ଗୁଳିମାଡ଼ ରେ ଦୁଇ ଜଣ ବନ ବିଭାଗ କର୍ମଚାରୀ ଆହତ

ବୌଦ୍ଧ, ୨୯/୦୩/୨୦୨୩ (ଓଡ଼ିଶା ସମାଚାର)- ରାତି ପାଟ୍ରୋଲିଂ ବେଳେ ବନ ବିଭାଗ ଗାଡ଼ିକୁ ଅଜଣା ଦୁର୍ବୃତମାନେ ଗୁଳିମାଡ଼ କରିଥିବା ଖବର ହସ୍ତଗତ ହୋଇଛି। ୪/୫ ରାଉଣ୍ଡ ଗୁଳି ଚାଳନା ହୋଇଥିବା ବେଳେ ଦୁଇଟି ଗୁଳି ଗାଡ଼ିରେ ବାଜିଛି। ଏଥିରେ ଦୁଇଜଣ ବନ ବିଭାଗ କର୍ମଚାରୀ ଆହତ ହୋଇଛନ୍ତି। ଆହତ ଦୁଇ ବନ ବିଭାଗ କର୍ମଚାରୀଙ୍କୁ ବୌଦ୍ଧ ଜିଲ୍ଲା ମୁଖ୍ୟ ଡାକ୍ତରଖାନାରେ ଭର୍ତ୍ତି କରାଯାଇଛି।ସୂଚନା ଅନୁସାରେ, ଏସିଏଫ୍ ଆଶିଷ କହଁରଙ୍କ ନେତୃତ୍ବରେ ବୌଦ୍ଧ ରେଞ୍ଜ ଅଧୀନ ବଘିଆପଡ଼ା ସେକ୍ସନ ଅଞ୍ଚଳରେ ପାଟ୍ରୋଲିଂ ଚାଲିଥିଲା। ବଘିଆପଡ଼ା ନିକଟ ଖଲିଆପାଲି ଜଙ୍ଗଲ ରାସ୍ତାରେ ରାତି ପ୍ରାୟ ଦେଢ଼ଟା ବେଳେ ହଠାତ୍ ଗୁଳି ଫୁଟିଥିଲା। ପଛପଟରୁ ଆକ୍ରମଣ କରାଯାଇଥିଲା। ୪/୫ ରାଉଣ୍ଡ ଗୁଳି ଫୁଟିଥିବା ଅନୁମାନ କରାଯାଉଛି। ସେଥିମଧ୍ୟରୁ ଦୁଇଟି ଗୁଳି ଏସିଏଫଙ୍କ ସ୍ପର୍ପିଓ (ଓଡି-୨୭-ଏ-୨୭ଏ ୨୩୭୭) ରେ ବାଜିଛି। ପଛ କାଚର ଡାହାଣ ପଟରେ ବାଜିଥିବା ଗୁଳି ପଛ ସିଟରେ ବସିଥିବା ୱାଚର୍ ନିଳାଞ୍ଚଳ ପ୍ରଧାନ(୨୯) ଙ୍କ ଡାହାଣ କାନ୍ଧରେ ବାଜିଛି। ବାମ ପଟରେ ବାଜିଥିବା ଗୁଳି ଗାଡ଼ିର ଛାତ ମଧ୍ୟ ଦେଇ ଯାଇ ସାମ୍ନାପଟରୁ ବହାରିଛି। ପଛ ସିଟରେ ବସିଥିବା ୱାଚର ନବ କୁମାର ସାହୁ (୨୩) ନଇଁ ପଡ଼ିବାରୁ ଗୁଳିଟି ତାଙ୍କ ପିଠିରେ ଘସି ହୋଇ ଯାଇଛି।ଶିକାରୀମାନେ ଗୁଳି କରିଥିବା ସନ୍ଦେହ କରାଯାଉଛି । ଓଡ଼ିଶା ସମାଚାର