ଯାଜପୁର, ୨୪/୦୪/୨୦୨୫ (ଓଡ଼ିଶା ସମାଚାର)- ଆଜି ପୂର୍ବାହ୍ନ ରେ ଜାତୀୟ ପଞ୍ଚାୟତିରାଜ ଦିବସ ପାଳନ ଉପଲକ୍ଷେ ଜିଲ୍ଲା ସ୍ତରୀୟ ସମାରୋହ ସ୍ଥାନୀୟ ଯାଜପୁର ବ୍ଲକ୍ କାର୍ଯ୍ୟାଳୟ ଠାରେ ଅନୁଷ୍ଠିତ ହେଇଯାଇଛି । ଉକ୍ତ ଦିବସରେ ଯୋଗଦେଇ ଜିଲ୍ଲାପାଳ ଶ୍ରୀମତୀ ପି. ଅନ୍ୱେଷା ରେଡ୍ଡୀ କହିଲେ ଏପ୍ରିଲ ୨୪,୧୯୯୩ ମସିହାରେ ୭୩ ତମ ସାମ୍ବିଧାନିକ ସଂଶୋଧନ ଅଧିନିୟମର କାର୍ଯ୍ୟକାରିତାକୁ ଚିହ୍ନିତ କରେ, ଯାହା ପଞ୍ଚାୟତିରାଜ ଅନୁଷ୍ଠାନଗୁଡ଼ିକୁ ସାମ୍ବିଧାନିକ ମାନ୍ୟତା ପ୍ରଦାନ କରିଥିଲା ।
ଭାରତର ଗଣତାନ୍ତ୍ରିକ ଢାଞ୍ଚାରେ ପଞ୍ଚାୟତିରାଜ ବ୍ୟବସ୍ଥାର ଗୁରୁତ୍ୱକୁ ସ୍ୱୀକାର କରିବା ପାଇଁ ପ୍ରତିବର୍ଷ ଏପ୍ରିଲ ୨୪ ତାରିଖରେ ଜାତୀୟ ପଞ୍ଚାୟତିରାଜ ଦିବସ ପାଳନ କରାଯାଏ। ଏହି ଐତିହାସିକ ସଂଶୋଧନ ଫଳରେ ସାରା ଦେଶରେ ତ୍ରିସ୍ତରୀୟ ପଞ୍ଚାୟତିରାଜ ବ୍ୟବସ୍ଥା ଗ୍ରହଣ କରାଯାଇଥିଲା, ଯାହା ସ୍ଥାନୀୟ ସ୍ୱାୟତ୍ତ ଶାସନକୁ ସଶକ୍ତ କରିଥିଲା ଏବଂ ତୃଣମୂଳ ଗଣତନ୍ତ୍ରକୁ ସୁଦୃଢ଼ କରିଥିଲା। ଶାସନକୁ ତୃଣମୂଳ ସ୍ତରକୁ ଆଣିବା, ଗ୍ରାମ ବିକାଶକୁ ପ୍ରୋତ୍ସାହିତ କରିବା ଏବଂ ଗ୍ରାମୀଣ ନାଗରିକଙ୍କ ସକ୍ରିୟ ଅଂଶଗ୍ରହଣକୁ ପ୍ରୋତ୍ସାହିତ କରିବାରେ ଏହି ବ୍ୟବସ୍ଥା ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥାଏ। ଏକ ଦେଶର ବିକାଶ ତଥା ରାଜ୍ୟର ବିକାଶ ଏହାର ପଞ୍ଚାୟତର ବିକାଶ ଉପରେ ନିର୍ଭର କରିଥାଏ ।
