ମୁଖ୍ୟ ଶାସନ ସଚିବ ଙ୍କ ଅଧ୍ୟକ୍ଷତାରେ ବୈଠକ ଅନୁଷ୍ଠିତ
ଭୁବନେଶ୍ୱର, ୧୦/୦୧/୨୦୨୪ (ଓଡ଼ିଶା ସମାଚାର/ଦୀପ୍ତିରଂଜନ କାନୁନଗୋ)-ଆସନ୍ତା ୧୯ତାରିଖରୁ ତିନିଦିନ ଧରି ଝାରସୁଗୁଡ଼ା ଠାରେ ଭାରତୀୟ ଉଦ୍ୟୋଗ ପରିସଂଘ (ସିଆଇଆଇ) ତରଫରୁ ଏନ୍ଟରପ୍ରାଇଜ୍, ଓଡ଼ିଶା ସମ୍ମିଳନୀ ଅନୁଷ୍ଠିତ ହେବାକୁ ଯାଉଛି । ଝାରସୁଗୁଡା ପ୍ରଦର୍ଶନୀ ପଡିଆ ଠାରେ ଅନୁଷ୍ଠିତ ହେବାକୁ ଥିବା ସିଆଇଆଇର ଏହି ୨୪ ତମ ସମ୍ମିଳନୀ ଆୟୋଜନ ସଂପର୍କରେ ଏହାର ପ୍ରସ୍ତୁତି, କାର୍ଯ୍ୟକ୍ରମର ରୁପରେଖ ଓ ରାଜ୍ୟ ସରକାରଙ୍କ ସହଯୋଗ ସଂପର୍କରେ ଏକ ବୈଠକ ଲୋକସେବା ଭବନ ଠାରେ ମୁଖ୍ୟ ଶାସନ ସଚିବ ଶ୍ରୀ ପ୍ରଦୀପ କୁମାର ଜେନାଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଯାଇଛି । ପୂର୍ବରୁ ଭୁବନେଶ୍ୱରେ ଏହି ସମ୍ମିଳନୀ ଅନୁଷ୍ଠିତ ହେଉଥିବା ବେଳେ ପ୍ରଥମ ଥର କରି ଏହା ଝାରସୁଗୁଡ଼ା ଠାରେ ଏହା ଅନୁଷ୍ଠିତ ହେବାକୁ ଯାଉଛି । ଓଡ଼ିଶା ବିଶେଷ କରି ଝାରସୁଗୁଡା ଏବଂ ପଶ୍ଚିମ ଓଡିଶାରେ ଶିଳ୍ପ ଓ ଆନୁଷଙ୍ଗିକ କ୍ଷେତ୍ରରେ ପୁଞ୍ଜିନିବେଶ ସୁଯୋଗ, ଅଣୁ, କ୍ଷୁଦ୍ର ଓ ମଧ୍ୟମ ଉଦ୍ୟୋଗ (ଏମଏସଏମଏମଇ) ଗୁଡ଼ିକୁ ବ୍ୟବସାୟିକ ସୁଯୋଗ ଦେବା ଓ ସେସବୁକୁ ବୃହତ୍ ଶିଳ୍ପ ସଂସ୍ଥା ସହିତ ଯୋଡ଼ିବା, ମହିଳା ଉଦ୍ୟୋଗୀ ଓ ଷ୍ଟାର୍ଟଅପ୍ ଗୁଡିକୁ ପ୍ରୋତସାହନ ଦେବା ଏହି ସମ୍ମିଳନୀର ମୁଖ୍ୟ ଉଦ୍ଧେଶ୍ୟ । 
