କେନ୍ଦ୍ରାପଡ଼ା,୧୩/୧୧/୨୦୨୩ (ଓଡ଼ିଶା ସମାଚାର)- ଜିଲାପାଳଙ୍କ ନିର୍ଦ୍ଧେଶକ୍ରମେ ଅତିରିକ୍ତ ଜିଲାପାଳ(ରାଜସ୍ୱ) ନିଲୁ ମହାପାତ୍ର ଆଜି ଗୋପବନ୍ଧୁ କର୍ମଜୀବୀ ସାମ୍ବାଦିକ ସ୍ୱାସ୍ଥ୍ୟବୀମା ଯୋଜନାର କାର୍ଡ଼ ବଂଟନ କରିଛନ୍ତି । ଜିଲାପାଳଙ୍କ କାର୍ଯ୍ୟାଳୟର ସଦ୍ଭାବନା ସଭାଗୃହରେ ଏହି ବଂଟନ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । ୧୩୨ ଜଣ ଯୋଗ୍ୟ ସ୍ୱାସ୍ଥ୍ୟବୀମା କାର୍ଡ଼ଧାରୀଙ୍କ ମଧ୍ୟରୁ ମୋଟ୍ ୩୧ ଜଣ ଉପସ୍ଥିତ ରହି ସେମାନଙ୍କ କାର୍ଡ଼ ସଂଗ୍ରହ କରିଛନ୍ତି । ଏହି ଅବସରରେ ସାମ୍ବାଦିକଙ୍କ କଳ୍ୟାଣ ପାଇଁ ରାଜ୍ୟ ସରକାର ନେଇଥିବା ଏହି ମହତ୍ ପଦକ୍ଷେପର ସାମ୍ବାଦିକମାନେ ଭୂୟଂସୀ ପ୍ରଶଂସା କରିଥିଲେ । ସୂଚନାଯୋଗ୍ୟ ଯେ, ଆବେଦନ କରିଥିବା ସାମ୍ବାଦିକଙ୍କ ମଧ୍ୟରୁ ମୋଟ୍ ୧୭୨ଜଣ ସାମ୍ବାଦିକ ଚଳିତଥର ଯୋଗ୍ୟ ବିବେଚିତ ହୋଇଛନ୍ତି । 
ସେଥିମଧ୍ୟରେ ବିଏସକେୱାଇ କାର୍ଡ଼ଧାରୀ ସାମ୍ବାଦିକଙ୍କ ସଂଖ୍ୟା ୪୦ ଥିବା ବେଳେ ୧୩୨ ଜଣ ଗୋପବନ୍ଧୁ କର୍ମଜୀବୀ ସାମ୍ବାଦିକ ସ୍ୱାସ୍ଥ୍ୟବୀମା ଯୋଜନାର କାର୍ଡ଼ ପାଇବେ । ଏହି ବଂଟନ କାର୍ଯ୍ୟକ୍ରମରେ ଜିଲା ଶିଶୁ ସୁରକ୍ଷା ଅଧିକାରୀ ବିଜୟ କେତନ ସାହୁ, ଜିଲା ସୂଚନା ଓ ଲୋକ ସଂପର୍କ ଅଧିକାରୀ ଆଲୋକ କୁମାର ମହାନ୍ତି, ଉପଖଣ୍ଡ ସୂଚନା ଓ ଲୋକ ସଂପର୍କ ଅଧିକାରୀ ଅଶୋକ ବଳିଆରସିଂହ, ଏସଆରଏ ପ୍ରଦୀପ କୁମାର ଦାସ, ଜେଆରଏ ଜୟଶ୍ରୀ ସାହୁ, ପ୍ରକ୍ଷେପକ ମଧୁସୂଦନ ମଲ୍ଲିକ, ତପନ ପରିଡ଼ା, ରଞ୍ଜନ କୁମାର ବେହେରା ପ୍ରମୂଖ ଉପସ୍ଥିତ ଥିଲେ ।
