୨୨ରୁ ଅହୋରାତ୍ର ଗଣଧାରଣା
କେନ୍ଦ୍ରାପଡ଼ା, ୧୩/୦୯/୨୦୨୫(ଓଡ଼ିଶା ସମାଚାର)- କେନ୍ଦ୍ରାପଡ଼ା ଜିଲାରେ ମେଡ଼ିକାଲ କଲେଜ ପ୍ରତିଷ୍ଠା ନିମନ୍ତେ ସରକାର ଯେତିକି ବିଳମ୍ବ କରିଚାଲିଛନ୍ତି ସରକାରଙ୍କ ବିରୁଦ୍ଧରେ ଅସନ୍ତୋଷ ସେତିକି ତୀବ୍ର ହେବାରେ ଲାଗିଛି । ଆର୍ଥିକ ଦୃଷ୍ଟିରୁ ରାଜ୍ୟର ଅନ୍ୟତମ ପଛୁଆ ଜିଲା କେନ୍ଦ୍ରାପଡ଼ାର ଏହି ସ୍ଥିତିରେ ପରିବର୍ତନ ପାଇଁ ଗତ ପାଂଚ ବର୍ଷ ଧରି ଏଥିଲାଗି ଲଗାତର ଦାବି କରି ଆସୁଥିବା ମିଳିତ କ୍ରିୟାନୁଷ୍ଠାନ କମିଟି ଏବେ ପୁଣି ଆନ୍ଦୋଳନର ଡାକରା ଦେଇଛି । ପୂର୍ବ ସରକାର ସମୟରେ ବ୍ଲକ ସ୍ତରରୁ ଆରମ୍ଭ କରି ରାଜଧାନୀ ପର୍ଯ୍ୟନ୍ତ ବିଭିନ୍ନ ପର୍ଯ୍ୟାୟରେ ଏକାଧିକ ବାର ଦାବି ଉପସ୍ଥାପନ କରାଯାଇଥିଲେ ମଧ୍ୟ ତତ୍କାଳୀନ ସରକାର ଏଥିପ୍ରତି ଅଣଦେଖା କରିଥିଲେ । ଜିଲାବାସୀ ଆଶା କରିଥିଲେ ନୂଆ ସରକାର ଜିଲାର ଏହି ନ୍ୟାଯ୍ୟ ଦାବି ପ୍ରତି ଗୁରୁତ୍ୱ ଦେବ ।
ମାତ୍ର ଏବର ସରକାର ରାଜ୍ୟରେ ଚାରିଗୋଟି ନୂଆ ମେଡିକାଲ କଲେଜ ପାଇଁ ଘୋଷଣା କରିଥିଲେ ମଧ୍ୟ ସେଥିରେ କେନ୍ଦ୍ରାପଡ଼ାର ନାମ ରହିଲା ନାହିଁ । କେବେ ହେବ ସେଥିଲାଗି ନିର୍ଦିଷ୍ଟତା ନାହିଁ । ଏହା ଜିଲାବାସୀଙ୍କ ପାଇଁ କେବଳ ଅବିଚାର ନୁହେଁ ବରଂ ଅପମାନ ବୋଲି କ୍ରିୟାନୁଷ୍ଠାନ କମିଟି ପକ୍ଷରୁ ଆୟୋଜିତ ଆଜିର ଗଣସମ୍ମେଳନରେ ଅଭିଯୋଗ କରାଯାଇ ଦାବି ହାସଲ ପାଇଁ ଆନ୍ଦୋଳନକୁ ଜୋରଦାର କରିବାକୁ ସ୍ଥିର କରାଯାଇଛି ।
ଗରାପୁର ସ୍ଥିତ ଦି ପ୍ୟାଲେସ ପରିସରରେ କମିଟିର ସଭାପତି ଅଧ୍ୟାପକ ଅଜୟ ସାମଲଙ୍କ ସଭାପତିତ୍ୱରେ ଅନୁଷ୍ଠିତ ଏହି ଗଣସମ୍ମେଳନରେ ବିଧାୟକ ଗଣେଶ୍ୱର ବେହେରା, ପ୍ରାଧ୍ୟାପକ ନନ୍ଦକିଶୋର ପରିଡା, ବିଜେଡି ଜିଲା ସଭାପତି ଶିବ ପ୍ରସାଦ ଭଳ, କମିଟି ସମ୍ପାଦକ ରମଣୀରଞ୍ଜନ ରାଉତରାୟ, ଆବାହକ ମଣ୍ଡଳୀ ସଭ୍ୟ ଗୟାଧର ଧଳ, ଆଦିକନ୍ଦ 
ରାଉଳ, ମୁକ୍ତାର ଖାଁ, ଆପ୍ ଜିଲା ସମ୍ପାଦକ ସୂର୍ଯ୍ୟକାନ୍ତ ପରିଡା, କଂଗ୍ରେସ ନେତା ଭାଗୀରଥି ଜେନା, କର୍ମଚାରୀ ସଂଘ ନେତା ଡ. ଉପେନ୍ଦ୍ର ନାଥ ପ୍ରଧାନ, ଧୋୟାଂଚଳ ବିକାଶ ପରିଷଦ ସମ୍ପାଦକ ରାଜକୁମାର ବିଶ୍ୱାଳ, କେଦାର ସାମନ୍ତରାୟ, ଶ୍ରମିକ ନେତା ପ୍ରକାଶ ମହାନ୍ତି, ନବନିର୍ମାଣ କୃଷକ ସଂଘ ନେତା ଦାଶରଥି ସାହୁ, ଅକ୍ରୁର ପଲାଇ, ସର୍ବୋଦୟ ନେତା ମହେନ୍ଦ୍ର ପଟ୍ଟନାୟକ, ବିଜୟ ନାୟକ, ବୈଷ୍ଣବ ସ୍ୱାଇଁ, ସୁରେଶ ପଟ୍ଟନାୟକ, ସୀତାକାନ୍ତ ନାୟକ ପ୍ରମୁଖ ବହୁ ବିଶିଷ୍ଟ ବ୍ୟକ୍ତି ଆଲୋଚନାରେ ଅଂଶଗ୍ରହଣ କରି ଆସନ୍ତା ବିଧାନସଭା ଅଧିବେଶନ କାଳରେ ସରକାର ଏ ସମ୍ପର୍କରେ ଘୋଷଣା କରିବା ପାଇଁ ଦାବି କରିଥିଲେ ।
ସରକାରଙ୍କୁ ଜିଲାବାସୀଙ୍କ କ୍ଷୋଭ ଜଣାଇଦେବା ସହ ଆସନ୍ତା ୨୨ ତାରିଖ ଠାରୁ ଦାବି ହାସଲ ପର୍ଯ୍ୟନ୍ତ ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଅହୋରାତ୍ର ଗଣଧାରଣା ଆନ୍ଦୋଳନ ସଙ୍ଗଠିତ କରାଯିବା ପାଇଁ ଏଠାରେ ନିଷ୍ପତି ନିଆଯାଇଛି । ଜିଲାର ଅଧିକାର ହାସଲ ପାଇଁ ଏହି ଆନ୍ଦୋଳନରେ ସାମିଲ ହେବାକୁ ଜିଲାର ସବୁ ବର୍ଗର ଜନସାଧାରଣଙ୍କୁ ଆହ୍ୱାନ କରାଯାଇଛି ।
