ବିଶିଷ୍ଟ ନାଟ୍ୟକାର ରମେଶ ପ୍ରସାଦ ପାଣିଗ୍ରାହୀ ପାଇବେ ନବଦାସ ସ୍ମାରକୀ ସମ୍ମାନ

ଭୁବନେଶ୍ୱର,୨୭/୦୧/୨୦୨୪ (ଓଡ଼ିଶା ସମାଚାର)-ଓଡ଼ିଶାର ପୂର୍ବତନ ଜନପ୍ରିୟ ସ୍ୱାସ୍ଥ୍ୟମନ୍ତ୍ରୀ ନବ କିଶୋର ଦାସଙ୍କ ପ୍ରଥମ ଶ୍ରାଦ୍ଧବାର୍ଷିକ ଏବଂ ନବ ଦାସ ସ୍ମୃତି ସମ୍ମାନ ଆସନ୍ତା ୨୯ ତାରିଖ, ସୋମବାର ସନ୍ଧ୍ୟାରେ ଭୁବନେଶ୍ୱରସ୍ଥିତ ଜୟଦେବ ଭବନରେ ଅନୁଷ୍ଠିତ ହେବ । ଏହି ସ୍ମୃତିସଭାରେ ଏମ୍ସର ପୂର୍ବତନ ନିର୍ଦ୍ଧେଶକ ଡା. ଅଶୋକ ମହାପାତ୍ର, ଅବସରପ୍ରାପ୍ତ ଲେଫ୍ଟନାନ୍ଟ ଜେନେରାଲ ନାରାୟଣ ମହାନ୍ତି ଓ ଶ୍ରୀ ଶ୍ରୀ ବିଶ୍ୱବିଦ୍ୟାଳୟର ପ୍ରତିଷ୍ଠାତା କୁଳପତି ପ୍ରଫେସର ଡଃ କୈଳାସ ଚନ୍ଦ୍ର ମିଶ୍ର ଯୋଗ ଦେବା ପାଇଁ ସମ୍ମତି ପ୍ରଦାନ କରିଛନ୍ତି ।
ଏହି ଅବସରରେ ପ୍ରଥମ ନବ ଦାସ ସ୍ମାରକୀ ସମ୍ମାନ ଓଡ଼ିଶା ନବନାଟ୍ୟ ଆନ୍ଦୋଳନର ଅନ୍ୟତମ ପୁରୋଧା ପ୍ରଫେସର ଡଃ ରମେଶ ପ୍ରସାଦ ପାଣିଗ୍ରାହୀଙ୍କୁ ପ୍ରଦାନ କରାଯିବ । ଏହି ପରିପ୍ରେକ୍ଷୀରେ ପ୍ରଫେସର ପାଣିଗ୍ରାହୀଙ୍କୁ ସ୍ମୃତି କମିଟି ପକ୍ଷରୁ ମାନପତ୍ର ସହିତ ଏକଲକ୍ଷ ଟଙ୍କାର ଅର୍ଥରାଶି ପ୍ରଦାନ କରାଯିବ ।
ଏହି ସ୍ମୃତିସଭାରେ ଯୋଗଦେଇ ସ୍ୱର୍ଗତ ନବ ଦାସଙ୍କୁ ଶ୍ରଦ୍ଧାଞ୍ଜଳି ଜଣାଇବା ନିମିତ ସ୍ମୃତି ପରିଷଦ ପକ୍ଷରୁ ସଭାପତି ତଥା ବରିଷ୍ଠ ସାମ୍ବାଦିକ ଶ୍ରୀଯୁକ୍ତ ପ୍ରଦୋଷ ପଟ୍ଟନାୟକ ସ୍ୱର୍ଗତ ଦାସଙ୍କର ବନ୍ଧୁ, ଶୁଭେଚ୍ଛୁ ଓ ସର୍ବସାଧାରଣଙ୍କୁ ଅନୁରୋଧ କରିଛନ୍ତି ।