“ଶିକ୍ଷକ ମାନଙ୍କ ପାଇଁ ମୂଲ୍ୟବୋଧ ଭିତ୍ତିକ ଶିକ୍ଷା” ସମ୍ପର୍କିତ କାର୍ଯ୍ୟକ୍ରମ

ଶାନ୍ତିପୂର୍ଣ୍ଣ ଓ  ପ୍ରଗତିଶୀଳ ସମାଜ ଗଠନରେ ମୂଲ୍ୟବୋଧ ଭିତ୍ତିକ ଶିକ୍ଷାର ଭୂମିକା ଗୁରୁତ୍ଵପୂର୍ଣ୍ଣ – ରାଜ୍ୟପାଳ

ଭୁବନେଶ୍ୱର,୨୯/୦୩/୨୦୨୬ (ଓଡ଼ିଶା ସମାଚାର/ରଜତ ମହାପାତ୍ର)- ଶାନ୍ତିପୂର୍ଣ୍ଣ ଏବଂ ପ୍ରଗତିଶୀଳ ସମାଜ ଗଠନରେ ମୂଲ୍ୟବୋଧ ଭିତ୍ତିକ ଶିକ୍ଷାର ଭୂମିକା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବୋଲି ମାନ୍ୟବର ରାଜ୍ୟପାଳ ଡ. ହରି ଵାବୁ କମ୍ଭମପାଟି କହିଛନ୍ତି । ରବିବାର ଦିନ ଭୁବନେଶ୍ଵର ସ୍ଥିତ ରାମକୃଷ୍ଣ ମିଶନର ବିବେକାନନ୍ଦ ହଲ୍ ଠାରେ ଆୟୋଜିତ “ଶିକ୍ଷକ ମାନଙ୍କ ପାଇଁ ମୂଲ୍ୟବୋଧ ଭିତ୍ତିକ ଶିକ୍ଷା” ସମ୍ପର୍କିତ କାର୍ଯ୍ୟକ୍ରମକୁ ଉଦଘାଟନ କରି ରାଜ୍ୟପାଳ ଏହା କହିଛନ୍ତି । ଏହି କାର୍ଯ୍ୟକ୍ରମରେ ରାଜ୍ୟପାଳ ଉଦବୋଧନ ଦେଇ ଶିକ୍ଷକମାନଙ୍କର ଭୂମିକା ଉପରେ ଗୁରୁତ୍ୱାରୋପ କରିବା ସହିତ ଶିକ୍ଷକମାନନେ ଛାତ୍ରଛାତ୍ରୀମାନଙ୍କ ମଧ୍ୟରେ ଜ୍ଞାନ ସହିତ ଚରିତ୍ରକୁ ପୋଷଣ କରିବାକୁ ଆହ୍ୱାନ ଜଣାଇଛନ୍ତି।

ସ୍ୱାମୀ ବିବେକାନନ୍ଦଙ୍କ ବାଣୀ ଉଦ୍ଧୃତ କରି ରାଜ୍ୟପାଳ କହିଥିଲେ ଯେ ,ଶିକ୍ଷା କେବଳ ସୂଚନା ସଂଗ୍ରହ ନୁହେଁ ବରଂ ଆନ୍ତରିକ ପୂର୍ଣ୍ଣତା, ଶକ୍ତି ଏବଂ ଚରିତ୍ରର ପରିପ୍ରକାଶ। ଏହି କାର୍ଯ୍ୟକ୍ରମରେ ଅଂଶଗ୍ରହଣକାରୀମାନଙ୍କୁ ଶୁଭେଚ୍ଛା ଜଣାଇ ରାଜ୍ୟପାଳ ଶିକ୍ଷା, ସମାଜସେବା ଏବଂ ଆଧ୍ୟାତ୍ମିକ ଜାଗରଣରେ ରାମକୃଷ୍ଣ ମିଶନର ଉଲ୍ଲେଖନୀୟ ଅବଦାନ ପାଇଁ ପ୍ରଶଂସା କରିଥିଲେ। ରାମକୃଷ୍ଣ ପରମହଂସ ଏବଂ ସ୍ୱାମୀ ବିବେକାନନ୍ଦଙ୍କ ଆଦର୍ଶରେ ଅନୁପ୍ରାଣିତ ହୋଇ  ରାମକୃଷ୍ଣ ମିଶନ ନିରନ୍ତର ଏକ ସନ୍ତୁଳିତ ଶିକ୍ଷା ବ୍ୟବସ୍ଥାକୁ ପ୍ରୋତ୍ସାହିତ କରିଆସିଛି ଯାହା ବୌଦ୍ଧିକ, ନୈତିକ ଏବଂ ଆଧ୍ୟାତ୍ମିକ ଅଭିବୃଦ୍ଧିକୁ ସମନ୍ୱିତ କରିଥାଏ ବୋଲି କହିଥିଲେ ।

ଭାରତର ସମୃଦ୍ଧ ସଭ୍ୟତା ଉପରେ ଆଲୋକପାତ କରି ରାଜ୍ୟପାଳ ଉଲ୍ଲେଖ କରିଥିଲେ ଯେ, ଭାରତୀୟ ମୂଲ୍ୟବୋଧରେ ସତ୍ୟ, ଧର୍ମ, ଶାନ୍ତି, ପ୍ରେମ ଏବଂ ଅହିଂସା  ପ୍ରତିଫଳିତ। ଏଗୁଡ଼ିକ କେବଳ ଆଦର୍ଶ ନୁହେଁ ବରଂ ଦୈନନ୍ଦିନ ଜୀବନରେ ପାଳନ କରାଯିବା ପାଇଁ ଉଦ୍ଦିଷ୍ଟ।

