ଯାଜପୁର, ୧୮/୧୧/୨୦୨୩ (ଓଡ଼ିଶା ସମାଚାର)- ଆଜି ପୂର୍ବାହ୍ନରେ ଜିଲା ସଦର ମହକୁମା ସନ୍ନିକଟ ସୁନ୍ଦରପୁର ଠାରେ ଥିବା ସହକାରୀ ନିବନ୍ଧକ, ସମବାୟ ସମିତି ସମୁହ, ଯାଜପୁର ମଣ୍ଡଳ, ଯାଜପୁରଙ୍କ କାର୍ଯ୍ୟାଳୟ ପରିସରରେ ଜିଲା ପ୍ରଶାସନ, ଯାଜପୁର ଓ ସମବାୟ ବିଭାଗ, ଓଡିଶା ସରକାରଙ୍କ ମିଳିତ ଆନୁକୂଲ୍ୟରେ ୭୦ତମ ନିଖିଳ ଭାରତ ସମବାୟ ସପ୍ତାହ ମହୋତ୍ସବ-୨୦୨୩ ପାଳିତ ହୋଇଯାଇଅଛି । ଊତ୍ସବରେ ମୁଖ୍ୟ ଅତିଥି ଭାବେ ଯୋଗଦେଇ ଜିଲା ମୁଖ୍ୟ କୃଷି ଅଧିକାରୀ ଶ୍ରୀ ଉଦିପ୍ତ କୁମାର ତ୍ରିପାଠୀ ମା’ ବିରଜାଙ୍କ ପଂଟୋରେ ପୁଷ୍ପାର୍ଘ୍ୟ ପ୍ରଦାନ କରି ପ୍ରଦୀପ ପ୍ରଜ୍ୱଳନ ପୂର୍ବକ ମହୋତ୍ସବକୁ ଉଦଘାଟନ କରିଥିଲେ । ଶ୍ରୀ ତ୍ରିପାଠୀ ତାଙ୍କ ଅଭିଭାଷଣରେ କହିଲେ ଯେ, କୃଷି ଓ ସମବାୟ ବିଭାଗ ଗୋଟିଏ ମୁଦ୍ରାର ଦୁଇଟି ପାର୍ଶ୍ୱ । ଏହା ପରସ୍ପର ଅଙ୍ଗାଙ୍ଗୀ ଭାବେ ଜଡିତ । ଚାଷୀ ମାନଙ୍କ ନିକଟରେ ସରକାରଙ୍କ ପ୍ରଣିତ ଯୋଜନାର ସୁଫଳ ପହଂଚାଇବାକୁ ହେଲେ ଜିଲାରେ ଥିବା ସମସ୍ତ ପ୍ୟାକ୍ସ ନିସ୍ୱାର୍ଥପର ଭାବେ ସେବା ଯୋଗାଇ ଦେବାକୁ ସେ ଆହ୍ୱାନ ଦେଇଥିଲେ । ସେହିପରି ଖରିଫ ଚାଷ, ରବି ଚାଷ ସମୟରେ ଚାଷୀ ମାନଙ୍କୁ ଋଣ ଯୋଗାଇବା ଏବଂ ସାର, ବିହନ ଆଦି କୃଷି ଯନ୍ତ୍ରପାତି ପ୍ରଦାନ ଦିଗରେ ଗୁରୁତ୍ୱାରୋପ କରିଥିଲେ ।
ସହକାରୀ ନିବନ୍ଧକ, ସମବାୟ ସମିତି ଶ୍ରୀ ଶରତ ଚନ୍ଦ୍ର ମଲିକଙ୍କ ପୌରହିତ୍ୟରେ ଅନୁଷ୍ଠିତ ଉକ୍ତ ବୈଠକରେ ସମ୍ମାନିତ ଅତିଥି ଭାବେ କଟକ କେନ୍ଦ୍ର ସମବାୟ ବ୍ୟାଙ୍କ ପରିଷଦ ମଣ୍ଡଳୀ ସଭ୍ୟ ଶ୍ରୀଯୁକ୍ତ ଶରତ ଚନ୍ଦ୍ର ସାହୁ, ଶ୍ରୀଯୁକ୍ତ ଦୁଃଶାସନ ସାହୁ, ଶ୍ରୀଯୁକ୍ତ କେଶବ ଚନ୍ଦ୍ର ସେଠୀ, ଶ୍ରୀଯୁକ୍ତ ବିଜୟ କୁମାର ଦଳାଇ ଏବଂ ଜିଲା ସୂଚନା ଓ ଲୋକ ସଂପର୍କ ଅଧିକାରୀ ଶ୍ରୀ ଲକ୍ଷ୍ମଣ କୁମାର ବେହେରା ଯୋଗଦେଇ ସମବାୟ ଆନ୍ଦୋଳନର ପୃଷ୍ଠପୋଷକତା ସ୍ୱର୍ଗତ ଉତ୍କଳ ଗୌରବ ମଧୁସୂଦନ ଦାସଙ୍କ ତ୍ୟାଗ ଓ ଆଦର୍ଶ ସମ୍ୱନ୍ଧରେ ବକ୍ତବ୍ୟ ରଖିବା ସହ ସମବାୟ ସେବାକୁ ତୃଣମୂଳ ସ୍ତରରେ ପହଂଚାଇ କୃଷକ, ଚାଷୀ ଏବଂ ବେକାର ଯୁବକ, ଯୁବତୀ ମାନଙ୍କ ଜୀବନ ଜୀବିକା ଉନ୍ନତମାନର ଗଢି ତୋଳି ସମାଜର ମୁଖ୍ୟ ସ୍ରୋତରେ ସାମିଲ କରିବାକୁ ଆହ୍ୱନ ଦେଇଥିଲେ । ଏଥି ସହିତ ଅତିଥି ମାନେ “କୃଷି କଲେ ଉନ୍ନତି, ସକଳ ଉନ୍ନତ” ର ବାର୍ତା ବ୍ୟାପକ ପ୍ରଚାର, ପ୍ରସାର କରିବାକୁ ବକ୍ତବ୍ୟ ରଖିଥିଲେ ।
ମୁଖ୍ୟ ବକ୍ତା ଭାବେ ଉପ-ନିବନ୍ଧକ, ସମବାୟ ସମିତି ସମୂହ, କଟକ ପ୍ରଭାଗ-୨ ଶ୍ରୀମତୀ ମୋନିକା ରାୟ ଯୋଗଦେଇ କହିଲେ ଯେ, ସମବାୟ ସମିତି ଗୁଡିକ ଋଣ ପ୍ରଦାନ, ବ୍ୟବସାୟୀକରଣ ଏବଂ ଚାଷୀ ଓ କୃଷକ ମାନଙ୍କୁ ପ୍ରୋତ୍ସାହନ ଦେବାରେ ଗୁରୁ ଦାୟିତ୍ୱ ରହିଛି ଏବଂ ଏହାକୁ ସେମାନେ ପ୍ରୋତ୍ସାହନ ଦିଗରେ ପଂଚାୟତ କୃଷି ସମବାୟ ସମିତି ଗୁଡିକର ସଭାପତି ଓ ସମ୍ପାଦକ ମାନେ ସ୍ୱଛତା ବଜାୟ ରଖି ସମବାୟ ସେବା ପ୍ରଦାନ କଲେ ଯାଜପୁର ଜିଲା ରାଜ୍ୟରେ ଦୃଷ୍ଟାନ୍ତ ସୃଷ୍ଟି କରିବ ବୋଲି ସେ ଆହ୍ୱାନ ଦେଇଥିଲେ ।
ସଭାପତି ଭାଷଣରେ ସହକାରୀ ନିବନ୍ଧକ, ସମବାୟ ସମିତି, ଯାଜପୁର ମଣ୍ଡଳ ଶ୍ରୀ ଶରତ ଚନ୍ଦ୍ର ମଲିକ ଜିଲାରେ କାର୍ଯ୍ୟ କରୁଥିବା ୧୨୨ ଗୋଟି ସୋସାଇଟିର କାର୍ଯ୍ୟଧାରା ଉପରେ ଆଲୋକପାତ କରି ୭୦ତମ ନିଖିଳ ଭାରତ ସମବାୟ ସପ୍ତାହ-୨୦୨୩ ପାଳନର ବିଭିନ୍ନ କାର୍ଯ୍ୟକ୍ରମ ସମ୍ୱନ୍ଧରେ ଅବଗତ କରାଇଥିଲେ । ଏଥିସହ ଶ୍ରୀ ମଲିକ କହିଲେ ଯେ, ଜିଲାରେ ୩ ଲକ୍ଷ ୧୦ ହଜାର ସଭ୍ୟ/ସଭ୍ୟା ଥିବାବେଳେ ୨ ଲକ୍ଷ ୧୪ ହଜାର ସଭ୍ୟ/ସଭ୍ୟା ଋଣ କାରବାର କରୁଛନ୍ତି । ଚଳିତ ଖରିଫ ଋତୁରେ ୫୦ କୋଟିରୁ ଊଦ୍ଧ୍ୱର୍ ଅର୍ଥ ବ୍ୟାବସାୟୀକରଣ ହୋଇଛି । ସମବାୟ ସମିତି ଭାତହାଣ୍ଡି କହିଲେ ଅତୁ୍ୟକ୍ତି ହେବନାହିଁ ଶ୍ରୀ ମଲିକ ଉତ୍ଥାପନ କରି ସରକାରଙ୍କ ବିଭିନ୍ନ ଋଣ ଯୋଜନା ସମ୍ୱନ୍ଧରେ ବକ୍ତବ୍ୟ ରଖିଥିଲେ ।
ସମାରୋହରେ ସ୍ୱପ୍ନେଶ୍ୱର କଳା ନିକେତନ ଛତ୍ର ଛାତ୍ରୀଙ୍କ ଦ୍ୱାରା ବନ୍ଦେ ଉତ୍କଳ ଜନନୀ ଗାନ କରାଯାଇଥିଲା । ପରେ ଅତିଥି ମାନଙ୍କୁ ପୁଷ୍ପଗୁଛ ଓ ଉପଢୌକନ ପ୍ରଦାନ ପୂର୍ବକ ସମ୍ୱର୍ଦ୍ଧିତ କରାଯାଇଥିଲା । ୭୦ତମ ନିଖିଳ ଭାରତ ସମବାୟ ସପ୍ତାହ ମହୋତ୍ସବ-୨୦୨୩ ଉପଲକ୍ଷେ ଅନୁଷ୍ଠିତ ବିଭିନ୍ନ ପ୍ରତିଯୋଗିତାର କୃତି ପ୍ରତିଯୋଗୀ ମାନଙ୍କୁ ମାନପତ୍ର ଓ ଅର୍ଥରାଶି ପ୍ରଦାନ ପୂର୍ବକ ଅତିଥିମାନେ ପୁରସ୍କୃତ କରିଥିଲେ । ସଭା ସଂଯୋଜନା ଉପ-ସହକାରୀ ନିବନ୍ଧକ, ଶ୍ରୀ ଦେବେନ୍ଦ୍ର ନାୟକ ସମ୍ପାଦିତ କରିଥିବା ବେଳେ ଉପ-ସହକାରୀ ନିବନ୍ଧକ,ଶ୍ରୀ ଭଗମତ ମାରାଣ୍ଡି ଧନ୍ୟବାଦ ପ୍ରଦାନ କରିଥିଲେ । ଅନ୍ୟ ମାନଙ୍କ ମଧ୍ୟରେ ଜିଲାର ବିଭିନ୍ନ ବ୍ଳକରେ ଥିବା ମୋଟ ୧୨୨ ଗୋଟି ପଂଚାୟତ କୃଷି ସମବାୟ ସମିତିର ସଭାପତି, ସମ୍ପାଦକ, ଚାଷୀ, କୃଷକ, ବିଭାଗୀୟ କର୍ମଚାରୀ ଓ ଗଣମାଧ୍ୟମ ପ୍ରତିନିଧି ବୃନ୍ଦ ଉପସ୍ଥିତ ଥିଲେ ।
୭୦ତମ ନିଖିଳ ଭାରତ ସମବାୟ ସପ୍ତାହ ମହୋତ୍ସବ-୨୦୨୩ ପାଳିତ –
![](https://eodishasamachar.com/wp-content/uploads/2023/11/Ph-3-on-18.11.23.jpg)