କେନ୍ଦ୍ରାପଡ଼ା, ୧୦/୦୮/୨୦୨୬ (ଓଡ଼ିଶା ସମାଚାର)- ନିଖିଳ ଓଡିଶା ଆଶାକର୍ମୀ ସଂଘ କେନ୍ଦ୍ରାପଡା ଜିଲା କମିଟି ପକ୍ଷରୁ ମୁଖ୍ୟମନ୍ତ୍ରୀଙ୍କ ଉଦେଶ୍ୟରେ ଜିଲା ମୁଖ୍ୟ ଚିକିତ୍ସା ଅଧିକାରୀଙ୍କ ଜରିଆରେ ଏକ ୯ଦଫା ସମ୍ବଳିତ ଦାବିପତ୍ର ପ୍ରଦାନ କରାଯାଇଛି । ସେହି ଦାବିପତ୍ରରେ ଉଲ୍ଲେଖ ରହିଛି ଯେ ଆମ ଦେଶ, ରାଜ୍ୟ ଓ ଜିଲାରେ ସ୍ୱାସ୍ଥ୍ୟସେବାର ଉନ୍ନତି ସହିତ ମା’ ଶିଶୁର ଯତ୍ନ ତଥା ମୃତୁ୍ୟହାରକୁ କମାଇବା ପାଇଁ ୨୦୦୬ମସିହାରୁ ଆଜି ପର୍ଯ୍ୟନ୍ତ ୨୦ବର୍ଷ ଧରି ବିନା ପାରିଶ୍ରମିକରୁ ବର୍ତମାନ ନିଶ୍ଚିତ ଭତା ୭ହଜାର ୪ଶହ ଟଙ୍କା ପର୍ଯ୍ୟନ୍ତ ପାଇ ଆମେ ନିଜ ଜୀବନ ଓ ପରିବାରକୁ ପଛ କରି ସେବା ଯୋଗାଇ ଦେଇ ଆସୁଛୁ ।
ଫଳରେ ଆମ ଜିଲା ଠାରୁ ଦେଶ ପର୍ଯ୍ୟନ୍ତ ସ୍ୱାସ୍ଥ୍ୟ ସେବାର ଉନ୍ନତି ହୋଇଛି । ବନ୍ୟା, ବାତ୍ୟା ସମୟରେ ଆଶାମାନଙ୍କ କାର୍ଯ୍ୟ ଦେଖି ତାଙ୍କୁ ମୁଖ୍ୟମନ୍ତ୍ରୀ ସମ୍ମାନିତ କରିଛନ୍ତି । କିନ୍ତୁ ଦୁଃଖର କଥା ଆଶାକର୍ମୀମାନଙ୍କୁ ସାମାଜିକ ସୁରକ୍ଷା ଓ ଆର୍ଥିକ ନିରାପତା ପ୍ରଦାନ କରାଯାଉନାହିଁ । ତେଣୁ ଆଶାକର୍ମୀଙ୍କୁ ସର୍ବନିମ୍ନ ମାସିକ ୨୬ହଜାର ଟଙ୍କା ଦରମା ପ୍ରଦାନ, ପଦୋନ୍ନତି ଓ ମାସିକ ପେନସନ ସର୍ବନିମ୍ନ ୫ହଜାର, ପ୍ରତ୍ୟେକ ଗ୍ରାମରେ ଆଶାଗୃହ ନିର୍ମାଣ, ଡୁ୍ୟଟି ବେଳେ ମୃତୁ୍ୟ ହେଲେ ପରିବାରର ଜଣଙ୍କୁ ଆଶାକର୍ମୀ ଚୟନ କରାଯିବା, ଏନ.ଏଚ.ଏମ.ର ସମସ୍ତ କର୍ମଚାରୀଙ୍କୁ ସରକାରୀ ଚାକିରୀ ମାନ୍ୟତା, ଜିଲା ମୁଖ୍ୟ ଚିକିତ୍ସାଳୟ ସମେତ ସିଏଚସିରେ ଭଲ ଆଶାଗୃହ ଯୋଗାଇ ଦିଆଯିବା, ଆଶାକର୍ମୀଙ୍କ କାମ ସୁପରିଚାଳନା ପାଇଁ ବଡ ମୋବାଇଲ ସେଟ୍ ଓ ସ୍କୁଟି ଯୋଗାଇଦେବା, ଘରୋଇ ଡାକ୍ତରଖାନାକୁ ରୋଗୀ ଗଲେ ଆଶାକର୍ମୀଙ୍କୁ ତାର ପ୍ରାପ୍ୟ ପ୍ରଦାନ କରାଯିବା ଓ ବାର୍ଷିକ ୧୦ହଜାର ଟଙ୍କା ତୁରନ୍ତ ପ୍ରଦାନ କରାଯିବା ଭଳି ଦାବି ଗୁଡିକ ରହିଛି ।
ଜିଲା ମୁଖ୍ୟ ଚିକିତ୍ସାଧିକାରୀଙ୍କ ଅନୁପସ୍ଥିତିରେ ଡାକ୍ତରଖାନାର ପ୍ରଶାସକ ଦିଲ୍ଲିପ କୁମାର ନାୟକ ମୁଖ୍ୟମନ୍ତ୍ରୀଙ୍କ ଉଦେଶ୍ୟରେ ସଂଘ ପକ୍ଷରୁ ଦାବିପତ୍ର ଗ୍ରହଣ କରିଥିଲେ । ଦାବିପତ୍ର ପ୍ରଦାନ ସମୟରେ ଜିଲ୍ଲା ସଂଘ ସଭାପତି ବିକାଶ ଚନ୍ଦ୍ର ବେଉରା, ଉପସଭାପତି ଭଜହରି ପ୍ରଧାନ, କୋଷାଧ୍ୟକ୍ଷ ନନ୍ଦିନୀ ସ୍ୱାଇଁ, ଜୟନ୍ତୀ ବାରିକ ଓ ଉପଦେଷ୍ଟା ଆଇନଜୀବୀ ରମଣୀରଞ୍ଜନ ରାଉତରାୟ ପ୍ରମୁଖ ଉପସ୍ଥିତ ଥିଲେ ।