ସ୍ଥାନୀୟ ପି.ଆର.ଆଇ ସଦସ୍ୟମାନେ ତୃଣମୂଳ ସ୍ତରରୁ ପଞ୍ଚାୟତର ବିକାଶ ନିମନ୍ତେ କାମ କରିପାରିବେ ଯାହା କି ପଞ୍ଚାୟତିରାଜ ବ୍ୟବସ୍ଥାକୁ ସୁଦୃଢ କରିପାରିବ । ଏହା ହିଁ ହେଉଛି ପଞ୍ଚାୟତିରାଜ ଦିବସ ପାଳନ ର ମୁଖ୍ୟ ଉଦ୍ଦେଶ୍ୟ ।ସ୍ଥାନୀୟ ସ୍ୱାୟତ୍ତ ଶାସନକୁ ସଶକ୍ତ କରି, ପଞ୍ଚାୟତିରାଜ ଅନୁଷ୍ଠାନଗୁଡ଼ିକ ସମ୍ପ୍ରଦାୟଗୁଡ଼ିକୁ ସେମାନଙ୍କ ନିଜସ୍ୱ ବିକାଶର ଦାୟିତ୍ୱ ନେବାକୁ ଏବଂ ସେମାନଙ୍କ ଜୀବନକୁ ପ୍ରଭାବିତ କରୁଥିବା ସୂଚିତ ନିଷ୍ପତ୍ତି ନେବାକୁ ସକ୍ଷମ କରିଥାଏ। ।
ପଞ୍ଚାୟତିରାଜ ବ୍ୟବସ୍ଥା ର ସୁଦୃଢ଼ୀକରଣ ନିମନ୍ତେ ଅନେକ ଗୁଡ଼ିଏ ବ୍ୟବସ୍ଥା କରାଯାଇଛି ଯେପରି କେନ୍ଦ୍ର ସ୍ତରୀୟ ପାଣ୍ଠି ତଥା ରାଜ୍ୟସ୍ତରୀୟ ପାଣ୍ଠି ଆଦିର ବ୍ୟବସ୍ଥା କରାଯାଇଛି। ଗୋଟିଏ ଦେଶର ମେରୁଦଣ୍ଡ ହେଉଛି ଗାଁ । ଗାଁ ର ବିକାଶ ହେଲେ ଦେଶର ବିକାଶ ହେବ ।
ସେଥିପାଇଁ ଜାତୀୟ ପଞ୍ଚାୟତିରାଜ ଦିବସ ରେ ରାଜ୍ୟ ସରକାର ଙ୍କ ପଞ୍ଚାୟତିରାଜ ଓ ପାନୀୟ ଜଳ ବିଭାଗ ପକ୍ଷ ରୁ ବିକଶିତ ଗାଁ ବିକଶିତ ଓଡିଶା ଯୋଜନା ପ୍ରଣୟନ କରାଯାଇଛି, ଯାହା ୫ ବର୍ଷ ପର୍ଯ୍ୟନ୍ତ କାର୍ଯ୍ୟକାରୀ ହେବ ।ଉକ୍ତ ଦିବସରେ ନୂତନ ହିତାଧିକାରୀ ଙ୍କୁ ରାସନ୍ କାର୍ଡ ମଧ୍ୟ ବଣ୍ଟନ କରାଯାଇଥିଲା ।ଯାଜପୁର ଜିଲ୍ଲାରେ ୪୨୩୮୧ ଜଣ ହିତାଧିକାରୀ ନୂତନ ରାସନ କାର୍ଡ ପାଇବେ। ଜିଲ୍ଲାସ୍ତରୀୟ ଉତ୍ସବରେ ୫୫ ଜଣ ହିତାଧିକାରୀ ଙ୍କୁ ରାସନ କାର୍ଡ ପ୍ରଦାନ କରାଯାଇଛି।
