କେଶରୀ କୁଣ୍ଡରେ ଗାଧୋଉ ଥିବା ବେଳେ ଦୁଇ ଜଣ ଛାତ୍ରଙ୍କ ମୃତ୍ୟୁ

ଚମ୍ପୁଆ,୧୮/୦୪/୨୦୨୫ (ଓଡ଼ିଶା ସମାଚାର)- କେନ୍ଦୁଝର ଜିଲ୍ଲା ସରେଇ ବୈତରଣୀ ନଦୀର କେଶରୀ କୁଣ୍ଡରେ ଆଜି ଏକ ଅଘଟଣ ଘଟିଛି। ଏଠାରେ କିଛି ଛାତ୍ର ଉତ୍ସାହିତ ହୋଇ ଗାଧୋଉ ଥିବା ବେଳେ ସେଥିରୁ ଦୁଇ ଜଣଙ୍କର ମୃତ୍ୟୁ ଘଟିଛି। ମୃତ ଛାତ୍ର ଦ୍ବୟ ହେଲେ ନିତେଶ ପୋଦ୍ଦାର ଓ ପ୍ରୀତମ ମହାନ୍ତ। ମୣତକ ମଧ୍ୟରୁ ଜଣେ ଚମ୍ପୁଆସ୍ଥିତ ଏକ ଘରୋଇ ଇଂରାଜୀ ମିଡିୟମ ବିଦ୍ୟାଳୟର ଦଶମ ଶ୍ରେଣୀ ଛାତ୍ର ବୋଲି ଜଣାପଡ଼ିଛି।
ସୂଚନା ଅନୁସାରେ କେନ୍ଦୁଝର ଜିଲ୍ଲା ଚମ୍ପୁଆ ଅଞ୍ଚଳର ସରେଇ ବୈତରଣୀ ନଦୀର କେଶରୀକୁଣ୍ଡକୁ ଆଜି ଅପରାହ୍ନରେ ଆଠ ଜଣ ଛାତ୍ର ସାଙ୍ଗହୋଇ ଗାଧେଇବାକୁ ଯାଇଥିଲେ। ସେମାନେ ଉତ୍ସାହିତ ହୋଇ ଗାଧୋଇବା ସମୟରେ ଅଘଟଣର ଶିକାର ହୋଇଥିଲେ। ଛାତ୍ରମାନଙ୍କ ମଧ୍ୟରୁ ନିତେଶ ଓ ପ୍ରୀତମଙ୍କ ସହିତ ତିନି ଜଣ ହଠାତ୍ ଭାସି ଯାଇଥିଲେ।
ତେବେ ଅନ୍ୟମାନେ ଜଣକୁ ଉଦ୍ଧାର କରିଥିବା ବେଳେ ଦୁଇ ଜଣ ଭାସି ଯାଇଥିଲେ । ୫ଜଣଙ୍କର ଅପାର ଉଦ୍ୟମ ଯୋଗୁଁ ନିତେଶ ଓ ପ୍ରୀତମଙ୍କୁ ଉଦ୍ଧାର କରାଯାଇ ପାରିଥିଲା। ପରେ ଦୁଇ ଜଣଙ୍କୁ ଚମ୍ପୁଆ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିଲା। ସେଠାରେ ସେମାନଙ୍କୁ ଡାକ୍ତର ମୃତ ଘୋଷଣା କରିଥିଲେ।