ଜୀବନ ପାଇଁ ରାସ୍ତା  – ଲଭ ୩୦

ମିଳିତ ଜାତିସଂଘ ପକ୍ଷରୁ ବିଶ୍ୱ ସଡ଼କ ସୁରକ୍ଷା ସପ୍ତାହ, ୧୭ ରୁ ୨୩ ମଇଁ ୨୦୨୧

କଟକ ,୧୬/୦୫/୨୦୨୧(ଓଡ଼ିଶା ସମାଚାର/ଦେବାଶିଷ ରଥ)- ପୃଥିବୀରେ ସଡକ ଦୁର୍ଘଟଣାରେ ପ୍ରତିବର୍ଷ ପ୍ରାୟ ୧୩ ଲକ୍ଷ ୫୦ ହଜାର ଲୋକ ପ୍ରାଣ ହରାନ୍ତି। ଭାରତୀୟ ଉପମହାଦେଶରେ ସଡକ ଦୁର୍ଘଟଣା ଆଜି ଚିନ୍ତାର କାରଣ ପାଲଟିଛି। କେବଳ ୨୦୧୯ ରେ, ସଡ଼କ ଦୁର୍ଘଟଣା ଯୋଗୁଁ ଆମ ଦେଶ ଭାରତରେ ୧ ଲକ୍ଷ ୫୧ ହଜାରରୁ ଅଧିକ ଲୋକଙ୍କର ମୃତ୍ୟୁ ହୋଇଥିବାର ରିପୋର୍ଟ ହୋଇଛି। ପ୍ରତିବର୍ଷ ଦେଶର ଜିଡିପିର ପ୍ରାୟ ତିନି ରୁ ପାଞ୍ଚ ପ୍ରତିଶତ ସଡ଼କ ଦୁର୍ଘଟଣାରେ ନଷ୍ଟ ହୋଇଥିବା ଗଣନା କରାଯାଇଛି। ଅତ୍ୟଧିକ ଦ୍ରୁତ ଗତି, ସଡ଼କ ଦୁର୍ଘଟଣାର ଏକ ପ୍ରମୁଖ କାରଣ । ମିଳିତ ଜାତିସଂଘର ଆକଳନ ଅନୁଯାୟୀ ପୃଥିବୀରେ ପ୍ରାୟ ୬୦ ପ୍ରତିଶତ ଲୋକ ସହରାଞ୍ଚଳରେ ବାସ କରନ୍ତି । ସେହି ସହରଗୁଡ଼ିକରେ ସେମାନଙ୍କର ଜନ୍ମ । ସେମାନେ ସେହି ସହରଗୁଡ଼ିକରେ ବଡ଼ ହୋଇଛନ୍ତି । ସେମାନେ ସେମାନଙ୍କର ଜୀବନ ଜୀବିକା ସେଠି ନିର୍ବାହ କରନ୍ତି । କିନ୍ତୁ ସେମାନେ ଆଜି ସୁରକ୍ଷିତ ନୁହଁନ୍ତି । ସଡ଼କ ଦୁର୍ଘଟଣା ଯୋଗୁଁ ସହରର ଲୋକମାନେ ଅନେକ ସମୟରେ ମୃତ୍ୟୁବରଣ କରନ୍ତି  ।

