ଜିଲ୍ଲା ଅବକାରୀ ବିଭାଗର ସମୀକ୍ଷା ବୈଠକ

କଟକ,୧୦/୦୧/୨୦୨୪ (ଓଡ଼ିଶା ସମାଚାର)- କଟକ ଜିଲା ଅବକାରୀ ଅଧୀକ୍ଷକ ଦେବାଶିଷ ପଟେଲଙ୍କ ଅଧ୍ୟକ୍ଷତାରେ ଏକ ସମୀକ୍ଷା ବୈଠକ ଅନୁଷ୍ଠିତ ହୋଇଯାଇଛି । ଏହି ବୈଠକରେ ଜିଲାର ବିଭିନ୍ନ ସ୍ଥାନରେ ଚୋରା ମଦ, ଗେଞ୍ଜଇ, ଅଫିମ ଓ ଦେଶୀ ମଦକୁ କିଭଳି ଭାବେ ନିୟନ୍ତ୍ରଣ କରାଯିବ ସେନେଇ ଶ୍ରୀ ପଟେଲ ଗୁରୁତ୍ୱାରୋପ କରିଥିଲା ବେଳେ ବକେୟା ରାଜସ୍ୱକୁ ଆଦାୟ କରିବା ଉପରେ ଅଧିନସ୍ଥ କର୍ମଚାରୀମାନଙ୍କୁ ନିର୍ଦ୍ଧେଶ ଦେଇଥିଲେ । ଅନୁଷ୍ଠିତ ବୈଠକରେ ଜିଲା ଉପ ଅଧୀକ୍ଷକ ପ୍ରମୋଦ କୁମାର ପଣ୍ଡା, ସଦର ଇନ୍ସପେକ୍ଟର ସ୍ମୃତିକାନ୍ତ ରାଉତ, ମୋବାଇଲ ଇନ୍ସପେକ୍ଟର ସଂଜିତ ବାର୍ଲା, ଆଠଗଡ ଇନ୍ସପେକ୍ଟର ଅଭିରାମ ସାହୁ ଓ ସାଲେପୁର ଇନ୍ସପେକ୍ଟର ମାନସୀ ନାୟକ ପ୍ରମୁଖ ଯୋଗଦେଇ ଅଂଚଳରେ ଘଟିଥିବା ଚୋରା ଦେଶୀ ଓ ବିଦେଶୀ ମଦ ଉପରେ ସବିଶେଷ ତଥ୍ୟ ପ୍ରଦାନ କରିଥିଲେ । ତେବେ ୨୦୨୪ ମାର୍ଚ୍ଚ ୩୧ ତାରିଖ ମଧ୍ୟରେ ସରକାରଙ୍କ ରାଜସ୍ୱ ଆଦାୟର ଲକ୍ଷ୍ୟଧାର୍ଯ୍ୟକୁ ପୂରଣ କରିବା ଲାଗି ଅଧିନସ୍ଥ କର୍ମଚାରୀମାନଙ୍କୁ ଅଧୀକ୍ଷକ ଶ୍ରୀ ପଟେଲ ପରାମର୍ଶ ଦେଇଥିଲେ ।