Sunday , September 26 2021
Breaking News
Home / ରାଜନୀତି / ଘରୋଇ ସ୍କୁଲର ଏଜେଂଟ ସାଜିଛନ୍ତି ରାଜ୍ୟ ସରକାର: କଂଗ୍ରେସ

ଘରୋଇ ସ୍କୁଲର ଏଜେଂଟ ସାଜିଛନ୍ତି ରାଜ୍ୟ ସରକାର: କଂଗ୍ରେସ

ଭୁବନେଶ୍ୱର, ୩୦/୦୬/୨୦୧୯ (ଓଡ଼ିଶା ସମାଚାର)-ଓଡିଶାରେ ସରକାରୀ ସ୍କୁଲରେ ପ୍ରାଥମିକ ଏବଂ ଉଚ୍ଚ ପ୍ରାଥମିକ ସ୍ତରରେ ବିପର୍ଯ୍ୟସ୍ତ ଶିକ୍ଷା ବ୍ୟବସ୍ଥାକୁ ନେଇ ସରକାରଙ୍କୁ ସମାଲୋଚନା କରିଛି କଂଗ୍ରେସ । ଘରୋଇ ସ୍କୁଲ ପ୍ରତି ଅହେତୁକ ଅନୁକମ୍ପା ହେତୁ ଆଜି ଓଡିଶାରେ ସରକାରୀ ସ୍କୁଲରେ ଶିକ୍ଷା ବ୍ୟବସ୍ଥା ବିପର୍ଯ୍ୟସ୍ତ ବୋଲି ଏକ ସାମ୍ବାଦିକ ସମ୍ମିଳନୀରେ ମିଡିଆ ସେଲ ଅଧ୍ୟକ୍ଷ ସତ୍ୟ ପ୍ରକାଶ ନାୟକ ଅଭିଯୋଗ କରିଛନ୍ତି । ସେ କହିଛନ୍ତି ଓଡିଶାରେ ପ୍ରାଥମିକ ଓ ଉଚ୍ଚ ପ୍ରାଥମିକ ବିଦ୍ୟାଳୟର ସଂଖ୍ୟା ୬୯,୨୮୭ ହୋଇଥିବା ସ୍ଥଳେ ଏହା ଉପରେ ସାରା ଓଡିଶାର ୮୫ ପ୍ରତିଶତ ବିଦ୍ୟାର୍ଥୀ ପାଠ ପଢିବା ପାଇଁ ନିର୍ଭର କରନ୍ତି । କିନ୍ତୁ ଦୁଃଖ ଏବଂ ପରିତାପର ବିଷୟ ଆଜିର ଦିନରେ ମୋଟ୍ ସରକାରୀ ସ୍କୁଲ ମଧ୍ୟରୁ ୪୦,୫୫୮ଟି ସ୍କୁଲକୁ ବିଜୁଳି ସଂଯୋଗ ହୋଇପାରି ନାହିଁ ଏବଂ ୪୦,୬୨୮ଟି ସ୍କୁଲରେ ଛାତ୍ରଛାତ୍ରୀଙ୍କ ପାଇଁ ଖେଳ ପଡିଆଟିଏ ବି ନାହିଁ । ଏପରିସ୍ଥଳେ ଓଡିଶା ସରକାରଙ୍କର ସ୍କୁଲ ଓ ଗଣଶିକ୍ଷା ବିଭାଗ ସରକାରୀ ସ୍କୁଲରେ ଛାତ୍ରଛାତ୍ରୀଙ୍କ ପାଇଁ ମୌଳିକ ସୁବିଧା ସୁଯୋଗ ଯୋଗାଇ ଦେବାରେ ସଂପୂର୍ଣ୍ଣ ଭାବରେ ବିଫଳ ହୋଇଛନ୍ତି ଯେଉଁଥିପାଇଁ ଆଜି ସରକାରୀ ସ୍କୁଲରେ ପାଠପଢାର ସ୍ତର ବିଗତ ୨୦ ବର୍ଷ ଧରି ଲଗାତର ଭାବରେ ନିମ୍ନଗାମୀ ହୋଇଛି । ସରକାର ସ୍କୁଲଗୁଡିକର ମୌଳିକ ସୁବିଧା ପ୍ରତି ଆଖିବୁଜି ବସିଥିବା ବେଳେ ‘ମାର୍ ମାର୍ ଭଣ୍ଡାରିଆକୁ ମାର୍’ ନ୍ୟାୟରେ ୯୬୬ ଟି ସ୍କୁଲ ବନ୍ଦ କରିବା ପାଇଁ ବସିଛନ୍ତି ଏବଂ ସେଥିପାଇଁ ସ୍କୁଲରେ ଛାତ୍ରଛାତ୍ରୀଙ୍କ କମ୍ ଉପସ୍ଥାନକୁ ଦାୟୀ କରାଯାଉଛି । ସରକାରଙ୍କ ଗଣଶିକ୍ଷା ବିଭାଗ ଜାଣିଶୁଣି ସରକାରୀ ସ୍କୁଲକୁ ଅବହେଳା ଏବଂ ଉପେକ୍ଷା କରିଛନ୍ତି ଯାହାର ପରିଣାମ ସ୍ୱରୂପ ଆଜି ଅଭିଭାବକମାନେ ସେମାନଙ୍କ ପିଲାମାନଙ୍କୁ ସରକାରୀ ସ୍କୁଲ ପରିବର୍ତେ ଘରୋଇ ବିଦ୍ୟାଳୟରେ ପାଠ ପଢାଇବା ପାଇଁ ଛାଡୁଛନ୍ତି । ଯଦି ସରକାରୀ ସ୍କୁଲରେ ଶିକ୍ଷାଦାନର