୨୫.୦୩ ଲକ୍ଷ ଟଙ୍କା ସରକାରୀ ପାଣ୍ଠି ଆତ୍ମସାତ୍ କରିବା ଅଭିଯୋଗରେ ଦୁଇଜଣ ବରିଷ୍ଠ କୃଷି ଅଧିକାରୀ ଗିରଫ  

କଟକ ୧୮/୧୧/୨୦୨୬(ଓଡ଼ିଶା ସମାଚାର) – ବାଲେଶ୍ୱରର ମୁଖ୍ୟ ଜିଲ୍ଲା କୃଷି ଅଧିକାରୀ (CDAO) ତଥା ପୂର୍ବତନ ଜିଲ୍ଲା କୃଷି ଅଧିକାରୀ (ଉଭୟ ଗ୍ରୁପ୍-ଏ ଅଧିକାରୀ) ଏବଂ ଏକ ସ୍ୱେଚ୍ଛାସେବୀ ସଂସ୍ଥା (NGO)ର କାର୍ଯ୍ୟନିର୍ବାହୀ ନିର୍ଦ୍ଦେଶକଙ୍କୁ CRFM ଯୋଜନା ଅଧୀନରେ ୨୫.୦୩ ଲକ୍ଷ ଟଙ୍କାର ସରକାରୀ ପାଣ୍ଠି ଆତ୍ମସାତ୍ କରିବା ଅଭିଯୋଗରେ ଗିରଫ କରାଯାଇଛି। ଭିଜିଲାନ୍ସ ନିର୍ଦ୍ଦେଶାଳୟ ଓଡିଶା, କଟକ  ଙ୍କ ସୂଚନା ଅନୁସାରେ ଆଜି, ଅର୍ଥାତ୍ ୧୮.୧୧.୨୦୨୬ ତାରିଖରେ, ଓଡ଼ିଶା ଭିଜିଲାନ୍ସ ବିଭାଗ ଦୁଇଜଣ ବରିଷ୍ଠ କୃଷି ଅଧିକାରୀ – ବାଲେଶ୍ୱରର ପୂର୍ବତନ ଜିଲ୍ଲା କୃଷି ଅଧିକାରୀ ସରୋଜ କୁମାର ଗିରି ଏବଂ ବର୍ତ୍ତମାନର ମୁଖ୍ୟ ଜିଲ୍ଲା କୃଷି ଅଧିକାରୀ ବିଶ୍ୱଜିତ ପଣ୍ଡାଙ୍କୁ ଗିରଫ କରିଛି। ଏହା ସହିତ, ‘ଶକ୍ତି ଶିଖା’ (Sakti Sikha) ନାମକ ଏକ ସ୍ୱେଚ୍ଛାସେବୀ ସଂସ୍ଥାର କାର୍ଯ୍ୟନିର୍ବାହୀ ନିର୍ଦ୍ଦେଶକ ତୁଷାରକାନ୍ତ ବେହେରାଙ୍କୁ ମଧ୍ୟ ଗିରଫ କରାଯାଇଛି।

CRFM (Comprehensive Rice Fallow Management) ଯୋଜନା ଅଧୀନରେ ୨୫.୦୩ ଲକ୍ଷ ଟଙ୍କାରୁ ଅଧିକ ସରକାରୀ ଅର୍ଥ ଆତ୍ମସାତ୍ କରିଥିବା ଅଭିଯୋଗରେ ସେମାନଙ୍କୁ ଗିରଫ କରାଯାଇ ବାଲେଶ୍ୱର ସ୍ଥିତ ଭିଜିଲାନ୍ସ ବିଭାଗର ସ୍ୱତନ୍ତ୍ର ବିଚାରପତିଙ୍କ ଅଦାଲତରେ ହାଜର କରାଯାଇଛି। ବାଲେଶ୍ୱର ଜିଲ୍ଲାରେ ‘କମ୍ପ୍ରିହେନସିଭ୍ ରାଇସ୍ ଫାଲୋ ମ୍ୟାନେଜମେଣ୍ଟ’ (CRFM) ଯୋଜନା ଅଧୀନରେ ମଞ୍ଜୁର ହୋଇଥିବା ସରକାରୀ ପାଣ୍ଠି ଆତ୍ମସାତ୍ କରାଯାଇଥିବା ନେଇ ଆସିଥିବା ଅଭିଯୋଗ ଆଧାରରେ ଓଡ଼ିଶା ଭିଜିଲାନ୍ସ ବିଭାଗ ଏହାର ତଦନ୍ତ ଆରମ୍ଭ କରିଥିଲା। ଓଡ଼ିଶା କୃଷି ଓ ଖାଦ୍ୟ ଉତ୍ପାଦନ ନିର୍ଦ୍ଦେଶାଳୟ ପକ୍ଷରୁ ବାଲେଶ୍ୱର ଜିଲ୍ଲାରେ CRFM ଯୋଜନା କାର୍ଯ୍ୟକାରୀ କରିବା ପାଇଁ ଲକ୍ଷ୍ୟ ଧାର୍ଯ୍ୟ କରାଯାଇଥିଲା, ଯେଉଁଥିରେ ୧୨,୦୦୦ ହେକ୍ଟର ଜମିରେ ମୁଗ (Green Gram) ଏବଂ ୩,୫୦୦ ହେକ୍ଟର ଜମିରେ ବିରି (Black Gram) ଚାଷ ଅନ୍ତର୍ଭୁକ୍ତ ଥିଲା।

