କେନ୍ଦ୍ରାପଡା,୦୮/୦୫/୨୦୨୪ (ଓଡ଼ିଶା ସମାଚାର)-ବିଭିନ୍ନ ରାଜନୈତିକ ଦଳର ପ୍ରାର୍ଥୀଙ୍କ ପାଇଁ ଆଜି ୯ଟି ମନୋନୟନ ପତ୍ର କିଣାଯାଇଥିବା ବେଳେ ଜଣେ ପ୍ରାର୍ଥୀ ଆଜି ନାମାଙ୍କନ ପତ୍ର ଦାଖଲ କରିଥିବା ଜଣାପଡିଛି । ମନୋନୟନ ପତ୍ର କିଣିଥିବା ପ୍ରା୍ରର୍ଥୀମାନଙ୍କ ମଧ୍ୟରେ ୯୬-ପାଟକୁରା ବିଧାନସଭା କ୍ଷେତ୍ର ପାଇଁ ବହୁଜନ ସମାଜ ପାର୍ଟିର ଚିଦାନନ୍ଦ ପରିଡାଙ୍କ ନାମରେ ମନୋନୟନପତ୍ର କିଣାଯାଇଥିବା ବେଳେ ଭାରତୀୟ ଜାତୀୟ କଂଗ୍ରେସର ରତିକାନ୍ତ କାନୁନଗୋ ଏବଂ ସ୍ୱାଧୀନ ପ୍ରାର୍ଥୀ ରୋହିତ ରୋସନ କାନୁନଗୋଙ୍କ ନାମରେ ମନୋନୟନ ପତ୍ର କିଣାଯାଇଛି । ୯୭-କେନ୍ଦ୍ରାପଡା (ଅନୁସୂଚିତ ଜାତି) ବିଧାନସଭା କ୍ଷେତ୍ର ନିମନ୍ତେ ଭାରତୀୟ ଜନତା ପାର୍ଟିର ଗୀତାଞ୍ଜଳି ସେଠୀ, ଭାରତୀୟ ଜାତୀୟ କଂଗ୍ରେସର ସିପ୍ରା ମଲ୍ଲିକ ଓ ସ୍ୱାଧୀନ ପ୍ରାର୍ଥୀ ମୁରଲୀଧର ସେଠୀଙ୍କ ନାମରେ ମନୋନୟନ ପତ୍ର କିଣାଯାଇଛି । ୯୮-ଆଳି ବିଧାନସଭା କ୍ଷେତ୍ର ପାଇଁ ଭାରତୀୟ ଜାତୀୟ କଂଗ୍ରେସର ଦେବସ୍ମିତା ଶର୍ମା ଓ ଭାରତୀୟ ଜନତା ପାର୍ଟିର କିଶୋର କୁମାର ପଣ୍ଡାଙ୍କ ନାମରେ ମନୋନୟନ ପତ୍ର କିଣାଯାଇଥିବା ବେଳେ ୧୦୦-ମହାକାଳପଡା ବିଧାନସଭା କ୍ଷେତ୍ର ନିମନ୍ତେ ଆପ୍ ପ୍ରାର୍ଥୀ ଦେବାଶିଷ ଦାଶଙ୍କ ନାମରେ ମନୋନୟନ ପତ୍ର କିଣାଯାଇଛି । ସେହିଭଳି ୧୫-କେନ୍ଦ୍ରାପଡା ଲୋକସଭା କ୍ଷେତ୍ର ନିମନ୍ତେ ସ୍ୱାଧୀନ ପ୍ରାର୍ଥୀ ପ୍ରତାପ ଚନ୍ଦ୍ର ମହାନ୍ତି ଓ ସମାଜବାଦୀ ପାର୍ଟି, ଓଡିଶାର ରବିନ୍ଦ୍ରନାଥ ବେହେରାଙ୍କ ନାମରେ ମନୋନୟନ ପତ୍ର କିଣାଯାଇଥିବା ସୂଚନା ମିଳିଛି । ୯୬-ପାଟକୁରା ବିଧାନସଭା କ୍ଷେତ୍ର ନିମନ୍ତେ ମାନସ ଲୋକଶକ୍ତି ଦଳ ପକ୍ଷରୁ ବରଦା ପ୍ରସାଦ ମଲ୍ଲିକ ଆଜି ମନୋନୟନ ପତ୍ର ଦାଖଲ କରିଛନ୍ତି । ଏଠାରେ ସୂଚନା ଯୋଗ୍ୟ ଯେ ୧୫-କେନ୍ଦ୍ରାପଡା ଲୋକସଭା କ୍ଷେତ୍ରର ରିଟର୍ଣ୍ଣିଂ ଅଫିସର ଭାବେ ସୂର୍ଯ୍ୟବଂଶୀ ମୟୂର ବିକାଶ ନିଯୁକ୍ତି ପାଇଥିବା ବେଳେ ୯୬-ପାଟକୁରା ଓ ୯୭-କେନ୍ଦ୍ରପଡା(ଅନୁସୂଚିତ ଜାତି) ବିଧାନସଭା କ୍ଷେତ୍ରର ରିଟର୍ଣ୍ଣିଂ ଅଫିସର ଭାବେ ରବିନ୍ଦ୍ର କୁମାର ପ୍ରଧାନ, ୯୮-ଆଳି ବିଧାନସଭା କ୍ଷେତ୍ରର ରିଟର୍ଣ୍ଣିଂ ଅଫିସର ଭାବେ ପିତାମ୍ବର ସାମଲ, ୯୯-ରାଜନଗର ବିଧାନସଭା କ୍ଷେତ୍ରର ରିଟର୍ଣ୍ଣିଂ ଅଫିସର ଭାବେ ନିଲୁ ମହାପାତ୍ର ଓ ୧୦୦-ମହାକାଳପଡା ବିଧାନସଭା କ୍ଷେତ୍ରର ରିଟର୍ଣ୍ଣିଂ ଅଫିସର ଭାବେ ଅଶୋକ କୁମାର ଦାସ ନିଯୁକ୍ତି ପାଇଛନ୍ତି । ଗତ ୭ ତାରିଖରୁ ସାଧାରଣ ନିର୍ବାଚନ ପାଇଁ ଆରମ୍ଭ ହୋଇଥିବା ମନୋନୟନ ପତ୍ର ଦାଖଲର ଶେଷ ତାରିଖ ଚଳିତମାସ ୧୪ ତାରିଖ ରହିଛି । ୧୫ ତାରିଖରେ ମନୋନୟନ ପତ୍ର ଯାଂଚ କରାଯିବାକୁ ଥିବାବେଳେ ୧୭ତାରିଖ ସୁଦ୍ଧା ମନୋନୟନ ପତ୍ର ପ୍ରତ୍ୟାହାର କରାଯାଇପାରିବ । ଆସନ୍ତା ଜୁନ୍ ୧ ତାରିଖରେ ଭୋଟ୍ଗ୍ରହଣ ହେବାକୁ ଥିବା ବେଳେ ଜୁନ୍ ୪ ତାରିଖରେ ଭୋଟ୍ ଗଣତି କରାଯିବ ବୋଲି ଜିଲା ନିର୍ବାଚନ ଅଧିକାରୀ ସୂଚନା ଦେଇଛନ୍ତି ।
୯ଜଣ ପ୍ରାର୍ଥୀଙ୍କ ନାମରେ ମନୋନୟନ ପତ୍ର କିଣାଯାଇଥିବା ବେଳେ ଗୋଟିଏ ନାମାଙ୍କନ ପତ୍ର ଦାଖଲ
![](https://eodishasamachar.com/wp-content/uploads/2024/04/Vote.jpg)