କଟକ, ୧୨/୦୮/୨୦୨୬ ( ଓଡିଶା ସମାଚାର / ଅଭୟ ଜେନା)କଟକ ଜିଲ୍ଲା ବାଙ୍କୀ ବ୍ଲକ ଆନନ୍ଦପୁର ସେବା ସମବାୟ ସମିତି (ଏସସିଏସ) ଏବଂ ପ୍ରାଥମିକ କୃଷି ସମବାୟ ସମିତି (ପ୍ୟାକ୍ସ) ର ପୂର୍ବତନ ସମ୍ପାଦକ ଶରତ କୁମାର ନାୟକଙ୍କୁ ଓଡ଼ିଶା ଭିଜିଲାନ୍ସ ମଙ୍ଗଳାବର ଗିରଫ କରିଛି। ସମିତିର ପ୍ରାୟ ୨୧ ଲକ୍ଷ ୨୮ ହଜାର ୫୮ ଟଙ୍କା ସରକାରୀ ପାଣ୍ଠି ହଡ଼ପ ଅଭିଯୋଗରେ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି।
ସୂଚନା ଅନୁଯାୟୀ, ଭିଜିଲାନ୍ସର ବ୍ୟାପକ ତଦନ୍ତରୁ ଜଣାପଡ଼ିଛି ଯେ, ଶ୍ରୀ ନାୟକ ସମିତିର ବିଭିନ୍ନ ଋଣଗ୍ରହିତା ସଦସ୍ୟମାନଙ୍କଠାରୁ ସିଧାସଳଖ ଋଣ ପରିଶୋଧ ଟଙ୍କା ଆଦାୟ କରୁଥିଲେ। ସେ ଦୈନିକ କାରବାର ଖାତା ବା ଡେ-ବୁକ୍ରେ ପ୍ରକୃତ ଆଦାୟ ରାଶି ଲିପିବଦ୍ଧ କରୁଥିଲେ ମଧ୍ୟ, ମୁଖ୍ୟ ଆକାଉଣ୍ଟିଂ ରେଜିଷ୍ଟରରେ ଚତୁରତାର ସହ ମୋଟ ଆଦାୟ ପରିମାଣକୁ କମ୍ କରି ଦେଖାଉଥିଲେ। ଏହିପରି ଜାଲିଆତି କରି ସେ ବାକି ୨୧ ଲକ୍ଷ ୨୮ ହଜାର ୫୮ ଟଙ୍କା ନିଜର ବ୍ୟକ୍ତିଗତ ସ୍ୱାର୍ଥ ପାଇଁ ହଡ଼ପ କରିନେଇଥିଲେ, ଯାହାଦ୍ୱାରା ସରକାରୀ ରାଜକୋଷର ବଡ଼ କ୍ଷତି ଘଟିଛି।
ଏହି ଆର୍ଥିକ ଅନିୟମିତତାକୁ ନେଇ କଟକ ଭିଜିଲାନ୍ସ ଥାନାରେ ଦୁର୍ନୀତି ନିବାରଣ ସଂଶୋଧନ ଅଧିନିୟମ, ୨୦୧୮ ର ଧାରା ୧୩(୨) ସହ ପଠିତ ଧାରା ୧୩(୧)(କ) ଏବଂ ଭାରତୀୟ ଦଣ୍ଡ ସଂହିତା (ଆଇପିସି) ର ଧାରା ୪୦୯ (ଅପରାଧିକ ବିଶ୍ୱାସଭଙ୍ଗ) ଓ ୪୬୭ (ମୂଲ୍ୟବାନ ପ୍ରତିଭୂତି ଜାଲିଆତି) ଅନ୍ତର୍ଗତ ମାମଲା ନଂ ୨୯, ତାରିଖ ୧୦.୦୮.୨୦୨୬ ରୁଜୁ କରାଯାଇଛି।
ଗିରଫ ପରେ ଅଭିଯୁକ୍ତ ଶରତ କୁମାର ନାୟକଙ୍କୁ କଟକ ସ୍ପେଶାଲ ଜଜ୍ ଭିଜିଲାନ୍ସ କୋର୍ଟକୁ ଚାଲାଣ କରାଯାଇଛି ଏବଂ ଏହି ଘଟଣାରେ ଅଧିକ ତଦନ୍ତ ଜାରି ରହିଛି ବୋଲି ଭିଜିଲାନ୍ସ ପକ୍ଷରୁ ସୂଚନା ଦିଆଯାଇଛି।
