ଗୋବରୀ ନଦୀ କୂଳ ଖାଉଥିବାରୁ ନଦୀକୂଳରେ ସୁରକ୍ଷା ପାଇଁ ପଥର ପ୍ୟାକିଂ କରାଯିବାକୁ ଜିଲାପାଳଙ୍କୁ ଦାବି

କେନ୍ଦ୍ରାପଡ଼ା, ୦୫/୦୨/୨୦୨୪ (ଓଡ଼ିଶା ସମାଚାର)- କେନ୍ଦ୍ରାପଡା ବ୍ଲକ ଅଧିନ କଂସାର ଗ୍ରାମପଂଚାୟତର ଫୋରଡ ଗ୍ରାମର କୈଳାସ ଚନ୍ଦ୍ର ଜେନା ଆଜି ଜନ ଅଭିଯୋଗ ଶୁଣାଣୀ ଶିବିରରେ ଜିଲାପାଳଙ୍କୁ ଭେଟି ଅଭିଯୋଗ କରିଛନ୍ତି ଯେ ଗୋବରୀ ନଦୀର କୂଳ ଖାଉଥିବା ଯୋଗୁଁ ତାଙ୍କ ବାସଗୃହଟି ନଦୀରେ ଭୁସୁଡି ପଡିବାକୁ ଯାଉଛି । ପୂର୍ବରୁ ପ୍ରାୟ ୧ଶହ ମିଟର ଦୂରରେ ଥିବା ତାଙ୍କ ବାସଗୃହ ଏବେ ମାତ୍ର ୧୦ମିଟର ଦୂରରେ ରହିଛି । ନଦୀରୁ ମାତ୍ର ୧୦ମିଟର ଦୂରରେ ଥିବା କୈଳାସଙ୍କ ବାସଗୃହଟି ଅତ୍ୟନ୍ତ ସଙ୍କଟାପନ୍ନ ଅବସ୍ଥାରେ ଥିବାରୁ ତୁରନ୍ତ ଆବଶ୍ୟକ ପଦକ୍ଷେପ ନେବାକୁ କୈଳାସ ଜିଲ୍ଲାପାଳଙ୍କୁ ନିବେଦନ କରିଛନ୍ତି । ଏହି ନଦୀର ପୂର୍ବ ପଟରେ ଥିବା କଳାମାଟିଆ ଗ୍ରାମ ନିକଟରେ ପଥର ପ୍ୟାକିଂ କରାଯାଇଥିବାରୁ ପାଣି ଜମାଟ ବାନ୍ଧି କୈଳାସଙ୍କ ଗୃହ ନିକଟ ନଦୀ କୂଳରେ ପାଣି ଜମାହୋଇ କୂଳଖାଇ ଅତଡା ଖସୁଛି । ଫଳରେ କୈଳାସଙ୍କ ବାସଗୃହଟି ଗୋବରୀ ନଦୀରେ ଲୀନ ହୋଇଯିବା ସହ ସେ ବାସହୀନ ହୋଇପଡିବେ ତେଣୁ ତୁରନ୍ତ ସେଠାରେ ପଥର ପ୍ୟାକିଂ କରାଯାଉ ବୋଲି ଅତ୍ୟନ୍ତ ଦୁଃଖର ସହ କୈଳାସ ଜିଲାପାଳଙ୍କୁ ନିବେଦନ କରିଛନ୍ତି ।