ଏଥିରେ ଶତାଧିକ କମ୍ପାନୀ, ଶିଳ୍ପ ସଂସ୍ଥାର ମୁଖ୍ୟ କାର୍ଯ୍ୟର୍ନିବାହୀ ଅଧିକାରୀ, ମୁଖ୍ୟ ଅଭିଜ୍ଞତା ଅଧିକାରୀ(ସିଏକ୍ସଓ), କ୍ରୟ ପରିଚାଳକଙ୍କ ସମେତ ଦେଶ ବିଦେଶର ଶିଳ୍ପ ପ୍ରତିନିଧିମାନେ ଯୋଗ ଦେବାର କାର୍ଯ୍ୟକ୍ରମ ରହିଛି । ଏହାର ପ୍ରସ୍ତୁତି ସଂପର୍କରେ ସିଆଇଆଇର ଅଧ୍ୟକ୍ଷ ଶ୍ରୀ ଶଶୀ ଶେଖର ମହାନ୍ତି ବିଶେଷ ଭାବେ ଉପସ୍ଥାପନ କରିଥିଲେ । ଏହି କାର୍ଯ୍ୟକ୍ରମର ପ୍ରଥମ ଦିନ ପ୍ରାରମ୍ଭିକ ଅଧିବେଶନରେ ଭିଜନ ଓଡ଼ିଶା- ୨୦୩୦, ଏବଂ ରାଜ୍ୟ ତଥା ଦେଶର ଆର୍ଥିକ ବିକାଶକୁ ତ୍ୱରାନ୍ୱିତ କରିବାରେ ବିଜୁ ଇକୋନୋମିକ୍ କରିଡରର ଭୂମିକା, ଆୟୋଜିତ ଶିଳ୍ପ ପ୍ରଦର୍ଶନୀ ଉଦଘାଟନ ସହିତ ଓଡ଼ିଶା ତଥା ପଶ୍ଚିମ ଓଡିଶାରେ ଶିଳ୍ପକୁ ନେଇ ରହିଥିବା ବିଭିନ୍ନ ସୁଯୋଗ ସଂପର୍କରେ ଆଲୋଚନା ସହ ବିଭିନ୍ନ ଶିଳ୍ପ ସଂସ୍ଥାରୁ ଯୋଗଦେଇଥିବା ପ୍ରତିନିଧିମାନେ ସେମାନଙ୍କର ଅଭିଜ୍ଞତା ବାଂଟିବେ । ଏହି ପ୍ରଦର୍ଶନୀରେ ବହୁ ଶିଳ୍ପ ସଂସ୍ଥା ଅଂଶଗ୍ରହଣ କରିବେ ଯାହାକି ସ୍ଥାନୀୟ ଓ ସମ୍ଭାବ୍ୟ ଉଦ୍ୟୋଗୀମାନଙ୍କୁ ଉତ୍ସାହିତ କରିବ । ୨ୟ ଦିବସରେ ଦକ୍ଷତା ବିକାଶ, କୃଷି ଓ ଖାଦ୍ୟ ପ୍ରକ୍ରିୟା କରଣ, ଷ୍ଟାର୍ଟ ଅପ୍ ସଂମ୍ବନ୍ଧୀୟ କାର୍ଯ୍ୟକ୍ରମ ଅନୁଷ୍ଠିତ ହେବ । ବିଭିନ୍ନ ଦିବସରେ ଓଡ଼ିଶାର ମାନ୍ୟବର ମୁଖ୍ୟମନ୍ତ୍ରୀ, ଅନ୍ୟ ମନ୍ତ୍ରୀଙ୍କ ସମେତ ରାଜ୍ୟ ପ୍ରଶାସନର ବରିଷ୍ଠ ପ୍ରଶାସନିକ ଅଧିକାରୀ, ଶିଳ୍ପ ସଂସ୍ଥାର ପ୍ରତିନିଧିମାନଙ୍କୁ ଯୋଗଦେବା ପାଇଁ ଅନୁରୋଧ କରାଯାଇଛି । ସେହପରି ପଶ୍ଚିମ ଓଡିଶାର ବିଭିନ୍ନ ଜିଲାର ଜିଲାପାଳମାନେ ମଧ୍ୟ ଯୋଗଦେବା ର କାର୍ଯ୍ୟକ୍ରମ ରହିଛି । ସମ୍ମିଳନୀରେ ଶିଳ୍ପ ଉତ୍ପାଦ, ଭିତିଭୂମି ଓ ଆନୁଷଙ୍ଗିକ ସୁବିଧା ସୃଷ୍ଟି, ଶିଳ୍ପ କ୍ଷେତ୍ରରେ ନିରନ୍ତରତା ସମାଧାନ ଓ ଶକ୍ତି ଦକ୍ଷତା ଉତ୍ପାଦନ ଶିଳ୍ପ କ୍ଷେତ୍ରରେ ପବନ, ସୌରଶକ୍ତି ଓ ବ୍ୟାଟେରୀର ବ୍ୟବହାର ଏବଂ ଉତ୍ପାଦଗୁଡିକର ସଂରକ୍ଷଣ, ଶିଳ୍ପ ନିରାପତା ପ୍ରସଙ୍ଗ, ବୈଷୟିକ ଜ୍ଞାନକୈଶଳ, ସୂଚନା ଓ ପ୍ରଯୁକ୍ତି ବିଦ୍ୟାର ଉପଯୋଗ, ଯାନ୍ତ୍ରିକ ଓ ବୈଦ୍ୟୁତିକ ପୁଞ୍ଜି ସାମଗ୍ରୀ, ରସାୟନିକ ଓ ପେଟ୍ରୋକେମିକାଲ୍ସ, ଧାତବ ଶିଳ୍ପ କ୍ଷେତ୍ରରେ ର୍ନିଭରଶୀଳ ଆନୁଷଙ୍ଗିକ ଶିଳ୍ପ, ବିରଳ ମୃତିକା ଖଣିଜ ପଦାର୍ଥ ଆଧାରିତ ମୂଲ୍ୟଯୁକ୍ତ ଉତ୍ପାଦ ଏବଂ ଆର୍ଥିକ ସହାୟତା ପ୍ରସଙ୍ଗରେ ମଧ୍ୟ ଆଲୋଚନା କରାଯିବ । ବୈଠକରେ ଅନ୍ୟମାନଙ୍କ ମଧ୍ୟରେ ଉନ୍ନୟନ କମିଶନର ତଥା ଅତିରିକ୍ତ ମୁଖ୍ୟ ଶାସନ ସଚିବ ଶ୍ରୀମତୀ ଅନୁ ଗର୍ଗ, କୃଷି ଓ କୃଷକ ସଶକ୍ତିକରଣ ବିଭାଗ ପ୍ରମୁଖ ଶାସନ ସଚିବ ଡଃ.ଅରବିନ୍ଦ କୁମାର ପାଢ଼ୀ, ଶିଳ୍ପ ବିଭାଗ ପ୍ରମୁଖ ଶାସନ ସଚିବ ହେମନ୍ତ କୁମାର ଶର୍ମା, ଗ୍ରାମ୍ୟ ଉନ୍ନୟନ, ସୂଚନା ଓ ଲୋକସଂପର୍କ ବିଭାଗ ପ୍ରମୁଖ ଶାସନ ସଚିବ ଶ୍ରୀ ସଞ୍ଜୟ କୁମାର ସିଂ, ଇପିକଲ ପରିଚାଳନା ନିର୍ଦ୍ଧେଶକ ଶ୍ରୀ ଭୂପେନ୍ଦ୍ର ସିଂ ପୁନିଆ, ସିଆଇର ଉପାଧ୍ୟକ୍ଷ ଡଃ.ପ୍ରଦୀପ୍ତ ମହାନ୍ତି, ଆଂଚଳିକ ନିର୍ଦ୍ଧେଶକ ଜୋନ କୁରୁଭିଲା, ରାଜ୍ୟ ମୁଖ୍ୟ ଅଶୋକ ବାରାତ୍, ରାଜ୍ୟ ଶିଳ୍ପ ବିଭାଗର ଅନ୍ୟ ପଦାଧିକାରୀ ପ୍ରମୁଖ ଉପସ୍ଥିତ ରହି ଆଲୋଚନାରେ ଅଂଶଗ୍ରହଣ କରିଥିଲେ ।
