କେନ୍ଦ୍ରାପଡ଼ା, ୨୨/୦୭/୨୦୨୬ (ଓଡ଼ିଶା ସମାଚାର)- ପାରାଦୀପସ୍ଥିତ ଷ୍ଟେଟବ୍ୟାଙ୍କ ଆଂଚଳିକ ବାଣିଜ୍ୟ କାର୍ଯ୍ୟାଳୟ ପକ୍ଷରୁ କେନ୍ଦ୍ରାପଡା ଷ୍ଟେଟବ୍ୟାଙ୍କ ମୁଖ୍ୟଶାଖା ସମ୍ମିଳନୀ କକ୍ଷରେ ବୁଧବାର ଅପରାହ୍ନରେ ଷ୍ଟେଟବ୍ୟାଙ୍କ ପେନସନର୍ସମାନଙ୍କ ସମସ୍ୟା ସମାଧାନ ଆଲୋଚନାଚକ୍ର ଅନୁଷ୍ଠିତ ହୋଇଯାଇଛି ।
କେନ୍ଦ୍ରାପଡା ଷ୍ଟେଟବ୍ୟାଙ୍କ ମୁଖ୍ୟଶାଖାର ମୁଖ୍ୟ ପରିଚାଳକ ଅର୍କଜ୍ୟୋତି ଭଟ୍ଟାଚାର୍ଯ୍ୟ ଏହି ବୈଠକରେ ପୌରୋହିତ୍ୟ କରିଥିଲେ । ଷ୍ଟେଟବ୍ୟାଙ୍କ ଆଂଚଳିକ ବାଣିଜ୍ୟ କାର୍ଯ୍ୟାଳୟ,ପାରାଦୀପର ମାନବସମ୍ବଳ ପରିଚାଳକ ଶକ୍ତିପ୍ରସନ୍ନ ପତି ବୈଠକ ପରିଚାଳନା କରିବା ସହ ପେନସନର୍ସମାନଙ୍କ ବିଭିନ୍ନ ସମସ୍ୟା ସମ୍ପର୍କରେ ଆଲୋଚନା କରିଥିଲେ । ଷ୍ଟେଟବ୍ୟାଙ୍କ ପେନସନର୍ସ ସଂଘ ଓଡିଶା ସର୍କଲର ଆଂଚଳିକ ସମ୍ପାଦକ ଗଣେଶ୍ୱର ମେକାପ ବିଭିନ୍ନ ସମସ୍ୟା ଉତ୍ଥାପନ କରିବା ସହ ପାରାଦୀପ ଆଂଚଳିକ କାର୍ଯ୍ୟାଳୟର ଷ୍ଟେଟବ୍ୟାଙ୍କ ଡିସପେନ୍ସରୀ(ଚିକିତ୍ସାକେନ୍ଦ୍ର) ସହ ଡାଇଗ୍ନୋଷ୍ଟିକ ସେଂଟରର ସୁପାରିଶ କରିବା ନିମନ୍ତେ ଦୀର୍ଘଦିନର ଦାବିକୁ ବ୍ୟାଙ୍କ କର୍ତୃପକ୍ଷ ବାରମ୍ବାର ଅଣଦେଖା କରୁଥିବାରୁ ଗଭୀର ଉଦବେଗ ପ୍ରକାଶ କରିଥିଲେ ।
ମୁଖ୍ୟପରିଚାଳକ ଶ୍ରୀ ଭଟ୍ଟାଚାର୍ଯ୍ୟ ଓ ମାନବସମ୍ବଳ ପରିଚାଳକ ଶ୍ରୀ ପତି ଡାଇଗ୍ନୋଷ୍ଟିକ ସେଂଟର ଖୋଲାଯିବାକୁ ସୁପାରିଶ କରାଯିବ ବୋଲି ଦୃଢ ପ୍ରତିଶୃତି ଦେଇଥିଲେ । ବୈଠକରେ ଷ୍ଟେଟବ୍ୟାଙ୍କ ପେନସନର୍ସ ସଂଘର ମାଧବାନନ୍ଦ ମହାପାତ୍ର, ଶରତ କୁମାର ମୁଦୁଲି, ଦୁର୍ଯେ୍ୟାଧନ ସେଠୀ, ଗୋଳକ ବିହାରୀ ବେହେରା,ଏସାନ ମହମ୍ମଦ, ନିତ୍ୟାନନ୍ଦ ସେଠୀ, ପରମାନନ୍ଦ ସେଠୀ, ରବିନ ଗୋଛାୟତ, ହରିହର ଗୋଛାୟତ, ଜିତେନ ଗୋଛାୟତ, ହରିପଦ ପଣ୍ଡା ପ୍ରମୁଖ ଆଲୋଚନାରେ ଅଂଶଗ୍ରହଣ କରିଥିଲେ । ଶେଷରେ ଆଂଚଳିକ ସମ୍ପାଦକ ଶ୍ରୀ ମେକାପ ଧନ୍ୟବାଦ ଅର୍ପଣ କରିଥିଲେ ।
