ମାହାଙ୍ଗା,୨୬/୦୨/୨୦୨୬ (ଓଡିଶା ସମାଚାର /ଅଭୟ ଜେନା)-କୁହୁଣ୍ଡା ପଞ୍ଚାୟତ କଲ୍ୟାଣପୁର ଗୋପାଳ ସାହିରେ ସପ୍ତାହବ୍ୟାପୀ ଶ୍ରୀମଦ ଭାଗବତ ପାରାୟଣ ଉଦଯାପିତ ହୋଇଯାଇଛି । ଏହି ଅନିତ୍ୟ ସଂସାରରେ ଜୀବନ କ୍ଷଣସ୍ଥାୟୀ । ଲୋଭ ମୋହ,କାମ କ୍ରୋଧ, ହିଂସା ଓ ଅସୂୟାପଣକୁ ପରିହାର କରି, ଦୟା-କ୍ଷମା-ପ୍ରେମ ଓ ସଦଭାବନାକୁ ଜୀବନର ମହାମନ୍ତ୍ର ଭାବେ ଗ୍ରହଣ କରିବାକୁ ଭାଗବତ ଆମକୁ ଶିକ୍ଷା ଦେଇଥାଏ ।
ପ୍ରତିବର୍ଷ ଗ୍ରାମର ଭାଗବତ ଘରେ ଶ୍ରୀମଦ ଭାଗବତ ପାଠ କାର୍ଯ୍ୟକ୍ରମ ଆୟୋଜନ ହୋଇଥାଏ । ଗ୍ରାମର ପ୍ରତ୍ୟେକ ପରିବାର ଏହି ଆଧ୍ୟାତ୍ମିକ କାର୍ଯ୍ୟକ୍ରମରେ ସାମିଲ ହେବା 
ଦେଖିବାକୁ ମିଳେ । ଧର୍ମପ୍ରାଣ ଯୁଧିଷ୍ଠିର ପଲେଇଙ୍କ ତତ୍ୱାବଧାନରେ ଏହି ଭାଗବତ ସପ୍ତାହ ପ୍ରତିବର୍ଷ ଆୟୋଜିତ ହୁଏ । ଚଳିତ ବର୍ଷ ରଘୁନାଥ ପଲେଇ କର୍ତ୍ତା ଭାବେ ସଂକଳ୍ପରେ ବସିରହିଥିଲେ । ସେ ନୀତି ଓ ନିଷ୍ଠାର ସହିତ କାୟମନୋ ବାକ୍ୟରେ ପ୍ରଭୁଙ୍କ ସରଣରେ ରହୁଥିବା ବେଳେ, ଭଗବତ ଆଶ୍ରିତ ଭଗବାନ ପଲେଇ ଓ ଜଗନ୍ନାଥ ପଲେଇ ତାଙ୍କୁ ସହଯୋଗ କରନ୍ତି ।
ଏଠାରେ ପ୍ରତିଦିନ ବ୍ରାହ୍ମଣ, ପୁରୋହିତ ପୂଜାର୍ଚ୍ଚନା କରନ୍ତି । ବହୁ ଶ୍ରଦ୍ଧାଳୁ ଏବଂ ସଂକୀର୍ତ୍ତନ ପ୍ରେମୀ ଏହି ଭାଗବତ ପାରାୟଣ କାର୍ଯ୍ୟକ୍ରମରେ ସାମିଲ ହୋଇ ଏକ ଆଧ୍ୟାତ୍ମିକ ବାତାବରଣ ଭିତରେ ଏକତ୍ରିତ ହେବା ଦେଖିବାକୁ ମିଳେ । ଗ୍ରାମରେ ଶାନ୍ତି, ମୈତ୍ରୀ, ଭାଇଚାରା ଓ ଆଧ୍ୟାତ୍ମିକ ଭାବନା ସୃଷ୍ଟି କରିବାରେ ଏହି ଭାଗବତ ପାଠ ବଡ଼ ଭୂମିକା ନିର୍ବାହ କରିବା କୁହାଯାଏ । ତେବେ ଭାଗବତ ସପ୍ତାହର ଅନ୍ତିମ ଦିବସରେ ବହୁ ଭଗବତ ପ୍ରେମୀ ଏକାଠି ହୋଇଥିଲେ । ହରି ହାଟରେ ପ୍ରସାଦ ସେବନ କରି ଆନନ୍ଦ ମନରେ ଗୃହକୁ ପ୍ରତ୍ୟାବର୍ତ୍ତନ କରିଥିଲେ ।
