ସଦର ଥାନାରେ ଏତଲା ଦେଲେ ବିଡିଓ ନମିତା ବାରିକ
କେନ୍ଦ୍ରାପଡ଼ା, ୨୯/୧୦/୨୦୨୬(ଓଡ଼ିଶା ସମାଚାର)-
ତହବିଲରୁ ଜନସାଧାରଣଙ୍କ ବିକାଶ ପାଇଁ ଉଦ୍ଧିଷ୍ଟ ଅର୍ଥକୁ ବେପରୁଆ ଭାବେ ହଡ଼ପ କରିବାର ଏକ ସଙ୍ଗିନ ମାମଲା ଏବେ କେନ୍ଦ୍ରାପଡ଼ା ଜିଲାର ଡେରାବିଶ ବ୍ଲକରେ ଚହଳ ସୃଷ୍ଟି କରିଛି । ଡେରାବିଶ ବ୍ଲକ ପ୍ରଶାସନ ଅଧିନରେ ଥିବା ସରକାରୀ ଆକାଉଂଟରୁ ପ୍ରାୟ ୧ କୋଟି ୬ ଲକ୍ଷ ଟଙ୍କା ବେଆଇନ ଭାବେ ଉଠାଇ ହେରଫେର କରାଯାଇଛି । ଏହି ବଡ଼ ଧରଣର ଦୁର୍ନୀତି ବିରୁଦ୍ଧରେ ଡେରାବିଶ ମଣ୍ଡଳ ଉନ୍ନୟନ ଅଧିକାରିଣୀ (ବିଡିଓ) ନମିତା ବାରିକ କେନ୍ଦ୍ରାପଡ଼ା ସଦର ଥାନାରେ ଏକ ଲିଖିତ ଏତଲା ଦାୟର କରିଛନ୍ତି । ଏହାପରେ ପୋଲିସ ଓ ପ୍ରଶାସନ ପକ୍ଷରୁ ମାମଲାର ଉଚ୍ଚସ୍ତରୀୟ ତଦନ୍ତ ପ୍ରକ୍ରିୟା ଆରମ୍ଭ ହୋଇଛି ।
ମିଳିଥିବା ସୂଚନା ଅନୁଯାୟୀ ଡେରାବିଶ ବ୍ଲକ ଆକାଉଂଟରୁ ବାରମ୍ବାର ବିପୁଳ ପରିମାଣର ଅର୍ଥ ସନ୍ଦେହଜନକ ଢଙ୍ଗରେ ସ୍ଥାନାନ୍ତର ହେଉଥିବା ବିଷୟ ପ୍ରଥମେ କେନ୍ଦ୍ରାପଡ଼ା ଟ୍ରେଜେରି ଅଫିସର ସଚ୍ଚିଦାନନ୍ଦ ବେହେରାଙ୍କ ନଜରକୁ ଆସିଥିଲା । ଟ୍ରେଜେରିରେ ଯାଂଚ ସମୟରେ ୧ କୋଟି ୬ ଲକ୍ଷ ଟଙ୍କାର ଅସ୍ୱାଭାବିକ କାରବାର ଉପରେ ସନ୍ଦେହ ଉପୁଜିବାରୁ ଏହାର ତନ୍ନ ତନ୍ନ କରି ଯାଂଚ କରାଯାଇଥିଲା । ଯାଂଚ ପରେ ଜଣାପଡ଼ିଥିଲା ଯେ ଏହି ଟଙ୍କା କୌଣସି ଜନହିତକର ପ୍ରକଳ୍ପ କିମ୍ବା ଠିକାଦାରଙ୍କ ପ୍ରାପ୍ୟ ନୁହେଁ ବରଂ ବ୍ଲକରେ କାର୍ଯ୍ୟରତ ଜଣେ ସିନିୟର ଆସିଷ୍ଟାଙ୍କ ସମ୍ପର୍କୀୟ ତଥା ପୂର୍ବତନ ପଂଚାୟତ କାର୍ଯ୍ୟ ନିର୍ବାହୀ ଅଧିକାରୀ (ପିଇଓ) ମନ୍ମଥ ମାହୁନ୍ତଙ୍କ ବ୍ୟାଙ୍କ ଖାତାକୁ ସିଧାସଳଖ ଟ୍ରାନ୍ସଫର କରାଯାଇଥିବା ଜଣାପଡିଛି । ଟ୍ରେଜେରି ରେକର୍ଡରୁ ମିଳିଥିବା ତଥ୍ୟ ଅନୁସାରେ, ଉକ୍ତ ସିନିୟର ଆସିଷ୍ଟାଂଟ ଶଶିକାନ୍ତ ରଣାଙ୍କ ନିଜ ସମ୍ପର୍କୀୟଙ୍କ ଆକାଉଂଟକୁ ପ୍ରାୟ ୧ କୋଟି ଟଙ୍କା ପଠାଯାଇଥିବା ବେଳେ ମନ୍ମଥ ମାହୁନ୍ତଙ୍କ ଆକାଉଂଟକୁ ୫ ଲକ୍ଷ ୮୯ ହଜାର ଟଙ୍କା ଯାଇଛି ।