ସର୍ବାଧିକ ସଡ଼କ ଦୁର୍ଘଟଣା ମୃତ୍ୟୁର କାରଣ – ଅତ୍ୟଧିକ ଗତି । ବର୍ତ୍ତମାନ ଓଡିଶାର ରାସ୍ତା ଦ୍ରୁତ ଗତି କାରଣରୁ ମୃତ୍ୟୁର ଜନ୍ତାରେ ପରିଣତ ହେଉଛି। ୨୦୧୯ ମସିହାରେ, ଓଡିଶାରେ ସମୁଦାୟ ୧୧,୦୬୪ ସଡ଼କ ଦୁର୍ଘଟଣା ଘଟିଥିଲା, ଯେଉଁଥିରେ ୧୧,୧୭୭ ଲୋକ ଆହତ ହୋଇଥିଲେ ଏବଂ ୫,୩୩୩ ଲୋକ ପ୍ରାଣ ହରାଇଥିଲେ । ଏହି ସଡ଼କ-ଦୁର୍ଘଟଣା ମଧ୍ୟରୁ ଯାନବାହାନର ଦ୍ରୁତ ଗତିରେ ପ୍ରାୟ ୬୯% ଲୋକ ପ୍ରାଣ ହରାଇଛନ୍ତି। ଯଦି ଆମେ ଭୁବନେଶ୍ୱର-କଟକ ଯୁଗ୍ମ ସହରର ଉଦାହରଣ ନେବା, ସର୍ବାଧିକ ସଡ଼କ ଦୁର୍ଘଟଣା ଏବଂ ମୃତ୍ୟୁ ପଛରେ ସବୁଠାରୁ ବଡ କାରଣ ହେଲା, ଦ୍ରୁତ ଗତି । ୨୦୧୯ ମସିହାରେ ଭୁବନେଶ୍ୱର-କଟକ ସହରରେ ୧,୦୫୧ ସଡ଼କ ଦୁର୍ଘଟଣାରେ ପ୍ରାୟ ୩୩୭ ଜଣ ପ୍ରାଣ ହରାଇଛନ୍ତି । ଦ୍ରୁତ ଗତି କାରଣରୁ ଏହି ସହର ଦୁଇଟିରେ ୫୨% ସଡ଼କ ଦୁର୍ଘଟଣା ଘଟିଛି  ।

ସଡ଼କ ଦୁର୍ଘଟଣା କ୍ଷେତ୍ରରେ କାମ କରୁଥିବା ଦେଶର ଅଗ୍ରଣୀ ସ୍ବେଚ୍ଛାକୃତ ସଂଗଠନ, ଫୋରମ୍ ଫର ପ୍ରିଭେନସନ ଅଫ ରୋଡ୍ ଆସିଡେଣ୍ଟ୍ ତରଫରୁ ଆମ ରାଜ୍ୟରେ ଗୋଟିଏ ଅଭିଯାନ “ଜୀବନ ପାଇଁ ରାସ୍ତା  – ଲଭ ୩୦” ଆରମ୍ଭ ହୋଇଛି  । ସଂଗଠନର ସମ୍ପାଦିକା ଲିପ୍ସା ମହାପାତ୍ର ଗଣମାଧ୍ୟମ ସହିତ କଥାବାର୍ତ୍ତା କରି କହିଛନ୍ତି ସହରଗୁଡିକରେ ସ୍କୁଲ, କଲେଜ, ଅଫିସ୍, ବଜାର, ଡାକ୍ତରଖାନା, ଆବାସିକ କଲୋନୀ, ପାର୍କ ଅଛି । ଲୋକମାନେ ଅଧିକାଂଶ ସମୟରେ ସହରଗୁଡ଼ିକର ରାସ୍ତା ବ୍ୟବହାର କରୁଛନ୍ତି । ଆମର ଭାଇ ଓ ଭଉଣୀମାନେ ଏହି ରାସ୍ତାରେ ସ୍କୁଲ ଏବଂ କଲେଜ ଯାଉଛନ୍ତି । ସେମାନେ ସର୍ବଦା ବିପଦରେ ଥାଆନ୍ତି । ସେମାନଙ୍କର ସୁରକ୍ଷା ଆମର ଦାୟିତ୍ୱ । ଆମେ ପ୍ରତିଦିନ ସପିଂ ପାଇଁ ବଜାରକୁ ଯାଉଛୁ । ଆମେ ସାଇକେଲ୍, ମୋଟରସାଇକେଲ୍ ବ୍ୟବହାର କରୁଛୁ । ବେଳେବେଳେ ଆମେ ରାସ୍ତାରେ ପଥଚାରୀ ଭାବରେ ପାଦରେ ଚାଲିକି ଯାଉଛୁ । ସେଇଥି ପାଇଁ ସହରକୁ ଆସୁଥିବା ଯାନଗୁଡିକର ଗତି ସୀମା ସ୍ଥିର କରିବାକୁ ପଡିବ । ଏହା ଘଣ୍ଟା ପ୍ରତି ୩୦ କିଲୋମିଟରରୁ ଅଧିକ ହେବା ଆଦୌ ଉଚିତ୍ ନୁହେଁ  ।

