ଭୁଜାଲିରେ ହାଣି ସୁନା ଚେନ ଲୁଟିନେଲେ ଦୃବୁତ

ନିମାପଡ଼ା, ୧୪/୦୨/୨୦୨୪ (ଓଡ଼ିଶା ସମାଚାର)-ନିକଟସ୍ଥ ଜଇନାବାଦ ଗ୍ରାମର ଅଳଙ୍କାର ବ୍ୟବସାୟୀ ହୃଷିକେଶ ସାହୁଙ୍କୁ ଏକ ଧାରୁଆ ଅସ୍ତ୍ରରେ ଆକ୍ରମଣ କରି ଦୁର୍ବୁତ୍ତ ମାନେ ଦେଢ଼ ଭରି ଓଜନର ସୁନା ଚେନ ଲୁଟି ନେଇଥିବା ଥାନାରେ ଅଭିଯୋଗ ହୋଇଛି । ଘଟଣାରୁ ପ୍ରକାଶ ବୁଧବାର ସନ୍ଧ୍ୟା ସମୟରେ ନୂଆ ବସଷ୍ଟାଣ୍ଡ ନିକଟରେ ହୃଷିକେଶ ଠିଆ ହୋଇଥିବା ସମୟରେ ଏଭଳି ଘଟଣା ଘଟିଛି । ୨ ଜଣ ଯୁବକ ଏକ ପଲସର ମୋଟର ସାଇକେଲେରେ ଆସି ହୃଷିକେଶ ବେକରୁ ଚେନ ଝାମ୍ପିନେବାକୁ ଉଦ୍ୟମ କରିଥିଲେ । ସିଏ ପ୍ରତିବାଦ କରିବାରୁ ଦୃବୁତମାନେ ଧାରୁଆ ଅସ୍ତ୍ରରେ ତାଙ୍କ ହାତକୁ ଚୋଟ ମାରି ଚେନ ଚିଣ୍ଡାଇ ସଙ୍ଗରେ ନେଇ ଘଟଣା ସ୍ଥଳରୁ ଦ୍ରୁତ ଗତିରେ ଚମ୍ପଟ ମାରିଥିଲେ । ଘଟଣା ସମ୍ପର୍କରେ ଅଭିଯୋଗ ପାଇ ପୁଲିସ ଅଭିଯୁକ୍ତ ମାନଙ୍କୁ ଧରିବା ପାଇଁ ବିଭିର୍ଣ୍ଣ ସ୍ଥାନରେ ଚଢ଼ାଉ ଆରମ୍ଭ କରିଛି । ହୃଷିକେଶ ବର୍ତ୍ତମାନ ନିମାପଡା ସ୍ୱାସ୍ଥ୍ୟ କେନ୍ଦ୍ରରେ ଭର୍ତି ହୋଇଛନ୍ତି ।