ମାହାଙ୍ଗା,୦୯/୦୮/୨୦୨୫ (ଓଡିଶା ସମାଚାର /ଅଭୟ ଜେନା) – କଟକ ଜିଲ୍ଲା ମାହାଙ୍ଗା ବ୍ଲକ ଉଷୁମା ପଞ୍ଚାୟତ ର ଏକମାତ୍ର ଗୋଶାଳା ଅବହେଳିତ ଅବସ୍ଥାରେ ରହିଛି । ଦୀର୍ଘ ୧୬ ବର୍ଷ ଧରି ଅକ୍ଷୟ କୁମାର ଖଟୁଆ ସନ୍ଥ ଭୀମଭୋଇ ଙ୍କ ନାମରେ ଗୋଶାଳାଟି ସରକାରୀ ପଞ୍ଜୀକୃତ କରି ଅଦ୍ୟାବଧି ଚଳାଇ ଆସୁଛନ୍ତି । ଶ୍ରୀ ଖଟୁଆ ନିଜେ ଶିକ୍ଷକତା କରୁଥିବା ସମୟରୁ ଏଯାବତ୍ ଅବସର ନେବା ପରେ ମଧ୍ୟ ଗୋସେବା କରି ଆସୁଛନ୍ତି ।
କେବଳ ଖଟୁଆ ସାର ଏକୁଟିଆ ନୁହନ୍ତି, ବରଂ କିଛି ବଦାନ୍ୟ ବ୍ୟକ୍ତି ଅଳ୍ପବହୁତେ ଏଥିପାଇଁ ସାହାଯ୍ୟର ହାତ ବଢ଼ାଇ ଥାଆନ୍ତି । ମାସିକ ଗାଈ ଗୋରୁଙ୍କ ଗୋଖାଦ୍ୟ ଠାରୁ ଆରମ୍ଭ କରି ଔଷଧ, ଗୋ ସେବକ ଓ ବିଦ୍ୟୁତ ବିଲ୍ ପାଇଁ ପାଖାପାଖି ୧୫ ରୁ ୨୦ ହଜାର ଟଙ୍କା ଖର୍ଚ୍ଚ ହେଉଛି । ଆଜି ପବିତ୍ର ଗହ୍ମା ପୂର୍ଣ୍ଣମୀ ଅବସରରେ ପ୍ରାୟ ୧୫ ଗୋଟି ଗାଈ ଗୋରୁ ଙ୍କୁ ସ୍ନାନ କରି ସୁସ୍ୱାଦୁ ଖାଦ୍ୟ ଦେବାପରେ ପୂଜାର୍ଚ୍ଚନା କରି ପରମ୍ପରା ଅନୁଯାୟୀ ରାକ୍ଷୀ ବାନ୍ଧିଥିଲେ ।
ବଡ଼ କଥା ହେଉଛି କି ମାହାଙ୍ଗା ବ୍ଲକ ର ଏକମାତ୍ର ଉଷୁମା ପଞ୍ଚାୟତ ଅଂଚଳରେ ଏହି ଗୋଶାଳା ରହିଅଛି । ମାତ୍ର ସରପଂଚ ଙ୍କ ଠାରୁ ଆରମ୍ଭ କରି ବ୍ଲକ ପ୍ରଶାସନ , ସ୍ଥାନୀୟ ବିଧାୟକଙ୍କୁ ସାହାଯ୍ୟ ପାଇଁ ଶ୍ରୀ ଖଟୁଆ ନିବେଦନ କରିଥିଲେ ହେଁ ଅଦ୍ୟାବଧି କେହି ଦୃଷ୍ଟିପାତ କରି ନାହାନ୍ତି କିମ୍ବା ଗୋଶାଳା ପାଇଁ ସାହାଯ୍ୟର ହାତ ବଢ଼ାଇ ନାହାନ୍ତି । ତେବେ ଦେଖିବାକୁ ବାକି ରହିଲା, ଏହି ଗୋଶାଳା ପ୍ରତି କେବେ ଆସୁଛି ସରକାରୀ ସହାୟତା ।
