ରାୟଗଡ଼,୧୬/୦୭/୨୦୨୬ (ଓଡ଼ିଶା ସମାଚାର)-ମେରା ଯୁବ ଭାରତ, ରାୟଗଡ଼ ପକ୍ଷରୁ ଜିଲା ପରାମର୍ଶଦାତା କମିଟି ବୈଠକ ଅତିରିକ୍ତ ଜିଲାପାଳ (ସାଧାରଣ) ଶ୍ରୀ ନବୀନ ନାୟକଙ୍କ ଅଧ୍ୟକ୍ଷତାରେ ଜିଲାପାଳ କାର୍ଯ୍ୟାଳୟ ସ୍ଥିତ ସଦଭାବନା ଗୃହ ଠାରେ ଅନୁଷ୍ଠିତ ହୋଇଯାଇଛି । ବୈଠକରେ ମେରା ଯୁବ ଭାରତର ବିଭିନ୍ନ ଯୁବ ବିକାଶମୂଳକ କାର୍ଯ୍ୟକ୍ରମ ସମ୍ପର୍କରେ ସମ୍ୟକ୍ ଆଲୋଚନା କରାଯାଇଥିଲା । ଏହି ଅବସରରେ ଆଗାମୀ ସ୍ୱତନ୍ତ୍ର ସଚେତନତା ଓ ପଞ୍ଜୀକରଣ ଅଭିଯାନର ପୋଷ୍ଟର ଉନ୍ମୋଚନ କରାଯାଇ ଜିଲାବ୍ୟାପୀ ଯୁବ ସଂଯୋଗ ଅଭିଯାନର ଶୁଭାରମ୍ଭ କରାଯାଇଥିଲା । ବୈଠକରେ “ଭାରତ ପାଇଁ ସ୍ୱେଚ୍ଛାସେବକ” କାର୍ଯ୍ୟକ୍ରମ, ଅନୁଭୂତିଭିତିକ ଶିକ୍ଷଣ କାର୍ଯ୍ୟକ୍ରମ, ଯୁବ ବିନିମୟ କାର୍ଯ୍ୟକ୍ରମ, ବିକଶିତ ସଜୀବ ଗ୍ରାମ କାର୍ଯ୍ୟକ୍ରମ, ବିକଶିତ ଭାରତ ଯୁବ ନେତୃତ୍ୱ ଆଲୋଚନା, ଯୁବ କ୍ଲବ ଗଠନ ଓ କ୍ଲବଗୁଡ଼ିକୁ ଆବଶ୍ୟକ ସହଯୋଗ ପ୍ରଦାନ ଆଦି କାର୍ଯ୍ୟକ୍ରମର ସଫଳ ରୂପାୟନ ଉପରେ ବିଶେଷ ଗୁରୁତ୍ୱ ଦିଆଯାଇଥିଲା । ଏହା ସହିତ ଜିଲାସ୍ତରରେ କ୍ରୀଡ଼ା, ସାଂସ୍କୃତିକ, ତଥା ବିଭିନ୍ନ ଦକ୍ଷତା-ଆଧାରିତ ପ୍ରତିଯୋଗିତା ଆୟୋଜନ କରି ପ୍ରତିଭାବାନ ଯୁବକ ଓ ଯୁବତୀମାନଙ୍କୁ ଜାତୀୟ ସ୍ତରର ପ୍ରତିଯୋଗିତା ପାଇଁ ଚୟନ କରିବା ସମ୍ପର୍କରେ ମଧ୍ୟ ଆଲୋଚନା କରାଯାଇଥିଲା । ଅତିରିକ୍ତ ଜିଲାପାଳ ଶ୍ରୀ ନବୀନ ନାୟକ ଜିଲାରେ ମେରା ଯୁବ ଭାରତରେ ଯୁବକ ଓ ଯୁବତୀଙ୍କ ପଞ୍ଜୀକରଣକୁ ଅଭିଯାନ ଭିତିିକ (କ୍ୟାମ୍ପେନ୍ ମୋଡ୍) ଭାବେ ତ୍ୱରାନ୍ୱିତ କରିବାକୁ ସମସ୍ତ ସମ୍ପୃକ୍ତ ବିଭାଗକୁ ନିର୍ଦେଶ ଦେଇଥିଲେ । ସେହିପରି ଜିଲାର ଯୁବମାନଙ୍କୁ ବିଭିନ୍ନ ବିକାଶମୂଳକ କାର୍ଯ୍ୟକ୍ରମ ସହ ଅଧିକ ସକ୍ରିୟ ଭାବେ ସଂଯୁକ୍ତ କରିବା ପାଇଁ ଏକ ଜିଲା ଯୁବ କମିଟି ଗଠନ କରିବାକୁ ମଧ୍ୟ ପରାମର୍ଶ ଦେଇଥିଲେ । ବୈଠକରେ ଜିଲାର ସମସ୍ତ ଯୁବକ ଓ ଯୁବତୀଙ୍କୁ ମେରା ଯୁବ ଭାରତ ସହ ଯୋଡ଼ି ହୋଇ ରାଷ୍ଟ୍ର ନିର୍ମାଣରେ ସକ୍ରିୟ ସହଭାଗୀ ହେବାକୁ ଆହ୍ୱାନ କରାଯାଇଥିଲା । ମେରା ଯୁବ ଭାରତ ସମ୍ପର୍କରେ ଅଧିକ ସୂଚନା ଓ ପଞ୍ଜୀକରଣ ପାଇଁ mybharat.gov.in ପରିଦର୍ଶନ କରିବାକୁ ଅନୁରୋଧ କରାଯାଇଛି । ସମ୍ୱାଦ ବିଜ୍ଞପ୍ତି ସହ ୱେବସାଇଟ୍ ର କ୍ୟୁଆର୍ କୋଡ୍ ସଂଯୋଜନ କରାଯିବ, ଯାହାଦ୍ୱାରା ଯୁବମାନେ ସହଜରେ ପଞ୍ଜୀକରଣ କରିପାରିବେ । ବୈଠକରେ ଅତିରିକ୍ତ କାର୍ଯ୍ୟନିର୍ବାହୀ ଅଧିକାରୀ କ୍ଷୀରାବ୍ଦୀ ତନୟା ସାହୁ, ଜିଲା ଯୁବ ଅଧିକାରୀ ଶ୍ରୀ ଭି କିଶୋର, ଭାରପ୍ରାପ୍ତ ଜିଲା ସୂଚନା ଓ ଲୋକ ସମ୍ପର୍କ ଅଧିକାରୀ ଶ୍ରୀ ଦେବରାଜ ଟାକ୍ରୀ, ଭାରପ୍ରାପ୍ତ ଜିଲା ଶିକ୍ଷା ଅଧିକାରୀ ଶ୍ରୀ ଭଜନଲାଲ ମାଝୀ, ଜିଲ୍ଲା ସମାଜ ମଙ୍ଗଳ ଅଧିକାରୀ ଶ୍ରୀ ମିନତୀ ଦେଓ, ଜିଲା ନିୟୋଜନ ଅଧିକାରୀ ସୁଶ୍ରୀ ସ୍ୱର୍ଣ ରାଉତ, ଦକ୍ଷତା ବିକାଶ ଅଧିକାରୀ, ଘଉଉ, ଘଝଝ ପ୍ରମୁଖ ଉପସ୍ଥିତ ଥିଲେ ।