ସହରାଞ୍ଚଳ ରାସ୍ତା ନିକଟରେ ଅନେକ ଲୋକ ବାସ କରନ୍ତି, କାମ କରନ୍ତି, ଖେଳନ୍ତି ଏବଂ ବୁଲନ୍ତି ସେଠାରେ ଯାନଗୁଡିକର ୩୦ କିଲୋମିଟର ଘଣ୍ଟା ପ୍ରତି ସର୍ବାଧିକ ବେଗ ହେବା କଥା । ଧୀର ବେଗ ମାଧ୍ୟମରେ ଅଧିକାଂଶ ଗୁରୁତର ଦୁର୍ଘଟଣାକୁ ଏଡାଇ ଦିଆଯାଇପାରେ ଏବଂ ମୃତ୍ୟୁ ଏବଂ ଗୁରୁତର ଆଘାତ ହେବାର ସମ୍ଭାବନା ନାଟକୀୟ ଭାବରେ କମାଇ ଦିଆଯାଇପାରେ । ପଥଚାରୀ ଏବଂ ସାଇକେଲ ଚାଳକଙ୍କ ସୁରକ୍ଷା ପାଇଁ ୩୦ କିଲୋମିଟର ପ୍ରତି ଘଣ୍ଟା ରାସ୍ତା ବିଶେଷ ଗୁରୁତ୍ୱପୂର୍ଣ୍ଣ, କାରଣ ସେମାନେ ଦ୍ରୁତ ଗତିରେ ଚାଲୁଥିବା ଯାନବାହାନ ମଧ୍ୟରେ ଅଧିକ ଅସୁରକ୍ଷିତ, ଏବଂ ବିଶେଷ ଭାବରେ ଶିଶୁ ଏବଂ ଯୁବକମାନଙ୍କ ପାଇଁ ଏହା ଆବଶ୍ୟକ କାରଣ ସେମାନଙ୍କ ମଧ୍ୟରୁ ଅନେକ ସ୍କୁଲ ଏବଂ କଲେଜରେ ପହଞ୍ଚିବା ପାଇଁ ଚାଲିବା କିମ୍ବା ସାଇକେଲ ଚଲାଇବା ଉପରେ ସର୍ବଦା ନିର୍ଭରଶୀଳ  ।

ସଂଗଠନର ଉପଦେଷ୍ଟା ଡାକ୍ତର ଅନଙ୍ଗା ମୋହନ ଦ୍ୱିବେଦୀ କହିଛନ୍ତି ଯାନଗୁଡିକର ଧୀର ଗତି ଆମର ଜନସ୍ୱାସ୍ଥ୍ୟ ପାଇଁ ଜରୁରୀ, ଚାଲିବା ଏବଂ ସାଇକେଲ ଚଲାଇବା ପାଇଁ ନିରାପଦ ଏବଂ ଏହା ଆମ ସୁସ୍ଥ ଜୀବନକୁ ଉତ୍ସାହିତ କରେ । ଏହା ଆମ ଜଳବାୟୁ ପାଇଁ ଶୂନ କାର୍ବନ ନିର୍ଗମନକୁ ପ୍ରୋତ୍ସାହିତ କରିବ, କାରର ନିର୍ଭରଶୀଳତାକୁ ହ୍ରାସ କରିବ, ସହରର ଜନସାଧାରଣ ସୁରକ୍ଷିତ ପରିବହନ ବ୍ୟବସ୍ଥଓ ଏବଂ ସ୍ୱଚ୍ଛ -ପବନ ପାଇବେ । ଘଣ୍ଟା ପ୍ରତି ୩୦ କିଲୋମିଟରେ ଆସୁଥିବା କାର ଦ୍ୱାରା ଧକ୍କା ହୋଇଥିବା ଜଣେ ଲୋକ ବଞ୍ଚିପାରିବ । କିନ୍ତୁ ଘଣ୍ଟା ପ୍ରତି ୮୦ କିଲୋମିଟ ରେ ହିଟ୍ କଲେ, ସେ ବଞ୍ଚିବେ ନାହିଁ ।

