ଜଗତସିଂହପୁର,୨୩/୦୮/୨୦୨୬ (ଓଡ଼ିଶା ସମାଚାର)-ଉତ୍କଳ ବିଶ୍ୱବିଦ୍ୟାଳୟ ପୁରାତନ ଛାତ୍ରସଂଘର ଷଷ୍ଠ ପ୍ରତିଷ୍ଠା ଦିବସ ସମାରୋହ ଅବସରରେ ଦେଶର ଜଣେ ସୁନାମଧନ୍ୟ ବିଜ୍ଞାନୀ ତଥା ପାଣିପାଗ ବିଜ୍ଞାନୀ ପ୍ରଫେସର ଉମା ଚରଣ ମହାନ୍ତିଙ୍କୁ ସମ୍ମାନଜନକ “ବିଶିଷ୍ଟ ପ୍ରାକ୍ତନ ବିଦ୍ୟାର୍ଥୀ ସମ୍ମାନ-୨୦୨୬” ରେ ଭୂଷିତ କରାଯାଇଛି।ପ୍ରଫେସର ମହାନ୍ତି ଏହି ସମ୍ମାନ ଓଡିଶା ର ମାନ୍ୟବର ରାଜ୍ୟପାଳ ଡଃ ହରି ବାବୁ କମ୍ଭମପତି ଙ୍କ ଠାରୁ ଗ୍ରହଣ କରିଥିଲେ।
ପ୍ରଫେସର ମହାନ୍ତି ୧୯୭୧ ମସିହାରେ ଉତ୍କଳ ବିଶ୍ୱବିଦ୍ୟାଳୟର ପଦାର୍ଥ ବିଜ୍ଞାନ ବିଭାଗରୁ ସ୍ନାତକୋତ୍ତର ଶିକ୍ଷା ଲାଭ କରି ଦେଶ ଓ ବିଦେଶରେ ନିଜ ଗବେଷଣା ମାଧ୍ୟମରେ ବିଶେଷ ସୁନାମ ଅର୍ଜନ କରିଛନ୍ତି।
ପ୍ରଫେସର ମହାନ୍ତିଙ୍କ ପ୍ରମୁଖ ଅବଦାନ ମଧ୍ୟରେ ପାଣିପାଗ ଓ ଜଳବାୟୁ ଗବେଷଣା: ଭାରତ ମହାସାଗରରେ ଜଳବାୟୁ ପରିବର୍ତ୍ତନ, ମୌସୁମୀ ପ୍ରବାହ, ଆଞ୍ଚଳିକ ପାଣିପାଗ ଏବଂ ଅତିଭୀଷଣ ସାମୁଦ୍ରିକ ଝଡ଼ (ବାତ୍ୟା) ବିଷୟରେ ତାଙ୍କର ବୈଜ୍ଞାନିକ ଗବେଷଣା ସମାଜ ପାଇଁ ଅତ୍ୟନ୍ତ ଫଳପ୍ରଦ ହୋଇଛି।
ଓଡ଼ିଶା ପାଇଁ ତାଙ୍କର ଗୁରୁତ୍ୱପୂର୍ଣ୍ଣ ସେବା ହେଉଛି ପ୍ରାକୃତିକ ବିପତ୍ତିର ପୂର୍ବାନୁମାନ କରି କ୍ଷୟକ୍ଷତି କମାଇବାରେ ତାଙ୍କର ବୈଜ୍ଞାନିକ ଜ୍ଞାନକୌଶଳ ଓଡ଼ିଶା ତଥା ସାରା ବିଶ୍ୱକୁ ଦିଗଦର୍ଶନ ଦେଇଛି।
ଆଇ.ଆଇ.ଟି. ଦିଲ୍ଲୀ, ଆଇ.ଆଇ.ଟି. ଭୁବନେଶ୍ୱର, ସୋଆ ବିଶ୍ୱବିଦ୍ୟାଳୟ ପରି ପ୍ରତିଷ୍ଠିତ ଅନୁଷ୍ଠାନରେ ଶିକ୍ଷାଦାନ ଓ ଗବେଷଣାରେ ସେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛନ୍ତି।
ଅନ୍ୟାନ୍ୟ ସମ୍ମାନ ମଧ୍ୟରେ ସେ ଓଡ଼ିଶା ବିଜ୍ଞାନ ଏକାଡେମୀର ସଭାପତି ପଦ ଅଲଙ୍କୃତ କରିବା ସହ ଶାନ୍ତିସ୍ଵରୂପ ଭଟ୍ଟନାଗର ପୁରସ୍କାର, ବିଜୁ ପଟ୍ଟନାୟକ ପୁରସ୍କାର ଏବଂ ସାମନ୍ତ ଚନ୍ଦ୍ରଶେଖର ପୁରସ୍କାର ପରି ଅନେକ ମାନ୍ୟଗଣ୍ୟ ପୁରସ୍କାରରେ ସମ୍ମାନିତ ହୋଇଛନ୍ତି।
ଉତ୍କଳ ବିଶ୍ୱବିଦ୍ୟାଳୟ ପୁରାତନ ଛାତ୍ରସଂଘର ସଭାପତି ଓ ସାଧାରଣ ସମ୍ପାଦକଙ୍କ ସମେତ ସମସ୍ତ କର୍ମକର୍ତ୍ତା ପ୍ରଫେସର ମହାନ୍ତିଙ୍କ ସୁସ୍ଥ, ଦୀର୍ଘ ଜୀବନ ଓ ନିରାମୟ ଭବିଷ୍ୟତ କାମନା କରିଛନ୍ତି।ପ୍ରଫେସର ମହାନ୍ତି ଜଗତସିଂହପୁର ଜିଲ୍ଲାର ଖୋରତ ଗ୍ରାମର ସ୍ୱାଧୀନତା ସଂଗ୍ରାମୀ ସ୍ବର୍ଗତ ପ୍ରହଲ୍ଲାଦ ମହାନ୍ତି ଙ୍କର ସୁପୁତ୍ର ଓ ଜିଲ୍ଲା ର ବିଶିଷ୍ଟ ଶିକ୍ଷାବିତ ସ୍ବର୍ଗତ ରାହାସବିହାରୀ ମହାନ୍ତି ଙ୍କ ର ପୁତୁରା ଅଟନ୍ତି।
