କେନ୍ଦ୍ରାପଡ଼ା, ୧୪/୦୫/୨୦୨୫(ଓଡ଼ିଶା ସମାଚାର)- ନିଖିଳ ଓଡିଶା ଆଶାକର୍ମୀ ସଂଘ ପକ୍ଷରୁ ମାସିକ ପ୍ରାପ୍ୟ ପ୍ରଦାନରେ ବିଳମ୍ବ ନେଇ ବୁଧବାର ଜିଲା ମୁଖ୍ୟ ଚିକିତ୍ସା ଅଧିକାରୀଙ୍କୁ ଏକ ଦାବିପତ୍ର ପ୍ରଦାନ କରାଯାଇଛି । ସେହି ଦାବିପତ୍ରରେ ଉଲ୍ଲେଖ ରହିଛି ଯେ ଜିଲାର ଇନ୍ଦୁପୁର ଗୋଷ୍ଠି ସ୍ୱାସ୍ଥ୍ୟକେନ୍ଦ୍ର (ସିଏଚସି) ସମେତ ଅନ୍ୟ ସମସ୍ତ ସ୍ୱାସ୍ଥ୍ୟକେନ୍ଦ୍ରର ଆଶାକର୍ମୀମାନେ ମାସିକ ଯେଉଁ ଜତ୍ କିଂଚିିତ ପ୍ରାପ୍ୟ ପାଇଥାନ୍ତି ତାହା ପ୍ରତିମାସର ପ୍ରଥମ ସପ୍ତାହରେ ଦିଆଯିବା କଥା ।
ଏନେଇ ସଂଗଠନ ପକ୍ଷରୁ ବାରମ୍ବାର ଦାବି ଓ ଆନ୍ଦୋଳନ କରାଯିବା ପରେ ଏହା ଜିଲା ବ୍ୟାପି କାର୍ଯ୍ୟକାରୀ କରାଯାଇଥିଲା । କିନ୍ତୁ ଦୀର୍ଘ ୭ମାସ ଧରି ସେମାନଙ୍କୁ ମାସିକ ପ୍ରାପ୍ୟ ମାସର ପ୍ରଥମ ସପ୍ତାହରେ ଦିଆଯାଉନାହିଁ । ଯାଦ୍ୱାରାକି ଦରଦାମ ବୃଦ୍ଧି ଦୁନିଆରେ ଆଶାକର୍ମୀମାନେ ସେମାନଙ୍କ ପରିବାର ଚଲାଇବା କଷ୍ଟକର ହୋଇପଡୁଛି । ଫଳରେ ସେମାନେ ହତୋତ୍ସାହିତ ହୋଇ ପଡୁଥିବା ଦର୍ଶାଇଛନ୍ତି ।
ଏସଂପର୍କରେ ସଂଘ ପକ୍ଷରୁ ଅପ୍ରେଲମାସ ୨୫ତାରିଖରେ ଇନ୍ଦୁପୁର ମେଡିକାଲ ଅଫିସରଙ୍କୁ ଜଣାଇଥିଲେ । ମାତ୍ର ଅଦ୍ୟାବଧି ଇନ୍ଦୁପୁର ଗୋଷ୍ଠି ସ୍ୱାସ୍ଥ୍ୟକେନ୍ଦ୍ରର ଆଶାକର୍ମୀମାନେ ୩ମାସର ପ୍ରାପ୍ୟ ପାଇନଥିବା ଅଭିଯୋଗ କରିଛନ୍ତି । ଆସନ୍ତା ୧୭ତାରିଖ ସୁଦ୍ଧା ସେମାନେ ଏହି ବକେୟା ପ୍ରାପ୍ୟ ନପାଇଲେ ଇନ୍ଦୁପୁର ଗୋଷ୍ଠି ସ୍ୱ୍ୱାସ୍ଥ୍ୟକେନ୍ଦ୍ର ସମ୍ମୁଖରେ ପିଲାଛୁଆଙ୍କ ସହ ଧାରଣା ଦେବେ ବୋଲି ଚେତାବନୀ ଦେଇଛନ୍ତି । ସଂଘ ପକ୍ଷରୁ ଜିଲା ମୁଖ୍ୟ ଚିକିତ୍ସାଧିକାରୀଙ୍କୁ ଦାବିପତ୍ର ପ୍ରଦାନ ସମୟରେ ଜିଲା ସଭାପତି ବିକାଶ ଚନ୍ଦ୍ର ବେଉରା, ଜିଲା ସମ୍ପାଦିକା କାନ୍ତିପ୍ରଭା ନାୟକ, ଇନ୍ଦୁପୁର ସିଏଚସି ସମ୍ପାଦିକା ନନ୍ଦିନୀ ସ୍ୱାଇଁ, ସଂଯୁକ୍ତା ରାଉତ, ଏଆଇଟିୟୁସି ନେତା ରମଣୀରଞ୍ଜନ ରାଉତରାୟ ପ୍ରମୁଖ ଉପସ୍ଥିତ ଥିଲେ ।
