ଯାଜପୁର,୨୩/୧୦/୨୦୨୬(ଓଡ଼ିଶା ସମାଚାର)- ଯାଜପୁର ଜିଲ୍ଲାରେ ସାଇବର ଠକେଇରୁ ସୁରକ୍ଷା ଏବଂ କିଶୋରୀ ବାଳିକାମାନଙ୍କ ଆଇନଗତ ଅଧିକାର ସମ୍ପର୍କରେ ସଚେତନତା ସୃଷ୍ଟି ନିମନ୍ତେ ଏକ ଜିଲ୍ଲାସ୍ତରୀୟ କର୍ମଶାଳା ଜିଲ୍ଲା ସମାଜ ମଙ୍ଗଳ ଅଧିକାରୀ ଶ୍ରୀମତୀ ପାର୍ବତୀ ସାହୁଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଥିଲା।
କର୍ମଶାଳାରେ ପୋଲିସ ବିଭାଗ ପକ୍ଷରୁ ଇନିସ୍ପେକଟର ସାଇବର ସେଲ ଶ୍ରୀ ସମରଜିତ ନାୟକ ସାଇବର ଠକେଇର ବିଭିନ୍ନ ପ୍ରକାର, ଅନଲାଇନ୍ ଠକେଇରୁ ସୁରକ୍ଷିତ ରହିବାର ଉପାୟ ଏବଂ ଡିଜିଟାଲ୍ କାରବାର ସମୟରେ ଅବଲମ୍ବନ କରିବାକୁ ଥିବା ସତର୍କତା ସମ୍ପର୍କରେ ଆଲୋକପାତ କରିଥିଲେ।
ସେହିପରି, ଜିଲ୍ଲା ଆଇନ ସେବା ପ୍ରାଧିକରଣ (DLSA) ପକ୍ଷରୁ ଶ୍ରୀ ପ୍ରଶାନ୍ତ ସାମନ୍ତ କିଶୋରୀ ବାଳିକାମାନଙ୍କ ଆଇନଗତ ଅଧିକାର, ସାମ୍ବିଧାନିକ ସୁରକ୍ଷା ବ୍ୟବସ୍ଥା ଏବଂ ନ୍ୟାୟ ପାଇବା ପାଇଁ ଉପଲବ୍ଧ ବିଭିନ୍ନ ଆଇନଗତ ମାଧ୍ୟମ ସମ୍ପର୍କରେ ବୁଝାଇଥିଲେ।
ଅନ୍ୟପକ୍ଷରେ, ସହକାରୀ ଜିଲ୍ଲା ମଙ୍ଗଳ ଅଧିକାରୀ (ADWO) ଶ୍ରୀମତୀ ମାଙ୍ଗଳିକା ରାଉତରାୟ ‘ବେଟି ବଚାଓ, ବେଟି ପଢ଼ାଓ’ ଯୋଜନା ଅଧୀନରେ ଆଦିବାସୀ ବିଦ୍ୟାଳୟଗୁଡ଼ିକରେ ବାଳିକାମାନଙ୍କ ଶିକ୍ଷା, ସୁରକ୍ଷା ଓ ସଶକ୍ତୀକରଣ ନିମନ୍ତେ ସଚେତନତା କାର୍ଯ୍ୟକ୍ରମ ଆୟୋଜନର ଆବଶ୍ୟକତା ଉପରେ ଗୁରୁତ୍ୱାରୋପ କରିଥିଲେ।
କର୍ମଶାଳାରେ ସାଇବର ଅପରାଧ ସମ୍ପର୍କରେ ସଚେତନତା ବୃଦ୍ଧି, କିଶୋରୀ ବାଳିକାମାନଙ୍କ ଅଧିକାରର ସୁରକ୍ଷା ଏବଂ ସେମାନଙ୍କୁ ଶିକ୍ଷିତ ଓ ସଶକ୍ତ କରିବା ଦିଗରେ ସମସ୍ତଙ୍କ ସମନ୍ୱିତ ପ୍ରୟାସର ଆବଶ୍ୟକତା ଉପରେ ଗୁରୁତ୍ୱ ଦିଆଯାଇଥିଲା।
