ନିରାକାରପୁର ବସ ମାଲିକ ସଂଘ ତରଫରୁ ଜଳଛତ୍ର ଉଦଘାଟିତ

ନିରାକାରପୁର, ୦୧/୦୪/୨୦୨୪ (ଓଡ଼ିଶା ସମାଚାର)- ଖୋର୍ଦ୍ଧା ଜିଲ୍ଲା ନିରାକାରପୁର ବସ ମାଲିକ ସଂଘ ତରଫରୁ ଆଜି ଏକ ଜଳଛତ୍ର ବସଷ୍ଟାଣ୍ଡରେ ଉଦଘାଟିତ ହୋଇଯାଇଛି। ଏହି ଉଦଘାଟନୀ ଉତ୍ସବରେ ମୁଖ୍ୟ ଅତିଥିଭାବେ ଜଗନ୍ନାଥ ସଂସ୍କୃତି ଗବେଷକ ଡ ପୂର୍ଣ୍ଣ ଚନ୍ଦ୍ର ଦାଶ ଯୋଗ ଦେଇ ଆନୁଷ୍ଠାନିକ ଭାବେ ଉଦଘାଟନ କରିଥିଲେ। ଅନ୍ୟମାନଙ୍କ ମଧ୍ୟରେ ନିରାକାରପୁର ବସ ମାଲିକ ସଂଘ ସଭାପତି ବିପିନ କୁମାର ଜୟସିଂହ , ସରପଂଚ କାଦମ୍ବିନୀ ବେହେରା, ବସ ମାଲିକ ସଂଘ ସମ୍ପାଦକ ରଘୁନାଥ ତ୍ରିପାଠୀ, ନାଏବ ସରପଂଚ ସ୍ଵପ୍ନେଶ୍ୱର ରାଉତରାୟ, ସୁଶାନ୍ତ ପ୍ରଧାନ ଓ ଦେବେନ୍ଦ୍ର କୁମାର ପ୍ରଧାନଙ୍କ ସମେତ ଗଣମାଧ୍ୟମ ପ୍ରତିନିଧି, ସମାଜସେବୀ ପ୍ରମୁଖ ଉପସ୍ଥିତ ରହି ସଂଘ ପକ୍ଷରୁ ବସ ଯାତ୍ରୀ ଓ ବାଟୋଇ ଙ୍କୁ ଦହି ପଣା, ବିଶୁଦ୍ଧ ପାନୀୟ ଜଳ ପ୍ରଦାନ କରାଯାଇଥିଲା। ଭୀଷଣ ଗ୍ରୀଷ୍ମ ପ୍ରବାହ କୁ ଆଖି ଆଗରେ ରଖି ବସ ମାଲିକ ସଂଘ ତରଫରୁ ଆୟୋଜନ କରାଯାଇଥିବା ଏହି କାର୍ଯ୍ୟକ୍ରମକୁ ସବୁ ମହଲରୁ ପ୍ରଶଂସା କରାଯାଇଛି।