ଭର୍ତ୍ତୃହରି ମହତାବ ଙ୍କ ସହିତ ପଦ୍ମଶ୍ରୀ ଦମୟନ୍ତୀ ଵେସ୍ରା ଓ ବ୍ରହ୍ମପୁରର ପୂର୍ବତନ ସାଂସଦ ସିନେ ତାରକା ସିଦ୍ଧାନ୍ତ ମହାପାତ୍ର ପଦ୍ମ ଧରିଲେ
କଟକ ସଦର ,୨୮/୦୩/୨୦୨୪ (ଓଡ଼ିଶା ସମାଚାର /ବିଷ୍ଣୁ ବେହେରା): ସବୁ କଳ୍ପନା ଜଳ୍ପନା ର ଅବସାନ ଘଟାଇ ଗତ ୨୨ ତାରିଖରେ ବିଜେଡ଼ିରୁ ଇସ୍ତଫା ଦେଇଥିବା,୩ ଦଶନ୍ଧି ଧରି ବିଜେଡ଼ିରେ ଥିବା, କଟକ ଲୋକସଭା ସଂସଦୀୟ କ୍ଷେତ୍ରର ୬ ଥରର ସାଂସଦ ଭର୍ତ୍ତୃହରି ମହତାବ ଶେଷରେ ଆଜି ଗୁରୁବାର ଅପରାହ୍ନରେ ବିଜେପି ରାଷ୍ଟ୍ରୀୟ କାର୍ଯ୍ୟାଳୟ ଦିଲ୍ଲୀରେ ବିଜେପିରେ ବିଧିବଦ୍ଧ ଭାବେ ଯୋଗ ଦେଇ ପଦ୍ମ ଧରିଥିବା ଜଣାପଡିଛି। 
ତାଙ୍କ ସହିତ ମୟୁରଭଞ୍ଜ ଜିଲ୍ଲା ବାରିପଦାର ଉଚ୍ଚ ଶିକ୍ଷିତା, ସାନ୍ତାଳୀ ଭାଷାର ବିଶିଷ୍ଟ ଲେଖିକା, ମହାମହିମ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଙ୍କ ଅନ୍ତରଙ୍ଗ ପଦ୍ମଶ୍ରୀ ପ୍ରଫେସର ଦମୟନ୍ତୀ ଵେସ୍ରା ଓ ବ୍ରହ୍ମପୁର ସଂସଦୀୟ କ୍ଷେତ୍ରର ଦୁଇ ଥରର ପୂର୍ବତନ ସାଂସଦ ବିଶିଷ୍ଟ ସିନେ ତାରକା ସିଦ୍ଧାନ୍ତ ମହାପାତ୍ର ମଧ୍ୟ 
ଆଜି ଶ୍ରୀ ମହତାବଙ୍କ ସହିତ ବିଜେପି ରେ ଯୋଗଦାନ କରିଛନ୍ତି। ଏହି ମିଶ୍ରଣ ପର୍ବରେ ଓଡ଼ିଶାର ବିଜେପି ସଭାପତି ମନମୋହନ ସାମଲଙ୍କ ସହିତ କେନ୍ଦ୍ର ଦକ୍ଷତା ବିକାଶ ମନ୍ତ୍ରୀ ତଥା ସମ୍ବଲପୁର ଲୋକସଭା ସାଂସଦ ପ୍ରାର୍ଥୀ ଧର୍ମେନ୍ଦ୍ର ପ୍ରଧାନ, ରାଷ୍ଟ୍ରୀୟ ବିଜେପି ଉପସଭାପତି ତଥା କେନ୍ଦ୍ରାପଡା ଲୋକସଭା ସାଂସଦ ପ୍ରାର୍ଥୀ ବୈଜୟନ୍ତ ପଣ୍ଡା ଙ୍କ ସହିତ ଅନ୍ୟାନ୍ୟ ବରିଷ୍ଠ କାର୍ଯ୍ୟକର୍ତ୍ତା ମାନେ ଉପସ୍ଥିତ ଥିଲେ। ଆଗକୁ କଟକ ଲୋକସଭା ଆସନରୁ ଭର୍ତ୍ତୃହରି ମହତାବ ବିଜେପିରୁ ଲଢି ପାରନ୍ତି ବୋଲି କଳ୍ପନା ଜଳ୍ପନା ପ୍ରକାଶ ପାଇଛି। ଏପରି ହେଲେ କଟକ ରେ ବିଜେଡ଼ି ର ନବୀନ ସନ୍ତୃପ୍ତ ଓ ବିଜେପି ର ପ୍ରବୀଣ ଭର୍ତ୍ତୃହରି ଙ୍କ ମଧ୍ୟରେ ଲଢେ଼ଇ ରୋଚକ ମୋଡ଼ ନେବା ସମ୍ଭାବନାକୁ ଏଡାଇ ଦେଇ ହେବ ନାହିଁ ।
