ସପ୍ତଦଶ ବିଧାନସଭାର ପ୍ରଥମ ଅଧିବେଶନ ଶେଷ: ଅନିର୍ଦ୍ଧିଷ୍ଟ କାଳ ଯାଏଁ ଗୃହ ମୁଲତବୀ ଘୋଷଣା

ଭୁବନେଶ୍ୱର,୧୧/୯/୨୦୨୪ (ଓଡ଼ିଶା ସମାଚାର)- ସପ୍ତଦଶ ବିଧାନସଭାର ପ୍ରଥମ ଅଧିବେଶନ ଶେଷ  ହୋଇଛି। ଏହା  ୨୨ ଜୁଲାଇ ୨୦୨୪ଠାରୁ ଆରମ୍ଭ ହୋଇ  ଆଜି ୧୧ ସେପ୍ଟେମ୍ବର ବୁଧବାର ଏହା ଶେଷ ହୋଇଛି।  ବୁଧବାର ବାଚସ୍ପତି ସୁରମା ପାଢୀ ଗୃହ କାର୍ଯ୍ୟକୁ ଅନିର୍ଦ୍ଧିଷ୍ଟ କାଳ ଯାଏଁ ମୁଲତବୀ ଘୋଷଣା କରିଛନ୍ତି।ଏଥିରେ ୨୫ଟି କାର୍ଯ୍ୟ ଦିବସ ଅନୁଷ୍ଠିତ ହୋଇଥିଲା। ଏହି ଅଧିବେଶନରେ ୮ଜଣ ପୂର୍ବତନ ରାଜ୍ୟପାଳ, ପୂର୍ବତନ ମନ୍ତ୍ରୀ ଏବଂ ପୂର୍ବତନ ସମାଜସେବୀଙ୍କ ପାଇଁ ଶୋକ ପ୍ରସ୍ତାବ ଅଣାଯାଇଥିଲା। ସେହିପରି ଜଣେ ବିଶିଷ୍ଟ ସମାଜସେବୀ ଏବଂ ଜଣେ ପୂର୍ବତନ ଓଡ଼ିଶା ପୁଲିସଙ୍କ ପାଇଁ ଶୋକ ପ୍ରସ୍ତାବ ଅଣାଯାଇଥିଲା।ଅଧିବେଶନରେ ୨୮୭୪ ତାରକା ଚିହ୍ନିତ ପ୍ରଶ୍ନ ନୋଟିସ୍ ଗ୍ରହଣ ହୋଇଥିଲା। ଅପରପକ୍ଷରେ ୩୫୩୪ଟି ଅଣତାରକା ଚିହ୍ନତ ପ୍ରଶ୍ନ ନୋଟିସ୍ ଗ୍ରହଣ କରାଯାଇଥିଲା। ୪୯୨୧ଟି ଅଣତାରକା ଚିହ୍ନତ ପ୍ରଶ୍ନର ଉତ୍ତର ଉପସ୍ଥାପନ କରାଯାଇଥିଲା। ୧୯ଟି ମୁଲତବୀ ପ୍ରସ୍ତାବ ଉପରେ ଆଲୋଚନା କରାଯାଇଥିଲା। ୮୩ଟି ପେପର ଉପସ୍ଥାପନ/ପୁନଃଉପସ୍ଥାପନ କରାଯାଇଥିଲା। ୧୧ଟି ବାର୍ଷିକ ରିପୋର୍ଟ ଉପସ୍ଥାପନ ହୋଇଥିବାବେଳେ ୪୨ଟି କମିଟି ରିପୋର୍ଟ ଉପସ୍ଥାପନ ହୋଇଥିଲା। ଏହା ସହିତ ୮୩ରୁ ଅଧିକ ନିବେଦନ ଉପସ୍ଥାପନ କରାଯାଇଥିଲା। ୫ଟି ବିବୃତି ଉପସ୍ଥାପନ ହୋଇଥିବାବେଳେ ଗୋଟିଏ ଦୃଷ୍ଟି ଆକର୍ଷଣ ଉପସ୍ଥାପନ କରାଯାଇଥିଲା।  ସେହିପରି ୨ଟି ସରକାରୀ ବିଧେୟକ ଉପସ୍ଥାପନ ହେବା ସହିତ ୨ଟି ସରକାରୀ ବିଧେୟକ ପାରିତ ହୋଇଥିଲା। ୨୧ଟି ଖର୍ଚ୍ଚଦାବି ଆଲୋଚନା କରାଯାଇଥିଲା। ଏହା ସହିତ ଶେଷଦିନରେ ୬ଟି ସିଏଜି ରିପୋର୍ଟ ଉପସ୍ଥାପନ କରାଯାଇଥିଲା।