କେନ୍ଦ୍ରାପଡ଼ା, ୦୯/୦୬/୨୦୨୫(ଓଡ଼ିଶା ସମାଚାର)- ଓଡିଶାର ସାଂସ୍କୃତିକ ଅନୁଷ୍ଠାନ ମୂର୍ଚ୍ଛନା ଓ ଓଡ଼ିଶା କଲଚର ଆର୍ଟ ଏକାଡେମୀ ପକ୍ଷରୁ ପୁରୀ ଜିଲା ସଂସ୍କୃତି ଭବନ ଠାରେ ରାଜ୍ୟ ସ୍ତରୀୟ ରଜ ମହୋତ୍ସବ ଅନୁଷ୍ଠିତ ହୋଇ ଯାଇଛି । ପ୍ରାରମ୍ଭରେ ଅନୁଷ୍ଠାନର ପ୍ରତିଷ୍ଠାତା ଓ ନିର୍ଦ୍ଧେଶକ ବସନ୍ତ କୁମାର ଦାସ ସଭାପତିତ୍ୱ କରି ରଜ ମହୋତ୍ସବର ଉଦ୍ଧେଶ୍ୟ ଜ୍ଞାପନ କରିଥିଲେ । ସମାଜସେବୀ ଓ ଶିକ୍ଷାବିତ୍ ଶଶଧର ପଣ୍ଡା ମୁଖ୍ୟବକ୍ତା ଏବଂ ଓଡ଼ିଆ ଭାଷା ସାହିତ୍ୟ ଓ ସଂସ୍କୃତି ବିଭାଗର ଡକ୍ଟର ତ୍ରିଲୋଚନ ବରାଳ ଓ ମୁଖ୍ୟ ଅତିଥି ଭାବେ ଯୋଗଦେଇ ଉତ୍ସବକୁ ଉଦଘାଟନ କରିଥିଲେ ।
ସମ୍ମାନୀତ ଅତିଥି ଭାବେ ଶ୍ରୀମନ୍ଦିର ସେବାୟତ ଶିବନାରାୟଣ ପୂଜାପଣ୍ଡା, ଗୋଟିପୁଅ ନୃତ୍ୟଗୁରୁ ମାଗୁଣୀ ଜେନା, ନିର୍ଦ୍ଧେଶକ ରଙ୍ଗଶାଳା ପୁରୀର ବିକ୍ରମ କୁମାର ସାହୁ, ସାମ୍ୱାଦିକ ସର୍ବେଶ୍ୱର ଜେନା ପ୍ରମୁଖ ଯୋଗଦେଇ ବିଭିନ୍ନ କ୍ଷେତ୍ରରେ ସଫଳତା ହାସଲ କରିଥିବା କଳାକାର କବି ସମାଜସେବୀ ମାନଙ୍କୁ ,ଶ୍ରୀକ୍ଷେତ୍ର ଧାମ ସମ୍ମାନ, ଓଡ଼ିଶା ଗୌରବ ସମ୍ମାନ ପ୍ରଦାନ କରିଥିଲେ ।
ଅପରାହ୍ନରେ ଫେଷ୍ଟିଭାଲ ନିର୍ଦ୍ଧେଶକ ମୋନାଲିସା ଷଡ଼ଙ୍ଗୀ ଓ ପ୍ରଦୀପ କୁମାର ବିହାରୀଙ୍କ ପରିଚାଳନାରେ ରଜ ପ୍ରତିଯୋଗିତା କରାଯାଇଥିଲା । ଅନୁଷ୍ଠାନର ପ୍ରତିଷ୍ଠାତା ବସନ୍ତ କୁମାର ଦାସ କୃତିତ୍ୱ ଅର୍ଜନ କରିଥିବା ପ୍ରତିଭା ମାନଙ୍କୁ ରଜ କୁଇନ ଆୱାର୍ଡ ପ୍ରଦାନ କରିଥିଲେ । ସୁଶାନ୍ତ କୁମାର ପରିଡ଼ା,ବିଜୟ କେତନ ସାହୁ, ଅନିଲ କୁମାର ବାରିକ, ଅମିତ କୁମାର ପ୍ରଧାନ, ପ୍ରମୁଖ ପରିଚାଳନାରେ ସହଯୋଗ କରିଥିଲେ ।
