ନିରାକାରପୁର କଲେଜ ସ୍ଥାୟୀ ପଟ୍ଟା ଦାବି ଜୋର ଧରିଲା

ନିରାକାରପୁର, ୨୩/୦୯/୨୦୨୨(ଓଡ଼ିଶା ସମାଚାର)- ବର୍ଷ ବର୍ଷ ଧରି ଖୋର୍ଦ୍ଧା ଜିଲ୍ଲା ନିରାକାରପୁରସ୍ଥିତ କ୍ଷେତ୍ରବାସୀ ଡ଼ିଏଭି ସର୍ବପୁରାତନ ବିଜ୍ଞାନ ମହାବିଦ୍ୟାଳୟର ସ୍ଥାୟୀ ଜମି ପଟ୍ଟା ପାଇଁ ଦାବି ହୋଇ ଆସୁଥିଲେ ବି ସତେ ଯେମିତି କେହି କର୍ଣ୍ରପାତ କରୁ ନଥିବା ଭଳି ମନେ ହେଉଛି । ଏହି କଲେଜର ସ୍ଥାୟୀ ପଟ୍ଟା ସମସ୍ୟାକୁ ନେଇ ସରକାର ସ୍ୱତନ୍ତ୍ର କ୍ୟାବିନେଟରେ ଜାଗା ନଥିବା କଲେଜ,ସ୍କୁଲଗୁଡ଼ିକୁ ସ୍ଥାୟୀ ପଟ୍ଟା ଯୋଗାଇବାକୁ ନିର୍ଦ୍ଧେଶନାମା ଥିବାବେଳେ କିନ୍ତୁ ଅଦ୍ୟାବଧି ବହୁ ସଂଖ୍ୟାରେ ସ୍କୁଲ ,କଲେଜକୁ ପଟ୍ଟା ଯୋଗାଣ କରାଯାଇଥିଳେ ବି ଏ ପର୍ଯ୍ୟନ୍ତ ନିରାକାରପୁର କଲେଜ ନାଁରେ ସ୍ଥାୟୀ ପଟ୍ଟା ନ ହେବା ବିଡ଼ମ୍ବନାର ବିଷୟ । ଏ ବିଷୟରେ ସ୍ଥାନୀୟ କିଛି ବରିଷ୍ଠ ବୁଦ୍ଧିଜୀବୀ ତୁରନ୍ତ ନିରାକାରପୁର କଲେଜକୁ ସ୍ଥାୟୀ ପଟ୍ଟା ପ୍ରଦାନ କରିବାକୁ ଦାବୀ କରିବା ସହ ବିଳମ୍ବ ହେଲେ ରାଜସ୍ୱ ବିଭାଗ କାର୍ଯ୍ୟାଳୟ ସମ୍ମୁଖରେ ଧାରଣାରେ ବସିବାକୁ ଧମକ ଦେଇଥିବା ଜଣାପଡ଼ିଛି । ନିରାକାରପୁରଠାରେ ୧୯୫୯ ମସିହାରୁ କ୍ଷେତ୍ରବାସୀ ଡ଼ିଏଭି ମହାବିଦ୍ୟାଳୟ ପ୍ରତିଷ୍ଠା ଲାଭ କରି ଦୀର୍ଘ ଛଅ ଦଶନ୍ଧିରୁ ଉର୍ଦ୍ଧ ବିଜ୍ଞାନ, କଳା ଓ  ବାଣିଜ୍ୟରେ ଗ୍ରାମାଳର ପିଲାମାନଙ୍କୁ ଉଚ୍ଚଶିକ୍ଷା ଆହୋରଣ କରାଇବାରେ ସୁନାମ ଅର୍ଜନ କରି ଆସୁଅଛି । ମାତ୍ର ମହାବିଦ୍ୟାଳୟ ନାମରେ ଜମି ପଟ୍ଟା ନ ଥିବା କାରଣରୁ ବିଶ୍ୱ ବ୍ୟାଙ୍କ, ରାଷ୍ଟ୍ରୀୟ ଉଚ୍ଚଶିକ୍ଷା ଅଭିଯାନ, ବିଶ୍ୱ ବିଦ୍ୟାଳୟ ଆୟୋଗ ଇତ୍ୟାଦିରୁ ସରକାରୀ ଆର୍ଥିକ ଅନୁଦାନ ପାଇବାରୁ ବଂଚିତ ହୋଇ ଏହି ପୁରାତନ ଶିକ୍ଷାନୁଷ୍ଠାନର ଆନୁସାଙ୍ଗିକ ବିକାଶ ହୋଇପାରୁନାହିଁ । ନିରାକାରପୁର ରାଜସ୍ୱ ଗ୍ରାମ ନନପଡ଼ା ମୈାଜାର ୮୪୨ ଖାତାରୁ ୧୨ଟି ପ୍ଲଟକୁ ମୋଟ ୧୦ ଏକର ସରକାରୀ ଜମିର ପଟ୍ଟା ପାଇବା ନିମନ୍ତେ ୧୯୮୯ ମସିହାରୁ ମହାବିଦ୍ୟାଳୟ ତରଫରୁ ବିଧିବଦ୍ଧ ଭାବରେ ଆବେଦନ କରାଯାଇ ଆଲିକେସନ କେସନଂ ୦୭/୧୯୮୯ ଦାୟର କରାଯାଇଛି । ଡ଼ିଆରଏମ କେସନଂ ୬/୯୦ ଅନୁସାରେ ଉକ୍ତ ଜମିର କିସମ ପରିବର୍ତର୍ନ କରାଯାଇ କ୍ଷେତ୍ରବାସୀ ଡ଼ିଏଭି ମହାବିଦ୍ୟାଳୟକୁ ଲିଜସୂତ୍ରେ ପଟ୍ଟା ଯୋଗାଇ ଦେବା ନିମନ୍ତେ ସମସ୍ତ ପ୍ରକ୍ରିୟା ଶେଷ ହୋଇଥିବାବେଳେ ଅଦ୍ୟାବଧି ଜମିପଟ୍ଟା ପ୍ରଦାନ କରାଯାଇ ନାହିଁ । ଅପରପାଶ୍ୱର୍ରେ ୨୫/୧୧/୨୦୨୧ରିଖରେ ରାଜସ୍ୱ ଓ ବିପର୍ଯ୍ୟୟ ପ୍ରଶମନ ବିଭାଗର ଗେଜେଟ ନୋଟିଫିକେସନ ଅନୁଯାୟୀ ମାର୍ଚ୍ଚ ୩ ତାରିଖ ୨୦୨୨ ଦିନ ରାଜ୍ୟର ବିଦ୍ୟାଳୟ, ଯୁକ୍ତ ଦୁଇ ଶିକ୍ଷା ଅନୁଷ୍ଠାନ ଓ ମହାବିଦ୍ୟାଳୟର ମୋଟ ୨ହଜାର ଶିକ୍ଷାଅନୁଷ୍ଠାନକୁ ରାଜ୍ୟ ସରକାର ବିନା ମୂଳ୍ୟରେ ୧୦ ଏକର ଲେଖାଁଏ ଜମି ପଟ୍ଟା ପ୍ରଦାନ କରାଯାଇଥିବା ଖବର ବିଭିନ୍ନ ଗଣମାଧ୍ୟମରୁ ଜଣାପଡ଼ିଛି  ।ଦୁଃଖ ଓ ପରିତାପର ବିଷୟ ଏହି ତାଲିକାରେ ମଧ୍ୟ କ୍ଷେତ୍ରବାସୀ ଡ଼ିଏଭି ପୁରାତନ ମହାବିଦ୍ୟାଳୟ ପଟ୍ଟା ପାଇବାରୁ ଏ ପର୍ଯ୍ୟନ୍ତ ବିତ ରହିଛି । ତେଣୁ ନିରାକାରପୁର ଅଂଚଳର ବିଭିନ୍ନ ସଂଗଠନ ଓ ବୁଦ୍ଧିଜୀବୀ , ପୁରାତନ ଛାତ୍ର ସଂସଦ ତୁରନ୍ତ ଏହି ମହାବିଦ୍ୟାଳୟକୁ ପଟ୍ଟା ପ୍ରଦାନ କରିବାକୁ ଦାବି କରିଛନ୍ତି । ଏ ସଂପର୍କରେ ରାଜସ୍ୱ ବିଭାଗ ମନ୍ତ୍ରୀଙ୍କଠାରୁ ଆରମ୍ଭ କରି ଜିଲ୍ଲାପାଳ,ଉପଜିଲ୍ଲାପାଳଙ୍କ ପର୍ଯ୍ୟନ୍ତ ସମସ୍ତଙ୍କୁ ଦାବୀ ପତ୍ର ଦିଆ ଯିବା ପାଇଁ ଆଜି ନିରାକାରପୁରରେ ଅନୁଷ୍ଠିତରେ ଏକ ବୈଠକରେ ରାଜନେତା, ବରିଷ୍ଠ ନାଗରିକ, ପୁରାତନ ଛାତ୍ର, ଶିକ୍ଷାବିତ ଓ ସାମ୍ବାଦିକମାନେ ଉପସ୍ତିତ ରହି ମତପ୍ରକାଶକରିଛନ୍ତି । ଆଜି ଏହି ବୈଠକରେ ପୂର୍ବତନ ସରପ ଲକ୍ଷ୍ମୀଧର ଆଚାର୍ଯ୍ୟ, ବରିଷ୍ଠ ନାଗରିକ  ସଂଘ ସଂପାଦକ ଦୀନବନ୍ଧୁ କର, ପୂର୍ବତନ ସରପ ହୃଷିକେଶ ରାୁରାୟ, ସମାଜସେବୀ ମୃତ୍ୟୁଞ୍ଜୟ ପ୍ରଧାନ, ଯୁବ ବିଜେଡ଼ି ଜିଲ୍ଲା ସଂପାଦକ ପ୍ରଭାତ କୁମାର ସ୍ୱାଇଁ, ସର୍ବେଶ୍ୱର ପାହାଡ଼ାସିଂହ, ସୁରେନ୍ଦ୍ର କୁମାର ସାହୁ, ରାମକୃଷ୍ଣ ପଟ୍ଟନାୟକ, ରଞ୍ଜନ କୁମାର ଦାଶ, ଲକ୍ଷ୍ମୀଧର ସାମନ୍ତରାୟ, ଦିବାକର ରାଉରାୟ, ବିଶ୍ୱଭୂଷଣ ସାମନ୍ତରାୟ, ପ୍ରଦୀପ କୁମାର ବେହେରା, ତପନ କୁମାର ସଦାମନ୍ତସିଂହାର ପ୍ରମୁଖଙ୍କ ସମେତ ବହୁ ଭଦ୍ରବ୍ୟକ୍ତି ଉପସ୍ଥତି ରହିଥିଲେ । ଓଡ଼ିଶା ସମାଚାର