ସ୍ପୋର୍ଟସ୍ ହଷ୍ଟେଲକୁ ହରାଇ ତାରିଣୀ କ୍ଲବ ବିଜୟୀ
ଭୁବନେଶ୍ୱର,୨୬/୧୦/୨୦୨୫ (ଓଡ଼ିଶା ସମାଚାର)- ସିଟି କ୍ଲବ, ନୟାପଲ୍ଲୀ ଭୁବନେଶ୍ୱର ଆନୁକୂଲ୍ୟରେ ଏବଂ ରାଜ୍ୟ କ୍ରୀଡ଼ା ବିଭାଗର ସହଯୋଗରେ ଭୁବନେଶ୍ୱର ଫୁଟବଲ ଏକାଡ଼େମୀ ପଡ଼ିଆରେ ଚାଲିଥିବା ତୃତୀୟ ନନ୍ଦକିଶୋର ପଟ୍ଟନାୟକ ସ୍ମାରକୀ ମହିଳା ଫୁଟବଲ ଟୁର୍ଣ୍ଣାମେଂଟ ରବିବାର ଦ୍ୱିତୀୟ ଦିବସ ମ୍ୟାଚ୍ ରେ ସ୍ପୋର୍ଟସ୍ ହଷ୍ଟେଲ ଭୁବନେଶ୍ୱର ଏବଂ ତାରିଣୀ କ୍ଲବ, କେନ୍ଦୁଝର ମଧ୍ୟରେ ମୁକାବିଲା ହୋଇଥିଲା । ଏହି ମ୍ୟାଚ୍ରେ ତାରିଣୀ କ୍ଲବ ୫-୪ ଗୋଲ୍ ରେ ସ୍ପୋର୍ଟସ୍ ହଷ୍ଟେଲକୁ ପରାସ୍ତ କରିଥିଲା ।
ତାରିଣୀ କ୍ଲବର ୫ଜଣ ଖେଳାଳି ଗୋଟିଏ ଲେଖାଏଁ ଗୋଲ ଦେଇଥିବା ବେଳେ ସ୍ପୋର୍ଟସ ହଷ୍ଟେଲର ୪ଜଣ ଖେଳାଳି ଗୋଟିଏ ଲେଖାଏଁ ଗୋଲ ଦେଇଥିଲେ । ଉକ୍ତ ମ୍ୟାଚ୍ରେ ତାରିଣୀ କ୍ଲବର ରାଣୀ ବାଗଙ୍କୁ ପ୍ଲେୟାର ଅଫ୍ ଦି ମ୍ୟାଚ୍ ବିବେଚନା କରାଯାଇଥିଲା । ଶେଖାବତ ଅଲ୍ଲୀ ଖାନ, ସୁଜିତ କୁମାର ପାତ୍ର, ଶିବ ପ୍ରସାଦ ସାମନ୍ତରାୟ ଏବଂ ଶୋଭାଲିନ ପଣ୍ଡା ମ୍ୟାଚ୍ ପରିଚାଳନା କରିଥିବା ବେଳେ ଶ୍ରୀ ଶିବଶଙ୍କର ପଣ୍ଡା ମ୍ୟାଚ୍ କମିଶନର ଥିଲେ ।
ଏହି ମ୍ୟାଚ୍ ରେ ଓଡ଼ିଶାର ପୂର୍ବତନ ଆନ୍ତର୍ଜାତୀୟ ଫୁଟବଲ ଖେଳାଳି ରଞ୍ଜିତା ମହାନ୍ତି ଅତିଥି ଭାବେ ଯୋଗ ଦେଇଥିଲେ ଏବଂ ତାଙ୍କ ସହିତ ଗୀତାଞ୍ଜଳି ଖୁଂଟିଆ, ଗାୟତ୍ରୀ ମଲ୍ଲିକ ମଧ୍ୟ ଉପସ୍ଥିତ ଥିଲେ । ଶେଷର ରଞ୍ଜିତା ମହାନ୍ତି ପ୍ଲେୟାର ଅଫ୍ ଦି ମ୍ୟାଚ୍ ଙ୍କୁ ପୁରସ୍କୃତ କରିଥିବା ବେଳେ ସିଟି କ୍ଲବର ସମ୍ପାଦକ ଶ୍ରୀଯୁକ୍ତ ପ୍ରଦୀପ କୁମାର ରାଉତରାୟ ଧନ୍ୟବାଦ ଅର୍ପଣ କରିଥିଲେ । ଅନ୍ୟମାନଙ୍କ ମଧ୍ୟରେ ମହେନ୍ଦ୍ରନାଥ ନାୟକ, ବନୋଜ କୁମାର ପ୍ରଧାନ, ତିଳୋତମା ଦଳେଇ, ଦୀପକ କୁମାର ରାଉତରାୟ ପ୍ରମୁଖ ସହଯୋଗ କରିଥିଲେ । ରାଜ୍ୟ କ୍ରୀଡ଼ା ବିଭାଗ ସମସ୍ତ ପ୍ରକାର ସହଯୋଗ ପ୍ରଦାନ କରିଥିଲେ ।
