କେନ୍ଦ୍ରାପଡ଼ା, ୦୮/୦୫/୨୦୨୬ (ଓଡ଼ିଶା ସମାଚାର)- ଜାତିସଂଘ ଏବଂ ଓଡିଶା ପୋଲିସର ମିଳିତ ଆନୁକୂଲ୍ୟରେ କେନ୍ଦ୍ରାପଡା ସଦରଥାନାରେ କିଶୋରୀମାନଙ୍କ ସୁରକ୍ଷା ନିମନ୍ତେ ଏକ ସଚେତନତା କାର୍ଯ୍ୟକ୍ରମ “ଯୁଭେନ୍ତିକା”ଅନୁଷ୍ଠିତ ହୋଇଯାଇଛି । ସଦରଥାନା ଅଧିକାରୀ ପଦ୍ମାଳୟା ପ୍ରଧାନଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି କାର୍ଯ୍ୟକ୍ରମରେ କେନ୍ଦ୍ରାପଡା ବ୍ଲକ ଶିଶୁ ବିକାଶ ଯୋଜନା ଅଧିକାରୀ ସୁଜାତା ତ୍ରିପାଠୀ ଅତିଥି ଭାବେ ଯୋଗଦେଇ ଉପସ୍ଥିତ କିଶୋରୀମାନଙ୍କୁ କହିଲେ ପୋଲିସକୁ ଭୟ ନକରି ଆବଶ୍ୟକ ସମୟରେ ନିଜର ସୁରକ୍ଷା ନିମନ୍ତେ ପୋଲିସର ସହାୟତା ନେବାକୁ ପରାମର୍ଶ ଦେଇଥିଲେ ।
ଏଥିସହିତ କିଶୋରୀମାନେ ମହିଳା ପୋଲିସକୁ ସମସ୍ତ କଥା ଖୋଲି କହିଲେ ପୋଲିସ ଉଚିତ ପଦକ୍ଷେପ ଗ୍ରହଣ କରିବା ସହଜ ହୋଇପାରିବ ବୋଲି ସେ ମତବ୍ୟକ୍ତ କରିଥିଲେ । ଏହି ଅବସରରେ ଭୁବନେଶ୍ୱରରୁ ଆଭାଷୀ ମାଧ୍ୟମରେ ପୋଲିସ ମହାନିର୍ଦେଶକ ଯୋଗେଶ ବାହାଦୂର ଖୁରାନିଆ ରାଜ୍ୟର ବିଭିନ୍ନ ଥାନାର କିଶୋରୀମାନଙ୍କ ସହ କଥୋପକଥନ କରିବା ସହ ଥାନା ସମ୍ପର୍କରେ ସେମାନଙ୍କର ଆଜିର ଅଭିଜ୍ଞତା ସମ୍ପର୍କରେ ପଚାରି ବୁଝିଥିଲେ । ଏହାସହ ୟୁନିସେଫ ଦ୍ୱାରା ପ୍ରସ୍ତୁତ ଭିଡିଓ ସଚେତନାତା ବାର୍ତା ପ୍ରଦର୍ଶିତ ହୋଇଥିଲା । ଥାନାଧିକାରୀ ଶ୍ରୀମତୀ ପ୍ରଧାନ କିଶୋରୀମାନଙ୍କୁ “ଯୁଭେନ୍ତିକା” ସମ୍ପର୍କରେ ବିଭିନ୍ନ ତଥ୍ୟ ମାଧ୍ୟମରେ ସଚେତନ କରାଇ କହିଥିଲେ ଯେ କିଶୋରୀମାନଙ୍କ ସୁରକ୍ଷା ପାଇଁ ଆଜିର କାର୍ଯ୍ୟକ୍ରମ । ସେମାନେ ପୁଅମାନଙ୍କ କୈାଣସି ପ୍ରଲୋଭନର ବଶବର୍ତୀ ନହେବା ପାଇଁ ପରାମର୍ଶ ଦେଇଥିଲେ ।
ସେମାନଙ୍କ ସୁରକ୍ଷା ପ୍ରତି କୌଣସି ଆନ୍ଚ ଆସିଲେ ତୁରନ୍ତ ୧୧୨ନମ୍ବରକୁ ଫୋନ କଲ କରି ଘଟଣା ସମ୍ପର୍କରେ ଜଣାଇବାକୁ ପରାମର୍ଶ ଦେଇଥିଲେ । ଫଳରେ ପୋଲିସ ଘଟଣାସ୍ଥଳରେ ଯଥାଶୀଘ୍ର ପହଂଚି ସେମାନଙ୍କୁ ସୁରକ୍ଷା ଯୋଗାଇଦେବା ସମ୍ଭବ ହୋଇପାରିବ । ଥାନାରେ ପୋଲିସଙ୍କୁ ଭୟ ନ କରି ବିନା ବାଧାରେ ଅଭିଯୋଗ କରିପାରିବେ ବୋଲି କହିଥିଲେ । ବିଶେଷ କରି କିଶୋର ଅବସ୍ଥାରେ ହେଉଥିବା ଅପରାଧ ଉପରେ ଉପସ୍ଥିତ କିଶୋରୀମାନଙ୍କୁ ବିଭିନ୍ନ ଉଦାହରଣ ମାଧ୍ୟମରେ ବୁଝାଇ ସଚେତନ କରାଇଥିଲେ ।
କୌଣସି କିଶୋରୀଙ୍କ ଠାରୁ ଫୋନ କଲ ମିଳିଲେ ଥାନାରୁ ଜଣେ ମହିଳା ଅଧିକାରୀ ତୁରନ୍ତ ଘଟଣାସ୍ଥଳରେ ପହଂଚିବେ ବୋଲି କହିବା ସହ ଆବଶ୍ୟକ ସ୍ଥଳେ ଥାନାଧିକାରୀ ନିଜେ ମଧ୍ୟ ଯାଇ କିଶୋରୀମାନଙ୍କୁ ସୁରକ୍ଷା ଯୋଗାଇଦେବେ ବୋଲି ଜନୈକ କିଶୋରୀଙ୍କ ପ୍ରଶ୍ନର ଉତର ଦେଇ ସେ କହିଥିଲେ । ଥାନାଧିକାରୀ ଶ୍ରୀମତୀ ପ୍ରଧାନ କିଶୋରୀମାନଙ୍କୁ ଥାନା ପରିସର ବୁଲାଇ ଦେଖାଇବା ସହ ସେମାନଙ୍କ ବିଭିନ୍ନ ପ୍ରଶ୍ନର ଉତର ମଧ୍ୟ ଦେଇଥିଲେ । ଅନ୍ୟମାନଙ୍କ ମଧ୍ୟରେ ସଦର ଥାନା ଅତିରିକ୍ତ ଆଇଆଇସି ବାସୁଦେବ ପରିଡା, ଏସଆଇ ଶିବରାମ ସ୍ୱାଇଁ, ଦୀପକ ସାମନ୍ତସିଂହାର, ଏଏସଆଇ ସୁଶ୍ମିତା ରାଉତ, ସୁଜିତ କୁମାର ପାତ୍ରଙ୍କ ସମେତ ଥାନାର ସମସ୍ତ ଅଧିକାରୀ ଓ କର୍ମଚାରୀମାନେ ଉପସ୍ଥିତ ରହି କାର୍ଯ୍ୟକ୍ରମ ପରିଚାଳନାରେ ସହ ଯୋଗ କରିଥିଲେ ।