ସଂଘର୍ଷ ଏବଂ ଅସ୍ଥିରତା ଦ୍ୱାରା ପ୍ରଭାବିତ ବର୍ତ୍ତମାନର ବିଶ୍ୱ ପରିସ୍ଥିତିକୁ ରାଜ୍ୟପାଳ ଉଲ୍ଲେଖ କରି ବୁଝାମଣା, ସହନଶୀଳତା ଏବଂ ଆଲୋଚନାକୁ ପ୍ରୋତ୍ସାହିତ କରିବାର ଜରୁରୀ ଆବଶ୍ୟକତା ଉପରେ ଗୁରୁତ୍ୱାରୋପ କରିଥିଲେ। ପୁଣି ରାଜ୍ୟପାଳ କହିଥିଲେ ଯେ ,ଶିକ୍ଷକମାନେ ମାର୍ଗଦର୍ଶକ ଏବଂ ରାଷ୍ଟ୍ର ନିର୍ମାତା ଭାବରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରନ୍ତି ଏବଂ ମାର୍ଗଦର୍ଶନ ଓ ଉଦାହରଣ ମାଧ୍ୟମରେ ଯୁବ ମନକୁ ଗଠନ କରନ୍ତି।

ଶିକ୍ଷକମାନେ ଛାତ୍ରଙ୍କୁ ଚିନ୍ତାରେ ନିର୍ଭୀକ, କାର୍ଯ୍ୟରେ ଦୟାଳୁ ଏବଂ ମାନବତାର ସେବା ପାଇଁ ପ୍ରତିବଦ୍ଧ ହେବା ପାଇଁ ମାର୍ଗଦର୍ଶନ କରିବାକୁ ଆହ୍ୱାନ ଜଣାଇଥିଲେ ଏବଂ କହିଥିଲେ ଯେ ଜଣେ ପରିବର୍ତ୍ତିତ ବ୍ୟକ୍ତି ମଧ୍ୟ ସାମାଜିକ ପରିବର୍ତ୍ତନରେ ଗୁରୁତ୍ୱପୂର୍ଣ୍ଣ ଯୋଗଦାନ ଦେଇପାରିବେ।

ରାଜ୍ୟପାଳ ଏହା ମଧ୍ୟ କହିଥିଲେ ଯେ, ମୂଲ୍ୟବୋଧ କେବଳ ପୁସ୍ତକରୁ ଶିକ୍ଷା ଦିଆଯିବା ଉଚିତ୍ ନୁହେଁ, ବରଂ ଦୈନନ୍ଦିନ ଜୀବନରେ ବଞ୍ଚିବା ଏବଂ ଅଭିଜ୍ଞତା ହାସଲ କରିବା ଉପରେ ଏହା ପର୍ଯ୍ୟବେଶିତ ହେବା ଉଚିତ୍। ଶିକ୍ଷକମାନେ ନିଜକୁ ଉନ୍ନତ କରିବା ପାଇଁ ଯତ୍ନବାନ ହେବାକୁ ରାଜ୍ୟପାଳ  ଉତ୍ସାହିତ କରିଵା ସହିତ କହିଥିଲେ ଯେ, ଅନୁଷ୍ଠାନଗୁଡ଼ିକ ଏପରି ଏକ ପରିବେଶ ସୃଷ୍ଟି କରିବା ଉଚିତ ଯାହା ନୀତି, ସାମାଜିକ ଦାୟିତ୍ୱ ଏବଂ ସେବା ମନୋଭାବକୁ ପ୍ରୋତ୍ସାହିତ କରିବ । ପ୍ରକୃତ ଜାତୀୟ ଶକ୍ତି କେବଳ ଆର୍ଥିକ ପ୍ରଗତିରେ ନୁହେଁ ବରଂ ଏହାର ନାଗରିକଙ୍କ ଚରିତ୍ରରେ ରହିଛି ବୋଲି ରାଜ୍ୟପାଳ  କହିଥିଲେ।

ଅନ୍ୟମାନଙ୍କ ମଧ୍ୟରେ, ରାମକୃଷ୍ଣ ମଠ ହାଇଦ୍ରାବାଦର ସମ୍ପାଦକ ସ୍ୱାମୀ ବୋଧମୟାନନ୍ଦ କାର୍ଯ୍ୟକ୍ରମରେ ଉଦବୋଧନ ଦେଇଥିଲେ। ରାମକୃଷ୍ଣ ମିଶନର ସମ୍ପାଦକ ସ୍ୱାମୀ ଆତ୍ମପ୍ରଭାନନ୍ଦ ସ୍ୱାଗତ ଭାଷଣ ଦେଇଥିବା ବେଳେ  ରାମକୃଷ୍ଣ ମିଶନର ସଭାପତି ଡ଼ା. ଚଣ୍ଡୀ ଦାସ ଧନ୍ୟବାଦ ଅର୍ପଣ କରିଥିଲେ ।

-0-

ସଂଜୀବ ବାରିକ,ଯୁଗ୍ମ ନିର୍ଦ୍ଦେଶକ ତଥା ରାଜ୍ୟପାଳଙ୍କ ଲୋକ ସଂପର୍କ ଅଧିକାରୀ ଙ୍କ ସୌଜନ୍ୟ ରୁ