ବାଇକରେ ସାଇଡ୍ ମରାକୁ ନେଇ ଦୁଇ ଗୋଷ୍ଠି ମଧ୍ୟରେ ହାତାହାତି

କେନ୍ଦ୍ରାପଡ଼ା, ୨୫/୮/୨୦୨୪ (ଓଡ଼ିଶା ସମାଚାର)- କଟକ – ଚାନ୍ଦବାଲି ରାସ୍ତାର ତିନିମୂହାଣୀଛକରୁ ମାରୁତି ଛକ ଯିବା ବେଳେ ଜନୈକ ଯୁବକଙ୍କୁ ୪ ଜଣ ଦୁର୍ବୁତ ବାଇକରେ ଆସି ପ୍ରଥମେ ସାଇଡ୍ ମାରିଥିଲେ । ଯୁବକ ଜଣଙ୍କ ପ୍ରତିବାଦ କରିବାରୁ ସେମାନେ ତାକୁ ଆକ୍ରମଣ କରିଥିଲେ । ଯୁବବକର ପାଟି ଶୁଣି ସେଠାରେ ଅନ୍ୟମାନେ ପହଂଚି ଯାଇଥିଲେ । ଫଳରେ ଏହି ଘଟଣାକୁ ନେଇ ମାରୁତି ଛକରେ ଦୁଇ ଗୋଷ୍ଠୀ ମଧ୍ୟରେ ହାତାହାତି ହୋଇଥିଲା । ଉଭୟ ପକ୍ଷଙ୍କ ମଧ୍ୟରେ ପ୍ରଥମେ ମାଡପିଟ୍ ଓ ପରେ ଗଣ୍ଡଗୋଳ ହେବାରୁ ଏସମ୍ପର୍କରେ ଖବର ପାଇ ସଦର ଥାନା ଅଧିକାରୀ ସରୋଜ ସାହୁ ପୋଲିସ୍ ଫୋର୍ସ ସହିତ ଘଟଣା ସ୍ଥଳରେ ପହଂଚି ଥିଲେ । ପୋଲିସ ଆକ୍ରମଣକାରୀ ଦୁର୍ବୁତ ମାନଙ୍କୁ ଅଟକ ରଖିବା ସହ ଦୁଇଟି ବାଇକ୍ ଘଟଣାସ୍ଥଳରୁ ଜବତ୍ କରିଛି । ଘଟଣା ସ୍ଥଳରେ ଏକ ପ୍ଲାଟୁନ୍ ପୋଲିସ୍ ଫୋର୍ସ ମୁତୟନ କରାଯାଇଛି । କେନ୍ଦ୍ରାପଡ଼ା ଏସଡିପିଓ ଦେବେନ୍ଦ୍ର ମଲ୍ଲିକ ଏବଂ ଟାଉନ ଥାନା ଅଧିକାରୀ ଦୀଲ୍ଲିପ ସାହୁ ଘଟ୍ଟଣା ସ୍ଥଳରେ ପହଂଚି କଡା ସୁରକ୍ଷା ବ୍ୟବସ୍ଥା କରିବା ସହ ଘଟଣା ଉପରେ ତୀକ୍ଷଣ ନଜର ରଖିଛନ୍ତି । ଘଟଣା ସ୍ଥଳରୁ କୌଣସି ମାରଣାସ୍ତ୍ର ଜବତ୍ ହୋଇନଥିବା ସଦର ପୋଲିସ ସୂଚନା ଦେଇଛି । ସେହି ଅଂଚଳରେ ଥିବା ସିସିଟିଭିକୁ ଯାଂଚ କରିବା ପାଇଁ ଆରକ୍ଷୀ ଅଧୀକ୍ଷକ ସିଦ୍ଧାର୍ଥ କାଟାରିଆ ନିର୍ଦ୍ଧେଶ ଦେଇଛନ୍ତି ।