଲା । ‘ଅର୍ଜୁନ ପୁରସ୍କାର’ପ୍ରାପ୍ତ ସାଇକେଲ୍ ଚାଳକ ଶ୍ରୀମତୀ ମିନତି ମହାପାତ୍ର, ଅନ୍ତର୍ଜାତୀୟ ସ୍ତରରେ ଖ୍ୟାତିସମ୍ପନ୍ନ ‘ସ୍ପେଶାଲ୍ ଅଲିମ୍ପିକ୍ସ ଭାରତ’ର କୋଚ୍ କୁମାରୀ ଅର୍ପିତା ମହାପାତ୍ର, ଜାତୀୟ ପୁରସ୍କାରପ୍ରାପ୍ତ ଚଳଚ୍ଚିତ୍ର ନିର୍ମାତା ତଥା ଲେଖିକା ଶ୍ରୀମତୀ ବିୟୋତ ପ୍ରଜ୍ଞା ତ୍ରିପାଠୀଙ୍କ ସମେତ ଦକ୍ଷ ଦିବ୍ୟାଙ୍ଗ କ୍ରୀଡ଼ାବିତ ଏବଂ ଅଟିଜିମ୍ ଥିବା ଶିଶୁମାନଙ୍କର ଯନି ନେଉଥିବା ବ୍ୟକ୍ତିବିଶେଷ ପ୍ରମୁଖ ଏହି ମାରାଥନ୍ରେ ଭାଗ ନେଇଥିଲେ । ‘ଅଭିଷ୍ଟ ଚାରିଟେବୁଲ୍ ଟ୍ରଷ୍ଟ’ର ପ୍ରତିଷ୍ଠାତା ତଥା ଅଧ୍ୟକ୍ଷ ଏଲି ପାଢୀଙ୍କ ଦ୍ୱାରା ଆୟୋଜିତ ଏହି କାର୍ଯ୍ୟକ୍ରମରେ କୁମାରୀ ପ୍ରସିଦ୍ଧି ପୋଦ୍ଦାରଙ୍କ ‘BAE ରନ୍ କ୍ଲବ୍’ର ଯୁବ ଦୌଡ଼ାଳିମାନଙ୍କ ଅଂଶଗ୍ରହଣ କରିଥିଲେ । ୫ କିଲୋମିଟର ଦୌଡ଼ ପରେ ସାଧାରଣ ଜନତାଙ୍କ ମଧ୍ୟରେ ADHD ସମ୍ପର୍କରେ ଏକ ଆଲୋଚନା କାର୍ଯ୍ୟକ୍ରମ ସହ ଏକ କୁଇଜ୍ କାର୍ଯ୍ୟକ୍ରମ ଆୟୋଜନ କରାଯାଇଥିଲା । ଟ୍ରଷ୍ଟ ପକ୍ଷରୁ ADHD ସମ୍ବନ୍ଧୀୟ ସୂଚନାମୂଳକ ପତ୍ରିକା ବଣ୍ଟନ କରାଯାଇଥିଲା । ‘ପୁଲ୍ ଷ୍ଟପ୍ ସ୍ପୋର୍ଟସ୍ ପ୍ରାଇଭେଟ୍ ଲିମିଟେଡ୍’ ଏହି ମାରାଥନ୍ ଆୟୋଜନରେ ସହଯୋଗ କରିଥିଲେ ।