ବ୍ୟାପକ ତଦନ୍ତରୁ ଜଣାପଡ଼ିଛି ଯେ, ମୟୂରଭଞ୍ଜ ଜିଲ୍ଲାର ବାରିପଦା ସ୍ଥିତ ‘ଶକ୍ତି ଶିଖା’ ଡେଭଲପମେଣ୍ଟ ସୋସାଇଟିକୁ ବାଲେଶ୍ୱର ଜିଲ୍ଲା ପାଇଁ ‘ପ୍ରଫେସନାଲ ଏଜେନ୍ସି’ (PA) ଭାବରେ ଚୟନ କରାଯାଇଥିଲା ଏବଂ ଏନେଇ ଏକ ଚୁକ୍ତିନାମା ମଧ୍ୟ ସ୍ୱାକ୍ଷରିତ ହୋଇଥିଲା। ଯୋଜନାର ନିର୍ଦ୍ଦେଶାବଳୀ ଅନୁଯାୟୀ, ହିତା ଅନୁସନ୍ଧାନରୁ ଜଣାପଡ଼ିଛି ଯେ, ସିଡିଏଓ (CDAO) ବିଶ୍ୱଜିତ ପଣ୍ଡା, ତତ୍କାଳୀନ ଏଡିଓ (ADO) ସରୋଜ କୁମାର ଗିରି ଏବଂ ‘ଶକ୍ତି ଶିଖା ଡେଭଲପମେଣ୍ଟ ସୋସାଇଟି’ (Sakti Sikha Development Society) ନାମକ ଏକ ଏନଜିଓ (NGO)ର କାର୍ଯ୍ୟନିର୍ବାହୀ ନିର୍ଦ୍ଦେଶକ ତୁଷାରକାନ୍ତ ବେହେରା ମିଳିତ ଭାବେ ଏକ ଷଡ଼ଯନ୍ତ୍ର ରଚିଥିଲେ। ସେମାନେ ଯୋଜନା ଅନୁଯାୟୀ ଆବଶ୍ୟକ ହେଉଥିବା କୌଣସି କ୍ଷେତ୍ରସ୍ତରୀୟ ଯାଞ୍ଚ କିମ୍ବା ପ୍ରମାଣପତ୍ର (field certification) ବିନା, ଏନଜିଓ ଦ୍ୱାରା ପ୍ରସ୍ତୁତ ମିଥ୍ୟା ବିଲ୍‌ଗୁଡ଼ିକୁ ଗ୍ରହଣ କରି ସରକାରୀ ପାଣ୍ଠିରୁ ମୋଟ ୨୫,୦୩,୨୪୯ ଟଙ୍କା ଆତ୍ମସାତ୍ କରିଛନ୍ତି। ଏହିପରି ଭାବେ, ଅଭିଯୁକ୍ତ ସରକାରୀ କର୍ମଚାରୀମାନେ ନିଜ ପଦବୀର ଅପବ୍ୟବହାର କରି ଏବଂ ଉକ୍ତ ଘରୋଇ ଏନଜିଓ ସହ ମିଶି ଏକ ଅପରାଧିକ ଷଡ଼ଯନ୍ତ୍ର ମାଧ୍ୟମରେ, ଅସାଧୁ ଉପାୟରେ ସରକାରୀ ପାଣ୍ଠିରୁ ୨୫,୦୩,୨୪୯ ଟଙ୍କା ଆତ୍ମସାତ୍ କରିଛନ୍ତି, ଯାହା ଫଳରେ ରାଜ୍ୟ ରାଜକୋଷର ଆର୍ଥିକ କ୍ଷତି ଘଟିଛି।

ଏହି ଘଟଣାରେ, ଓଡ଼ିଶା ଭିଜିଲାନ୍ସ ବିଭାଗ ପକ୍ଷରୁ ବାଲେଶ୍ୱର ଭିଜିଲାନ୍ସ ଥାନାରେ ଏକ ମାମଲା (କେସ୍ ନଂ. ୨୭/୨୦୨୬) ରୁଜୁ କରାଯାଇଛି। ଏହି ମାମଲାରେ ପୂର୍ବତନ କୃଷି ଜିଲ୍ଲା ଅଧିକାରୀ (ADO) ସରୋଜ କୁମାର ଗିରି, ବାଲେଶ୍ୱରର ମୁଖ୍ୟ ଜିଲ୍ଲା କୃଷି ଅଧିକାରୀ (CDAO) ବିଶ୍ୱଜିତ ପଣ୍ଡା ଏବଂ ଏନଜିଓ ‘ଶକ୍ତି ଶିଖା’ର କାର୍ଯ୍ୟନିର୍ବାହୀ ନିର୍ଦ୍ଦେଶକ ତୁଷାରକାନ୍ତ ବେହେରାଙ୍କୁ ଅଭିଯୁକ୍ତ କରାଯାଇଛି। ସେମାନଙ୍କ ବିରୋଧରେ ପିସି (ସଂଶୋଧନ) ଆଇନ, ୨୦୧୮ (PC Amendment Act, 2018) ର ଧାରା ୧୩(୨) ସହ ପଠନୀୟ ଧାରା ୧୩(୧)(a) ଏବଂ ବିଏନଏସ (BNS) ର ଧାରା ୩୧୬(୫)/୬୧(୨) ଅନୁଯାୟୀ ମାମଲା ରୁଜୁ ହୋଇଛି। ଏହି ମାମଲାର ତଦନ୍ତ ଜାରି ରହିଛି।

Leave a Reply

Your email address will not be published. Required fields are marked *