ଭୁବନେଶ୍ୱର, ୨୮/୦୨/୨୦୨୪ (ଓଡ଼ିଶା ସମାଚାର)- ସାଧାରଣ ନିର୍ବାଚନ ପୂର୍ବରୁ ୩ ଜିଲ୍ଲାର ଜିଲ୍ଲାପାଳ ବଦଳିଲେ । ବୁଧବାର ରାଜ୍ୟ ସରକାର ଆଇଏଏସ୍ ସ୍ତରରେ ଏକ ଛୋଟ ଧରଣର ଅଦଳବଦଳ କରିଛନ୍ତି । ସାଧାରଣ ପ୍ରଶାସନ ବିଭାଗ ତରଫରୁ ପ୍ରକାଶ ପାଇଥିବା ବିଜ୍ଞପ୍ତି ଅନୁସାରେ ବାଲେଶ୍ୱର, ମୟୂରଭଞ୍ଜ ଏବଂ ପୁରୀ ଜିଲ୍ଲାର ଜିଲ୍ଲାପାଳଙ୍କୁ ବଦଳି କରାଯାଇଛି ।
କଟକ ସିଏମସି କମିସନର ଥିବା ସିଦ୍ଧାର୍ଥ ଶେଖର ସ୍ୱାଇଁ ପୁରୀ ଜିଲାପାଳ, ମୟୂରଭଞ୍ଜ ଜିଲାପାଳ ଆଶିଷ ଠକରେ ବାଲେଶ୍ୱର ଜିଲାପାଳ ହୋଇଥିବା ବେଳେ ବାଲେଶ୍ୱର ଜିଲାପାଳ ଦତ୍ତାତ୍ରେୟ ଭାଉସାହେବ ସିନ୍ଦେ ମୟୂରଭଞ୍ଜ ଜିଲାପାଳ ହୋଇଛନ୍ତି । ସେହିପରି ପୁରୀ ଜିଲାପାଳ ଥିବା ବିଜୟ କୁମାର ଦାସଙ୍କୁ ସିଏମସି (କଟକ ମହାନଗର ନିଗମ) କମିଶନର ଭାବେ ବଦଳି କରାଯାଇଛି ।ଏଥି ସହିତ ସେ କଟକ ଉନ୍ନୟନ ପରିଷଦ(ସିଡିଏ)ର ଉପାଧ୍ୟକ୍ଷ ଭାବେ ଅତିରିକ୍ତ ଦାୟିତ୍ବ ତୁଲାଇବେ।
