ବିକଳ୍ପ ଜନବାଦୀ ବଜେଟକୁ କାର୍ଯ୍ୟକାରୀ କର ଦାବିରେ ବାମ ଦଳଗୁଡ଼ିକର ପ୍ରଚାର ଅଭିଯାନ
କେନ୍ଦ୍ରାପଡ଼ା,୨୩/୦୨/୨୦୨୫(ଓଡ଼ିଶା ସମାଚାର)-୨୦୨୫-୨୬ କେନ୍ଦ୍ର ବଜେଟ୍ ଜନସାଧାରଣଙ୍କ ମୌଳିକ ଆବଶ୍ୟକତା ପ୍ରତି ଚରମ ବିଶ୍ୱାସଘାତକତା ବୋଲି ବାମପନ୍ଥୀ ଦଳମାନଙ୍କ ପ୍ରଚାର ଅଭିଯାନରେ କୁହାଯାଇଛି । ଲୋକଙ୍କ କ୍ରୟଶକ୍ତିର ଅଭାବ, ବ୍ୟାପକ ବେକାରୀ କାରଣରୁ ଅର୍ଥନୀତିରେ ସଂକଟ ସୃଷ୍ଟି ହୋଇଥିଲେ ମଧ୍ୟ ଏହି ସମସ୍ୟାଗୁଡ଼ିକୁ ସମାଧାନ କରିବା ପରିବର୍ତେ ଧନୀକ ବର୍ଗଙ୍କ ପାଇଁ ସୁବିଧା ବୃଦ୍ଧି କରିଛି ।
ଜନସେବା ପାଇଁ ବ୍ୟୟ ବରାଦ ହ୍ରାସ ପାଇଛି । ଧନୀମାନଙ୍କ ପୁଞ୍ଜି ବଢ଼ିବାରେ ସାହାଯ୍ୟ କରୁଛି । ଘରୋଇ ବିନିଯୋଗକୁ ଉତ୍ସାହିତ କରୁଛି । ସରକାରୀ ସମ୍ପତିକୁ ଘରୋଇ କ୍ଷେତ୍ର ପାଇଁ ବ୍ୟବହାର କରୁଛି ଏବଂ ବିଦ୍ୟୁତ୍ କ୍ଷେତ୍ର ସହ ବିଭିନ୍ନ ଗୁରୁତ୍ୱପୂର୍ଣ ପରିସେବା ଗୁଡ଼ିକର ଘରୋଇକରଣକୁ ତ୍ୱରାନ୍ୱିତ କରୁଛି । ଏହି ବଜେଟ୍ ବେକାରୀ ସମସ୍ୟାକୁ ସମ୍ପୂର୍ଣ ଅଣଦେଖା କରିଛି । ଦରବୃଦ୍ଧିକୁ ରୋକି ଖାଦ୍ୟ ସୁରକ୍ଷାକୁ ସୁନିଶ୍ଚିତ କରିବା, କୃଷି, ଶିକ୍ଷା, ସ୍ୱାସ୍ଥ୍ୟ, ଗ୍ରାମ୍ୟ ଉନ୍ନୟନ, ସାମାଜିକ କଲ୍ୟାଣ ଏବଂ ସହରର ଉନ୍ନତି ପାଇଁ ବ୍ୟୟ ବରାଦ ଗତ ବର୍ଷ ତୁଳନାରେ ହ୍ରାସ ପାଇଛି ।
ଏଣୁ ବାମପନ୍ଥୀ ଦଳମାନଙ୍କ ପକ୍ଷରୁ ବିକଳ୍ପ ବଜେଟ୍ ପ୍ରସ୍ତାବ ଉପସ୍ଥାପିତ କରାଯାଇଛି । ନିମ୍ନ ବଜେଟ୍କୁ କାର୍ଯ୍ୟକାରୀ କରିବା ପାଇଁ ସରକାରଙ୍କ ଉପରେ ଚାପ ପ୍ରୟୋଗ ନିମନ୍ତେ ଜନ ଆନ୍ଦୋଳନ ପାଇଁ ଆହ୍ୱାନ ଦିଆଯାଇଛି । ଦେଶର ୨୦୦ ଜଣ ବିଲିଅନେୟାର (ଧନକୁବେର)ଙ୍କ ଉପରେ ୪% ସମ୍ପତି କର ଲାଗୁ କର ଏବଂ କର୍ପୋରେଟ୍ ଟିକସ ବୃଦ୍ଧି କର । କୃଷି ଉତ୍ପାଦନ ପାଇଁ ଏମଏସପିକୁ ଆଇନଗତ ଗ୍ୟାରେଂଟି ଦେବା ଏବଂ କୃଷି ବିପଣନ ପାଇଁ ପ୍ରସ୍ତୁତ ଚିଠା ଜାତୀୟ ନୀତି ପ୍ରସ୍ତାବକୁ ରଦ୍ଧ କରିବା । ଜାତୀୟ ସମ୍ପତି ଘରୋଇକରଣ ବନ୍ଦ କର ଏବଂ ଜାତୀୟ ମୁଦ୍ରାକରଣ ଯୋଜନା ମାଧ୍ୟମରେ ସର୍ବସାଧାରଣଙ୍କ ସମ୍ପତିକୁ ଘରୋଇ କ୍ଷେତ୍ରକୁ ହସ୍ତାନ୍ତର ବନ୍ଦ କର । ବୀମା କ୍ଷେତ୍ରରେ ଶହେ ପ୍ରତିଶତ ପ୍ରତ୍ୟକ୍ଷ ବିଦେଶୀ ପୁଞ୍ଜି ବିନିଯୋଗ ନୀତି ବାତିଲ କର ।
“ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ ରୋଜଗାର ଅଧିନିୟମ”ପାଇଁ ବରାଦ ୫୦ ପ୍ରତିଶତ ବଢ଼ାଇବା ସହିତ ସହରାଂଚଳରେ ରୋଜଗାର ନିଶ୍ଚିତ କରିବାକୁ ଏକ “ ସହରୀ ରୋଜଗାର ନିଶ୍ଚିତକରଣ ଆଇନ” ଆଣ । ବୟସ୍କ ଲୋକମାନଙ୍କ ପାଇଁ ପେନସନ ଏବଂ ଅନ୍ୟାନ୍ୟ ସାମାଜିକ ସୁରକ୍ଷା ସୁବିଧା ପାଇଁ କେନ୍ଦ୍ରୀୟ ବ୍ୟୟ ବରାଦ ବଢ଼ାଅ । ସ୍ୱାସ୍ଥ୍ୟ କ୍ଷେତ୍ର ପାଇଁ ଜିଡିପିର ୩% ଏବଂ ଶିକ୍ଷା କ୍ଷେତ୍ର ପାଇଁ ଜିଡିପିର ୬% ବ୍ୟୟ ବରାଦ ନିଶ୍ଚିତ କର । ଗଣ ବଂଟନ ବ୍ୟବସ୍ଥାକୁ ଅଧିକ ଶକ୍ତିଶାଳୀ କରିବା ପାଇଁ ଖାଦ୍ୟ ବାବଦ ସବ୍ସିଡ଼ି ବଢ଼ାଅ । ତଫସିଲଭୁକ୍ତ ଜାତି (ଏସ୍ସି) ଏବଂ ତଫସିଲଭୁକ୍ତ ଉପଜାତି (ଏସ୍ଟି) କ୍ଷେତ୍ର ଏବଂ ମହିଳା ଓ ଶିଶୁମାନଙ୍କ ବିକାଶ ପାଇଁ ବ୍ୟୟ ବରାଦ ଅଧିକ ବଢ଼ାଇବା, ଯେଉଁଥିରେ ଆଇସିଡିଏସର ବ୍ୟୟ ବରାଦ ବଢ଼ାଇବା ଅନ୍ତର୍ଭୁକ୍ତ ରହିବ । ଏହି ପ୍ରକଳ୍ପରେ କାମ କରୁଥିବା ସ୍କିମ୍ ଶ୍ରମିକମାନଙ୍କ ଭତା ପାଇଁ କେନ୍ଦ୍ରୀୟ ଭାଗିଦାରୀ ବଢ଼ାଇବା । ରାଜ୍ୟଗୁଡ଼ିକ ପାଇଁ ଅର୍ଥ ପ୍ରଦାନ କରିବା ଏବଂ କେନ୍ଦ୍ରୀୟ ଯୋଜନାଗୁଡ଼ିକ ପାଇଁ ଯଥେଷ୍ଟ ବ୍ୟୟ ବରାଦ ବଢ଼ାଇବା ।
ପେଟ୍ରୋଲିଅମ୍ ଉତ୍ପାଦନ ଉପରେ ଅତିରିକ୍ତ କର (ସେସ୍) ଏବଂ ସରଚାର୍ଜ ରଦ୍ଧ କରିବା, ଯାହାକି ରାଜ୍ୟଗୁଡ଼ିକ ସହ ବଂଟନ ପାଇଁ ଉଦ୍ଧିଷ୍ଟ ବିଭାଜିତ ପୁଲରେ ନାହିଁ ।ଏହି ଆଠଟି ଦାବି ଉପରେ ସାରା ଦେଶବ୍ୟାପୀ ବାମପନ୍ଥୀ ଦଳମାନଙ୍କ ପକ୍ଷରୁ ପ୍ରଚାର ଅଭିଯାନ ଚାଲିଥିଲା ବେଳେ କେନ୍ଦ୍ରାପଡା ସହରରେ ସିପିଆଇ (ଏମ୍) ଓ ସିପିଆଇ ପକ୍ଷରୁ ମିଳିତ ଭାବେ ପ୍ରଚାର ଅଭିଯାନ କରାଯିବା ସହିତ ସହରର ଦୁହୁରିଆ, ତିନିମୁହାଣୀ, ନୂଆ ବସଷ୍ଟାଣ୍ଡ, ପୁରୁଣା ବସଷ୍ଟାଣ୍ଡ, ସାନ୍ତସାହି, ଇଚ୍ଛାପୁର ପ୍ରଭୃତି ସ୍ଥାନମାନଙ୍କରେ ପଥପ୍ରାନ୍ତ ସଭା ଅନୁଷ୍ଠିତ ହୋଇଥିଲା । ସିପିଆଇ(ଏମ୍) ଜିଲା ସମ୍ପାଦକ ଗୟାଧର ଧଳ, ସିପିଆଇ ଜିଲା ସମ୍ପାଦକ ରମଣୀରଞ୍ଜନ ରାଉତରାୟ, ମାଧବ ଦାସ, ଆଦିକନ୍ଦ ରାଉଳ, ଶ୍ରମିକ ନେତା ପ୍ରକାଶ ମହାନ୍ତି, ବୁଦ୍ଧିଜିବି କେଦାର ସାମନ୍ତରାୟ, ରମେଶ ପ୍ରଧାନ, ସୁହାନା ବେଗମ, ସଂଯୁକ୍ତା ରାଉତ ପ୍ରମୁଖ ବକ୍ତବ୍ୟ ରଖିଥିଲେ । ଅଧ୍ୟାପକ ଅଜୟ ସାମଲ ସଭାପତିତ୍ୱ କରିଥିଲେ । ଏହି କାର୍ଯ୍ୟକ୍ରମରେ ଦଶ ହଜାର ପ୍ରଚାରପତ୍ର ବଂଟନ କରାଯାଇଥିଲା ।
