ଶ୍ରୋତାଙ୍କୁ ଛୁଇଁଲା ପ୍ରଜ୍ଞାଙ୍କ ଗୀତ
ଭୁବନେଶ୍ୱର, ୦୫/୦୨/୨୦୨୪ (ଓଡ଼ିଶା ସମାଚାର/ରଜତ ମହାପାତ୍ର)- କ୍ୟା ହୁଆ ତେରା ୱାଦା ….। ଏହି ଗୀତ ଶୁଣି ଶ୍ରୋତା ଜାଣି ଯାଇଥିଲେ ମଞ୍ଚରେ କିଏ ଗୀତ ଗାଉଛନ୍ତି। ୨୦୧୪ରେ ଖୁବ୍ ଆଦର ଲାଭ କରିଥିବା ଏହି ଗୀତକୁ ସନମ୍ ପୁରୀ ଓ ତାଙ୍କ ସାଥୀ କଳାକାର ମାନେ ଏକ ଭିନ୍ନ ଢ଼ଙ୍ଗରେ ପରିବେଷଣ କରିଥିଲେ। ଏହା ପରେ ସନମଙ୍କ ଗୀତରେ ସମସ୍ତେ ସାଜିଥିଲେ ଜଣେ ଜଣେ ପ୍ରଶଂସକ। ସୋମବାର ବିଡ଼ିଏ ପକ୍ଷରୁ ଆୟୋଜିତ ଏକାମ୍ର ଉତ୍ସବର ସନ୍ଧ୍ୟାର କାର୍ଯ୍ୟକ୍ରମ ସଂଗୀତର ମୂର୍ଚ୍ଛନାର ତୃତୀୟ ସନ୍ଧ୍ୟାରେ
ସନମ ପୁରୀ ଲାଇଭ ବ୍ୟାଣ୍ଡର ପ୍ରଦର୍ଶନ ଦେଖିବାକୁ ମିଳିଥିଲା। ସନମ୍ ଙ୍କୁ ଲାଇଭ ଦେଖିବା ପାଇଁ ଦର୍ଶକଙ୍କ ସଂଖ୍ୟା ଖୁବ୍ ବେଶୀ ଥିଲା। ପ୍ରାୟ ୩ରୁ ୪ ହଜାର ଶ୍ରୋତା ଉପସ୍ଥିତ ଥିଲେ ତାଙ୍କୁ ଶୁଣିବାକୁ। ଗୁଲାବି ଆଖେଁ ଜୋ ତେରୀ ଦେଖି, ହେ ଆପନା ଦିଲ ତୋ ଆୱାରା, ଲଗ୍ ଯା ଗଲେ, ୟେ ରାତେଁ ୟେ ମୋସମ୍ ନଦୀକା କିନାରା ଚଞ୍ଚଲ୍ ହାୱା, ଲିଖେ ଜୋ ଖତ୍ ତୁଝେ, ମେରେ ସାମ୍ନେ ୱାଲି ଖିଡକି ପେ, ଅପକି ନଜରୋ ନେ ସମଝା…ଭଳି ସୁନ୍ଦର ସୁନ୍ଦର୍ ଗୀତ ଗାଇ ଶ୍ରୋତାଙ୍କ ହୃଦୟ ଜିତିଥିଲେ। ସନମ୍ ଓ ତାଙ୍କ ବ୍ୟାଣ୍ଡ ର ପ୍ରଦର୍ଶନ ଖୁବ୍ ଉଚ୍ଚକୋଟୀର ଥିଲା। ତାଙ୍କ ଟିମରେ ସମର୍ ପୁରୀ, ଭେଙ୍କି ଏସ୍, କେଶବ ଧନରାଜ ଥିଲେ।
ଅନ୍ୟ ପକ୍ଷରେ ଓଡ଼ିଆ କଣ୍ଠଶିଳ୍ପୀ ପ୍ରଜ୍ଞା ହୋତାଙ୍କ ସୁରିଲା କଣ୍ଠରେ ସଙ୍ଗୀତ ସବୁ ଦର୍ଶଙ୍କଙ୍କୁ ବେଶ୍ ଛୁଇଁଥିଲା। ମୁହାଁ ମୁହିଁ ଦେଖା ହେଲେ, ଓରେ ଦିଲନସି, ତୋର ମୋର ଏ ପ୍ରେମ କାହାଣୀ, ତୋ କଥା ମନେ ପଡୁଛି, ହେଲା ହେଲା ପ୍ରେମ ମୋତେ, ଭଲ ଲାଗୁଛୁ ତୁ ଭଳି ସୁନ୍ଦର ସୁନ୍ଦର ଓଡ଼ିଆ ଗୀତ ଗାଇଥିଲେ। ସନ୍ଧ୍ୟାରେ ମହିଳା ଓ ଶିଶୁ ବିକାଶ ମନ୍ତ୍ରୀ ବାସନ୍ତୀ ହେମ୍ବ୍ରମ ଅତିଥି ଭାବେ ଯୋଗଦେଇଥିଲେ ।