ଟ୍ରେଜେରି ଅଫିସର ଶ୍ରୀ ବେହେରା ତୁରନ୍ତ ଏହି ବେନିୟମ କାରବାର ସମ୍ପର୍କରେ ବିଡିଓଙ୍କୁ ଅବଗତ କରାଇଛନ୍ତି । ଘଟଣା ସମ୍ପର୍କରେ ବିଡିଓ ନମିତା ବାରିକଙ୍କୁ ଯୋଗାଯୋଗ କରାଯିବାରୁ ସେ ଏହି ଆର୍ଥôକ ଅନିୟମିତତାକୁ ସ୍ୱୀକାର କରିଛନ୍ତି । ଚଳିତ ୨୦୨୫-୨୬ ଆର୍ଥôକ ବର୍ଷରେ ସମୁଦାୟ ୧୧ଟି ସନ୍ଦିଗ୍ଧ ବିଲ୍ ମାଧ୍ୟମରେ ଏହି ବଡ଼ ଧରଣର ଜାଲିଆତି କରାଯାଇଥିବା ସେ ସ୍ପଷ୍ଟ କରିଛନ୍ତି । ବିଡିଓ ତୁରନ୍ତ ଆକାଉଂଟ୍ସ୍ ଅଫିସରଙ୍କୁ ସମସ୍ତ ଫାଇଲ୍ ଯାଂଚ ପାଇଁ ନିର୍ଦେଶ ଦେବା ସହିତ ଘଟଣାର ଗୁରୁତ୍ୱକୁ ଉପଲବ୍ଧି କରି କେନ୍ଦ୍ରାପଡ଼ା ସଦର ଥାନାରେ ଲିଖିତ ଅଭିଯୋଗ କରିଛନ୍ତି । ସେ କହିଛନ୍ତି ପୂର୍ବତନ ବିଡିଓ ଗୋପବନ୍ଧୁ ବୈଶାଖଙ୍କ ସମୟରେ ଏହି ଦୁର୍ନୀତି ହୋଇଛି । ଏହାସହ ଏକ ସବିଶେଷ ତଦନ୍ତ ରିପୋର୍ଟ ପ୍ରସ୍ତୁତ କରି ଜିଲାପାଳଙ୍କୁ ପ୍ରଦାନ କରାଯିବ ବୋଲି ସେ ପ୍ରକାଶ କରିଛନ୍ତି ।
ଅନ୍ୟପଟେ ଏହି କୋଟିଏ ଟଙ୍କାର ଘୋଟାଲା ପଦାକୁ ଆସିବା ପରଠାରୁ ସମ୍ପୃକ୍ତ ସିନିୟର ଆସିଷ୍ଟାଂଟଜଣକ କାର୍ଯ୍ୟାଳୟରେ ଅନୁପସ୍ଥିତ ରହିଛନ୍ତି । ସେ ଅସୁସ୍ଥତା ଦର୍ଶାଇ ଛୁଟିରେ ଥିବା କୁହାଯାଉଥିଲେ ହେଁ ଘଟଣା ପଦାକୁ ଆସିବା ପରେ ସେ ଆତ୍ମଗୋପନ କରିଥିବା ସନ୍ଦେହ କରାଯାଉଛି । ଏହି ମାମଲାରେ ଡେରାବିଶ ବ୍ଲକ ଅଧ୍ୟକ୍ଷା ପ୍ରଭାତୀ ମଲିକ ବିସ୍ଫୋରକ ପ୍ରତିକ୍ରିୟା ରଖିଛନ୍ତି । ବ୍ଲକରେ ବ୍ୟାପକ ଅର୍ଥ ବାଟମାରଣା ଚାଲିଥିବା ନେଇ ସେ ପୂର୍ବରୁ ବାରମ୍ବାର ପ୍ରଶାସନିକ ଉଚ୍ଚପଦସ୍ଥ ଅଧିକାରୀଙ୍କୁ ସତର୍କ କରାଇଥିଲେ ମଧ୍ୟ କେହି ଏହାକୁ ଗୁରୁତ୍ୱ ଦେଇ ନଥିଲେ । ପୂର୍ବରୁ ଅନିୟମିତତା ଅଭିଯୋଗରେ ଜଣେ କମ୍ପ୍ୟୁଟର ପ୍ରୋଗ୍ରାମର ନିଲମ୍ବିତ ହୋଇଛନ୍ତି । ଏବେ କୋଟିଏରୁ ଉର୍ଦ୍ଧ୍ୱ ଟଙ୍କା ଗାଏବ ହେବା ପ୍ରଶାସନିକ ଦୁର୍ନୀତିକୁ ପଦାରେ ପକାଇଛି । ସରକାରୀ ଅର୍ଥ ହରିଲୁଟ୍ ଘଟଣା ଏବେ ସମଗ୍ର ଜିଲାରେ ବୁଦ୍ଧିଜୀବୀ ମହଲରେ ତୀବ୍ର ଅସନ୍ତୋଷ ସୃଷ୍ଟି କରିଛି । କେନ୍ଦ୍ରାପଡ଼ା ସଦର ଥାନା ପୋଲିସ ଏହି ମାମଲାରେ ଖୁବ୍ ଶୀଘ୍ର ଆର୍ଥôକ କାରବାର ତଥ୍ୟ, ଚେକ୍ ଓ ଅନଲାଇନ୍ ଟ୍ରାନ୍ସଫର ରେକର୍ଡ ଜବତ କରି ସମ୍ପୃକ୍ତ ଅଧିକାରୀ ଓ ହିତାଧିକାରୀଙ୍କୁ ଜେରା କରିବ ବୋଲି ଏସପି ସିଦ୍ଧାର୍ଥ କଟ୍ଟାରିଆ ସୂଚନା ଦେଇଛନ୍ତି ।
