ଚୋରି ଗାଡ଼ି ଖଣ୍ଡ ଖଣ୍ଡ କରି ବିକୁଥିବା ଡକାୟତ ଗ୍ୟାଙ୍ଗ ଗିରଫ 

ନିଶ୍ଚିନ୍ତକୋଇଲି, ୧୮/୦୩/୨୦୨୩ (ଓଡିଶା ସମାଚାର/ ଅଭୟ ଜେନା )- ରାସ୍ତାରୁ ରାତିର ଅନ୍ଧାରରେ ଉଠାଇ ନେଉଥିଲେ ଚାରିଚକିଆ ଗାଡି। ଆଉ ସକାଳ ହେଲା ଭିତରେ ଗାଡିକୁ କାଟି ଖଣ୍ଡ ଖଣ୍ଡ କରି ବିକ୍ରି କରୁଥିଲେ। ଏମାଙ୍କର ନାମରେ କଟକ, ଯାଜପୁର ଓ ଭଦ୍ରକ ଅଞ୍ଚଳର ବିଭିନ୍ନ ଥାନାରେ ୧୫ରୁ ଅଧିକ ମାମଲା ଅଛି। ଏଭଳି ଏକ ଗାଡି ଡ଼କାୟତ ଗ୍ୟାଙ୍ଗକୁ ନିଶ୍ଚିନ୍ତକୋଇଲି ପୋଲିସ ଧରିବାରେ ସଫଳ ହୋଇଛି। ୩ ଜଣ ଡକାୟତ ଓ ଜଣେ ନାବାଳକ ଏହି ଘଟଣାରେ ଧରାପଡିଛନ୍ତି। ନାବାଳକକୁ ଛାଡି ଅନ୍ୟ ତିନିଜଣ ହେଲେ ଭଦ୍ରକ ଅଞ୍ଚଳର ଏସ କେ ଅବୁ ରାଜା ଓ ସୁକଦେଵ ମଳିକ ଏବଂ ନିଶ୍ଚିନ୍ତକୋଇଲି ଅଞ୍ଚଳର ମାରୁତି ବେହେରା। ଏମାନଙ୍କ ଠାରୁ ଦୁଇଟି ବୋଲେରୋ ଗାଡି ଜବତ ହୋଇଛି। ସେଥି ମଧ୍ୟରୁ ଗୋଟିଏ ଗାଡିକୁ ସମ୍ପୂର୍ଣ ଭାବେ ସେମାନେ କାଟି ଦେଇଛନ୍ତି। ଏମାନଙ୍କ ସମ୍ପୂର୍ଣ୍ଣ ଗ୍ୟାଙ୍ଗକୁ ପୋଲିସ ଧରିବାକୁ ଚେଷ୍ଟା ଚଳାଇଛି। ଏନେଇ ନିଶ୍ଚିନ୍ତକୋଇଲି ଥାନାରେ    ସାଲେପୁର ଏସ ଡି ପି ଓ ବିମଳ କୁମାର ବାରିକ ସୂଚନା ଦେଇଛନ୍ତି ।