ପାଟକୁରା ୧୫/୦୨/୨୦୨୫ (ଓଡ଼ିଶା ସମାଚାର)- ଗତକାଲି ରାତିରେ ଗରଦପୁର ତହସିଲ ଅଧୀନ ପଦ୍ମପୁର ଗ୍ରାମପଞ୍ଚାୟତ ର ବିଚଣା ଚିତ୍ରୋତ୍ପଳା ନଦୀ ପଠାରୁ ୧୯ ଗୋଟି ହାଇୱା ଓ ୨ଗୋଟି ପ୍ରୋକଲିନକୁ ଜବତ କରାଯାଇଛି । କେନ୍ଦ୍ରାପଡା ଉପଜିଲ୍ଲାପାଳ, ଗରଦପୁର ତହସିଲଦାର, ଜିଲ୍ଲା ମାଇନିଂ ଅଧିକାରୀ ଓ ପାଟକୁରା ଥାନା ର ମିଳିତ ଚଢ଼ାଉରେ ଗାଡିଗୁଡିକୁ ଜବତ କରାଯାଇଥିଲା ।
ଚିତ୍ରୋତ୍ପଳା ନଦୀର ବିଚଣା ନଦୀ ଘାଟରୁ ବେଆଇନ ଭାବେ ବାଲି ଉଠାଇବାକୁ ଏହି ଗାଡି ଗୁଡିକ ଆସିଥିବାର ଅଭିଯୋଗ ହୋଇଥିବା ଜଣାଯାଇଛି । ସରକାରୀ ସ୍ତରରେ ବିଚଣା ନଦୀ ବାଲିଘାଟ ନିଲାମ ହୋଇନାହିଁ ବୋଲି ଗରଦପୁର ତହସିଲଦାର ତୃପ୍ତି ଦାଶ ସୂଚନା ଦେଇଛନ୍ତି । ଏହି ବାଲି ଘାଟ ନିଲାମ ହୋଇନଥିବା ସତ୍ୱେ ଏଠାରେ ବେଆଇନ ଭାବେ ବାଲି ଉଠୁଥିବା ଅଭିଯୋଗ ହୋଇଆସୁଛି ବୋଲି ଜିଲ୍ଲା ମାଇନିଂ ଅଧିକାରୀ ରଂଜିତ ବେହେରା କହିଥିଲେ ।
ଏଣୁ ଉପଜିଲ୍ଲାପାଳ, ତହସିଲଦାର, ପାଟକୁରା ଥାନା ଓ ମାଇନିଂ ବିଭାଗ ର ମିଳିତ ଉଦ୍ୟମରେ ଅତର୍କିତ ଭାବେ ଚଢ଼ାଉ କରାଯିବାରୁ ଗାଡି ଗୁଡିକ ଜବତ କରିହେଲା ବୋଲି ଜିଲ୍ଲା ମାଇନିଙ୍ଗ ଅଧିକାରୀ ରଂଜିତ କୁମାର ବେହେରା ସୂଚନା ଦେଇଛନ୍ତି । ରାତି ଯୋଗୁ ଡ୍ରାଇଭରମାନେ ଗାଡି ଛାଡି ପଳାଇଯିବାରୁ ସେମାନଙ୍କୁ ଅଟକାଇ ହେଲାନି ବୋଲି ସେ କହିଥିଲେ । ଆଇନଗତ ଦିଗ ଉପରେ ପାଟକୁରା ଥାନା ତଦନ୍ତ କରି କାର୍ୟ୍ୟାନୁଷ୍ଠାନ ଗ୍ରହଣ କରିବ ବୋଲି ମାଇନିଂ ଅଧିକାରୀ କହିଥିଲେ । ଥାନା ପରିସରରେ ସ୍ଥାନ ଅଭାବ ଯୋଗୁ ଜବତ ଗାଡିଗୁଡିକ ହରିଦାସପୁର ସ୍କୁଲ ଖେଳ ପଡିଆରେ ରଖାଯାଇଛି ବୋଲି ସେ କହିଥିଲେ ।
