ନିଶ୍ଚିନ୍ତକୋଇଲି,୨୯/୭/୨୦୨୪(ଓଡିଶା ସମାଚାର /ଅଭୟ ଜେନା )- କଟକ ଚାନ୍ଦବାଲି ରାସ୍ତା ର ନିଶ୍ଚିନ୍ତକୋଇଲି ତହସିଲ ଅଫିସ ଛକ ରେ ଏକ ପିକଅପ ଭ୍ୟାନ କାଉଡିଆମାନଙ୍କ ଉପରେ ମାଡିଯିବାରୁ ଦୁଇ ଜଣ କାଉଡିଆ ମୃତ୍ୟୁ ବରଣ କରିଥିବା ଜଣାପଡିଛି । ତିନି ଜଣ ଗୁରୁତର ଆହତ ଙ୍କୁ କଟକ ଏସସିବି ମେଡିକାଲ କୁ ସ୍ଥାନାନ୍ତର କରାଯାଇଛି ।
ଘଟଣା ରୁ ପ୍ରକାଶ, ଜିଗ୍ନିପୁର ବସୁପଦା ଗ୍ରାମ ରୁ ପ୍ରାୟ ୩୭ଜଣ କାଉଡିଆ ଚିତ୍ରୋତ୍ପଳା ନଦୀର ନେମାଳ ଘାଟରୁ ପାଣି ଉଠାଇ ଫଗୋଳ ସିଦ୍ଧେଶ୍ଵର ମହାଦେବଙ୍କ ପାଖରେ ଜଳ ଲାଗି କରିବା ପାଇଁ ଯିବା ସମୟ ରେ ନିଶ୍ଚିନ୍ତକୋଇଲି ତହସିଲ ଛକ ରାସ୍ତା ଉପରେ ଛିଡା ହୋଇ ଥିଲେ । ରବିବାର ରାତି ପ୍ରାୟ ସାଢ଼େ ୧୦ଟା ସମୟରେ ହଠାତ୍ ଅପର ପଟୁ ଏକ ପିକଅପ ଭ୍ୟାନ ଦୃତ ଗତିରେ ଆସି ଧକ୍କା ଦେଇଥିଲା । 
ଫଳରେ ୫ ଜଣ ଗୁରୁତର ଆହତ ହୋଇଥିଲେ । ଦୂର୍ଘଟଣା ଘଟିବା ପରେ ପ୍ରଥମେ ପୋଲିସ ସହାୟତା ରେ ଗୁରୁତର ଆହତଙ୍କୁ ନିଶ୍ଚିନ୍ତକୋଇଲି ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ରେ ଭର୍ତି କରାଯାଇଥିଲା । ସେମାନଙ୍କ ମଧ୍ୟରୁ ଜଣେ ମହିଳା କାଉଡିଆ ଙ୍କର ମୃତ୍ୟୁ ହୋଇଥିଲା । ମୃତ କାଉଡିଆ ଜିଗ୍ନିପୁର ବସୁପଦା ଗାଁର ଚିନ୍ମୟୀ ବେହେରା । ଗୁରୁତର ଆହତ ତିନି ଜଣଙ୍କୁ କଟକ ଏସସିବି କୁ ସ୍ଥାନାନ୍ତର କରାଯାଇଥିଲା । ସେମାନଙ୍କ ମଧ୍ୟରୁ ଝାରପଡ଼ା ଗାଁର ଜ୍ୟୋତିରଞ୍ଜନ ରାଉତ ଙ୍କର ପରେ ମୃତ୍ୟୁ ହୋଇଥିବା ସୂଚନା ମିଳିଛି । ଖବର ପାଇ ପରିବାର ଠାରୁ ଆରମ୍ଭ କରି ଗ୍ରାମ ର ଲୋକ ମାନେ ନିଶ୍ଚିନ୍ତକୋଇଲି ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ରେ ଭିଡ଼ ଲାଗାଇବା ସହ ଶୋକାକୁଳ ପରିବେଶ ସୁଷ୍ଟି ହୋଇଥିଲା । ଦୂର୍ଘଟଣା ଘଟାଇଥିବା ପିକଅପ ଭ୍ୟାନ ଡ୍ରାଇଭରକୁ ପୁଲିସ୍ ଅଟକ ରଖି ଅଧି୍କ ତଦନ୍ତ ଜାରି ରଖିଛି। 