ଜାତୀୟ ପଞ୍ଚାୟତିରାଜ ଦିବସରେ ଉଲ୍ଲେଖନୀୟ କାର୍ଯ୍ୟ ପାଇଁ ପ୍ରଥମ ସ୍ଥାନ ଅଧିକାର କରିଥିବା ଯାଜପୁର ଜିଲ୍ଲାର ଦାନଗଦି ବ୍ଲକ ର ତ୍ରିଜଙ୍ଗା ପଞ୍ଚାୟତ, କୋରେଇ ବ୍ଲକର ପଚ୍ଛିକୋଟ ପଞ୍ଚାୟତ, ଧର୍ମଶାଳା ବ୍ଲକର ରାଇଛନ୍ଦା ପଞ୍ଚାୟତ, ରସୁଲପୁର ବ୍ଲକର ସମନ୍ତରାପୁର ପଞ୍ଚାୟତ,
ପହଙ୍ଗା ପଞ୍ଚାୟତ ଓ ମୁଗୁପାଳ ପଞ୍ଚାୟତକୁ ୭ ଲକ୍ଷ ୭୨ ହଜାର ୯୪୬ ଟଙ୍କା ଅର୍ଥ ରାଶି, ଦ୍ଵିତୀୟ ସ୍ଥାନ ଅଧିକାର କରିଥିବା ରସୁଲପୁର ବ୍ଲକର ନରସିଂହପୁର ପଞ୍ଚାୟତକୁ ୫ ଲକ୍ଷ ୭୯ ହଜାର ୭୧୦ ଟଙ୍କା ଅର୍ଥରାଶି, ତୃତୀୟ ସ୍ଥାନ ଅଧିକାର କରିଥିବା ରସୁଲପୁର ବ୍ଲକର ବଡକଇଞ୍ଚି ପଞ୍ଚାୟତ, ବନ୍ଧଡ଼ିହ ପଞ୍ଚାୟତ, ଟିକରପଡ଼ା ପଞ୍ଚାୟତ, ବଡ଼ଚଣା ବ୍ଲକ ର ବାରିପଦା ପଞ୍ଚାୟତ, ସୁକିନ୍ଦା ବ୍ଲକର ର ପିମ୍ପୁଡ଼ିଆ ପଞ୍ଚାୟତ ଓ ରାନ୍ସୋଳ ପଞ୍ଚାୟତ ଙ୍କୁ ୩ ଲକ୍ଷ ୮୬ ହଜାର ୪୭୩ ଟଙ୍କା ଅର୍ଥରାଶି ମୁଖ୍ୟ ଅତିଥିଙ୍କ ଦ୍ଵାରା ପ୍ରଦାନ କରାଯାଇଥିଲା।
ପ୍ରାରମ୍ଭରେ ଗୋଷ୍ଠୀ ଉନ୍ନୟନ ଅଧିକାରୀ, ଯାଜପୁର ସ୍ବାଗତ ଭାଷଣ ପ୍ରଦାନ କରିଥିଲେ । ଉକ୍ତ ଦିବସରେ ଜିଲ୍ଲାପରିଷଦ ମୁଖ୍ୟ ଉନ୍ନୟନ ଅଧିକାରୀ ଶ୍ରୀ ଅଶୋକ କୁମାର ବେହୁରିଆ, ଯାଜପୁର ବ୍ଲକ ଅଧ୍ୟକ୍ଷା ଶ୍ରୀମତୀ ସ୍ଵର୍ଣ୍ଣଲତା ପରିଡା, ଏ ପି ଡ଼ି, ଲମ୍ବୋଦର ଖୁଣ୍ଟିଆ, ବି ଡ଼ି ଓ ହେମନ୍ତ କୁମାର ମହନ୍ତ,ବିଭାଗୀୟ ପ୍ରଶାସନିକ ଅଧିକାରୀ,ଗଣମାଧ୍ୟମ ପ୍ରତିନିଧି, ସହରର ବୁଦ୍ଧିଜୀବୀ, ପି.ଆର.ଆଇ ମେମ୍ବର,ମିଶନ ଶକ୍ତି ମହିଳା, ଯୋଜନାର ହିତାଧିକାରୀ ପ୍ରମୁଖ ଉପସ୍ଥିତ ଥିଲେ।