ଗୁଣାତ୍ମକ ମାନରେ ବୃଦ୍ଧି ହୋଇଥାନ୍ତା ତାହେଲେ ଛାତ୍ରଛାତ୍ରୀଙ୍କୁ ସରକାରୀ ସ୍କୁଲରେ ପାଠ ପଢାଇବା ପାଇଁ ଅଭିଭାବକମାନେ କେବେ ପଶ୍ଚାତ୍ପଦ ହେଉନଥାନ୍ତେ । ଏଥିରୁ ଜଣାପଡୁଛି ଯେ ଜାଣିଶୁଣି ସରକାରୀ ସ୍କୁଲକୁ ନିରନ୍ତର ଭାବରେ ଉପେକ୍ଷା କରିବା ପଛରେ ରହିଛି ରାଜ୍ୟ ସରକାରଙ୍କ ଘରୋଇ ସ୍କୁଲ ପ୍ରୀତି । ଓଡିଶା ସରକାର ଘରୋଇ ସ୍କୁଲମାନଙ୍କର ଏଜେଂଟ ସାଜି ରାଜ୍ୟର ସରକାରୀ ସ୍କୁଲ ପ୍ରତି ଚରମ ଅବହେଳା ପ୍ରଦର୍ଶନ କରିଛନ୍ତି ଯାହାର ଫଳ ସ୍ୱରୂପ ଚଳିତ ବର୍ଷର ପରୀକ୍ଷା ଫଳ ଅତ୍ୟନ୍ତ ନୈରାଶ୍ୟଜନକ ହୋଇଛି । ଖୋଦ୍ ବିଭାଗୀୟ ମନ୍ତ୍ରୀ ମହୋଦୟ ଶିକ୍ଷା ପାଇଁ ରାଜ୍ୟର ମୋଟ୍ ଘରୋଇ ଉତ୍ପାଦର ୨୦ ପ୍ରତିଶତ ଖର୍ଚ୍ଚ ହେବା କଥା କହୁଥିବା ବେଳେ ଓଡିଶାର ବିପର୍ଯ୍ୟସ୍ତ ଶିକ୍ଷା ବ୍ୟବସ୍ଥାକୁ ସୁଧାରିବାର ପ୍ରୟାସ ନ କରି କମ୍ ଉପସ୍ଥାନ ଆଳରେ ଶହ ଶହ ସ୍କୁଲ ବିଶେଷ ଭାବରେ ଆଦିବାସୀ ଅଧ୍ୟ୍ୟୁଷିତ ଅଂଚଳରେ ଥିବା ସ୍କୁଲକୁ ବନ୍ଦ କରିବା ପାଇଁ ନିଆଯାଇଥିବା ନିଷ୍ପତିକୁ ନିନ୍ଦା କରିଛି କଂଗ୍ରେସ । ସରକାରୀ ସ୍କୁଲକୁ ବନ୍ଦ କରିବା ପରିବର୍ତେ ସ୍କୁଲରେ ଶିକ୍ଷାର ଗୁଣାତ୍ମକ ମାନ ବୃଦ୍ଧି କରିବା ସହିତ ଆନୁସଙ୍ଗିକ ସୁବିଧା ସୁଯୋଗ ଯଥା ଲାବ୍ରୋଟାରୀ, କମ୍ପ୍ୟୁଟର ଶିକ୍ଷା, ଖେଳ ପଡିଆ ଇତ୍ୟାଦି ପ୍ରତି ଯତ୍ନବାନ ହେଲେ ଅଭିଭାବକମାନେ ସେମାନଙ୍କ ପିଲାମାନଙ୍କ ପାଇଁ ଲକ୍ଷ ଲକ୍ଷ ଟଙ୍କା ଖର୍ଚ୍ଚ କରି ଘରୋଇ ବିଦ୍ୟାଳୟକୁ ପଠାଇବା ପରିବର୍ତେ ସରକାରୀ ସ୍କୁଲରେ ପଢାଇବା ପାଇଁ ନିଶ୍ଚିତ ଭାବରେ ଆଗ୍ରହ ପ୍ରକାଶ କରିବେ । ଏହି ସାମ୍ବାଦିକ ସମ୍ମିଳନୀରେ ପିସିସି ମୁଖପାତ୍ର ପ୍ରଶାନ୍ତ ଶତପଥି, ରଜନୀ କୁମାର ମହାନ୍ତି, ଦିପକ ମହାପାତ୍ର ଉପସ୍ଥିତ ଥିଲେ । ଓଡ଼ିଶା ସମାଚାର

About admin

Check Also

ଭରଷା ଓ ଵିଶ୍ୱାସ ହରାଇଲା କନ୍ଦରପୁର ମିନି ବ୍ୟାଙ୍କ୍, ଟଙ୍କା ଉଠାଣ ପାଇଁ ଜମାକାରୀଙ୍କ ଲମ୍ବା ଲାଇନ୍, ନିରପେକ୍ଷ ତଦନ୍ତ ଦାଵି କଲା ବିଜେପି

କଟକ ସଦର, ୨୩/୦୯/୨୦୨୧(ଓଡ଼ିଶା ସମାଚାର/ ଵିଷ୍ଣୁ ବେହେରା): କଟକ ଜିଲ୍ଲା ତଥା ରାଜ୍ୟରେ ଅଗ୍ରଣୀ ବ୍ୟାଙ୍କ୍ ର ମାନ୍ୟତା ପାଇ …

Leave a Reply

Your email address will not be published. Required fields are marked *