ସ୍ୱାସ୍ଥ୍ୟ ପାଇଁ ରାସ୍ତା, ଜଳବାୟୁ ପାଇଁ ରାସ୍ତା, ଲୋକଙ୍କ ସୁରକ୍ଷା ପାଇଁ ରାସ୍ତା ସୃଷ୍ଟି କରିବାକୁ ଆମେ ଏକାଠି କାମ କରିବା କରିବା ଜରୁରୀ ବୋଲି ଡାକ୍ତର ଦ୍ୱିବେଦୀ କହିଛନ୍ତି  ।  ଏହି ବିଷୟ ରେ ସଂଗଠନ ରାଜ୍ୟ ସରକାରଙ୍କ ଆଗରେ ଜନସାଧାରଣଙ୍କ ସ୍ୱାର୍ଥ ଦୃଷ୍ଟିରୁ ଅନେକ ଦାବି କରିଛି।

          ଓଡିଶାର ସମସ୍ତ ସହର ପାଇଁ ଦୁଇ ଚକିଆ ମୋଟର ଯାନ, ହାଲୁକା ମୋଟର ଯାନ, ମଧ୍ୟମ ଏବଂ ଭାରୀ ମୋଟର ଯାନ, ଅଟୋ ରିକ୍ସା ଇତ୍ୟାଦି ସମସ୍ତ ଯାନଗୁଡିକର ଘଣ୍ଟା ପ୍ରତି ୩୦ କିଲୋମିଟର ଗତି ସୀମା ଚୂଡାନ୍ତ କରିବା  ।

          ଓଡିଶାର ସମସ୍ତ ମ୍ୟୁନିସିପାଲିଟି ଏବଂ ସହରାଞ୍ଚଳ ସ୍ଥାନୀୟ ସଂସ୍ଥାଗୁଡ଼ିକ ଗତି ସୀମା ମଧ୍ୟରେ ସମାନତା ବଜାୟ ରଖିବା ଉଚିତ । ବର୍ତ୍ତମାନ, ପ୍ରତ୍ୟେକ ଜିଲ୍ଲାର ଭିନ୍ନ ଗତି ସୀମା ରହିଛି ଏବଂ ଜିଲ୍ଲା କଲେକ୍ଟରମାନେ ସାଧାରଣତ ଏହି ଗତି ସୀମାକୁ ସୂଚିତ କରନ୍ତି  ।

          ମୋଟର ଯାନ ଅଧିନିୟମର ଧାରା ୧୧୬ ରେ ଦିଆଯାଇଥିବା ବ୍ୟବସ୍ଥା ଅନୁଯାୟୀ ଆବଶ୍ୟକ ସ୍ଥଳରେ ଆବଶ୍ୟକ ସଙ୍କେତ (ରୋଡ୍ ସାଇନେଜ୍) ଗୁଡିକ ସ୍ଥାପନ କରିବା । ଏହି ସ୍ପିଡ୍ ସୀମା ରୋଡ୍ ସାଇନେଜ୍ ସ୍ଥାପନ ପାଇଁ ଭାରତର ଜାତୀୟ ରାଜପଥ ପ୍ରାଧିକରଣ, ୱାର୍କସ୍ ଡିପାର୍ଟମେଣ୍ଟ୍, ମ୍ୟୁନିସିପାଲିଟି, ସହରାଞ୍ଚଳ ସ୍ଥାନୀୟ ସଂସ୍ଥା ଗୁଡିକୁ ନିର୍ଦ୍ଦେଶ ଦିଆଯିବା ଉଚିତ  ।

          ଗତି ସୀମା ଉଲ୍ଲଂଘନକାରୀଙ୍କୁ ଚିହ୍ନଟ ଏବଂ ଦଣ୍ଡ ଦେବା ପାଇଁ ସ୍ପିଡ୍ ଡିଟେକସନ ରାଡାର ସହିତ ଇଣ୍ଟରସେପ୍ଟର ଯାନ ସମସ୍ତ ସହରରେ ନିୟୋଜିତ କରିବା ଏବଂ ସେହି ଅପରାଧୀଙ୍କ ଡ୍ରାଇଭିଂ ଲାଇସେନ୍ସ ଆଇନ ଅନୁଯାୟୀ ତିନିମାସ ପାଇଁ ସସପେଣ୍ଡ୍ ରଖାଯାଇପାରେ। ଓଡ଼ିଶା ସମାଚାର