ଲକ୍ଷେଶ୍ୱର ମହିଳା କଲେଜରେ ‘ନୂଆ-ଓ’ କାର୍ଯ୍ୟକ୍ରମ ଉଦ୍ଘାଟିତ

ଫୁଲନଖରା ୨୬/୧୨/୨୦୨୩ (ଓଡ଼ିଶା ସମାଚାର/ଦୀପ୍ତିରଂଜନ କାନୁନଗୋ)-ଫୁଲନଖରାସ୍ଥିତ ଲକ୍ଷେଶ୍ୱର ମହିଳା ଉଚ୍ଚ ମାଧ୍ୟମିକ ବିଦ୍ୟାଳୟରେ ରାଜ୍ୟ ସରକାରଙ୍କ ଶିକ୍ଷା ବିଭାଗ ନିର୍ଦ୍ଧେଶିତ ‘ନୂଆ-ଓ’ କାର୍ଯ୍ୟକ୍ରମର ଶୁଭ ଉଦ୍ଘାଟନ ହୋଇଯାଇଛି । ବିଦ୍ୟାଳୟର ଅଧ୍ରକ୍ଷା ଯଶୋଧାରା ମହାପାତ୍ରଙ୍କ ସଭାପତିତ୍ୱରେ ଅନୁଷ୍ଠିତ ଉକ୍ତ ସଭାରେ ଅତିଥି ଭାବରେ ସ୍ଥାନୀୟ କର୍ପୋରେଟର ମମତା ମହାନ୍ତି, କଟକ ସଦର ବିଜୁ ଜନତା ଦଳ ସଭାପତି ପ୍ରମୋଦ କୁମାର ମହାପାତ୍ର ଓ ସମାଜସେବୀ ବିପ୍ର ଚରଣ ଭୋଳ ଯୋଗଦେଇ ତୃଣମୂଳ ସ୍ତରରୁ ଯୁବଗୋଷ୍ଠୀ ମାନଙ୍କର କ୍ରୀଡା, ସାଂସ୍କୃତିକ ଓ ସାମାଜିକ କ୍ଷେତ୍ରରେ ଥିବା ଲୁକ୍କାୟିତ ପ୍ରତିଭାକୁ ବିକଶିତ କରିବାରେ ମୁଖ୍ୟମନ୍ତ୍ରୀଙ୍କ ପ୍ରୟାସକୁ ଭୂୟସୀ ପ୍ରଶଂସା କରିଥିଲେ । ନୋଡାଲ ଅଫିସର ଅଧ୍ୟାପିକା ରେଣୁପି୍ରୟା ପଣ୍ଡା ଛାତ୍ରୀମାନଙ୍କୁ ଉତ୍ସାହିତ କରିଥିବା ବେଳେ ଅଧ୍ୟାପିକା ଇତିଶ୍ରୀ ମହାନ୍ତିଙ୍କ ଦ୍ୱାରା ବାଳିକା ଶିକ୍ଷାକୁ ନେଇ ଏକ ନାଟକ ପ୍ରସ୍ତୁତ କରାଯାଇଥିଲା । ଅଧ୍ୟାପିକା ଡଃ ପ୍ରଣୟ ବଲ୍ଲରୀ ମହାନ୍ତି, ପ୍ରତିଭା ପଟ୍ଟନାୟକ, ଆଶାଲତା ପ୍ରଧାନ ପ୍ରମୁଖ କାର୍ଯ୍ୟକ୍ରମ ପରିଚାଳନା କରିଥିବା ବେଳେ ଦେବସ୍ମିତା ମହାପାତ୍ର, ନିରୂପମା ନାୟକ, ହେମନ୍ତ କୁମାର ଦାଶ, ଗୌତମ ଚନ୍ଦ୍ର ଦାସ ଓ ହେମନ୍ତ ଦଳାଇ ସହଯୋଗ କରିଥିଲେ । ଶେଷରେ ଅଧ୍ୟାପିକା ଅନସୂୟା ଆଚାର୍ଯ୍ୟ ଧନ୍ୟବାଦ ଅର୍ପଣ କରିଥିଲେ ।