Thursday , October 6 2022
Breaking News
Home / ବିଶେଷ / ନଦୀ ବେସିନରୁ ରାଜ୍ୟମାନଙ୍କ ସମ୍ବିଧାନ ପ୍ରଦତ ଜଳ ଉପଯୋଗ ସ୍ୱାଧୀନତାକୁ ସଂକୁଚିତ କରିବା ନେଇ ବିଧାନସଭାରେ ଦେବୀ ମିଶ୍ରଙ୍କ ଆଶଙ୍କା

ନଦୀ ବେସିନରୁ ରାଜ୍ୟମାନଙ୍କ ସମ୍ବିଧାନ ପ୍ରଦତ ଜଳ ଉପଯୋଗ ସ୍ୱାଧୀନତାକୁ ସଂକୁଚିତ କରିବା ନେଇ ବିଧାନସଭାରେ ଦେବୀ ମିଶ୍ରଙ୍କ ଆଶଙ୍କା

ରାଜ୍ୟ ଜଳ ସଂପଦ ମନ୍ତ୍ରୀ ଏ ସଂପର୍କରେ ରାଜ୍ୟର ଆଭିମୁଖ୍ୟ ବିଧାନସଭାରେ ଜଣାଇବାକୁ ବାଚସ୍ପତିଙ୍କ ନିର୍ଦ୍ଦେଶ

ଭୁବନେଶ୍ୱର, ୨୬/୦୬/୨୦୧୯ (ଓଡ଼ିଶା ସମାଚାର)-ଆଜି ଗୃହର ଶୂନ୍ୟକାଳରେ ପାର୍ଲାଆମେଂଟରେ ପ୍ରସ୍ତାବିତ ନଦୀ ବେସିନ ବିଲ-୨୦୦୮ ଓଡ଼ିଶା ସମେତ ରାଜ୍ୟମାନଙ୍କ ଆନ୍ତଃରାଜ୍ୟ ନଦୀ ଜଳ ଉପଯୋଗ କରିବାକୁ ଥିବା ଅଧିକାରକୁ ସଂକୁଚିତ କରିବ ବୋଲି ବରିଷ୍ଠ ବିଧାୟକ ଶ୍ରୀ ଦେବୀ ପ୍ରସାଦ ମିଶ୍ର ତଥ୍ୟର ଅବତାରଣା କରି ପ୍ରସଂଗ ଉତଥାପିତ କରିଥିଲେ । ବାଚସ୍ପତି ଶ୍ରୀ ସୂର୍ଯ୍ୟ ନାରାୟଣ ପାତ୍ର ଏହି ସମ୍ବେଦନଶୀଳ ପ୍ରସଂଗ ଉପରେ ଏକ ବିବରଣୀ ବିଧାନସଭାରେ ରଖିବାକୁ ଜଳ ସଂପଦ ମନ୍ତ୍ରୀ ଶ୍ରୀ ରଘୁନନ୍ଦନ ଦାସଙ୍କୁ ନିର୍ଦ୍ଦେଶ ଦେଇଥିଲେ ।
ଶ୍ରୀ ମିଶ୍ର ଉପସ୍ଥାପିତ କରିଥିଲେ ଯେ ସମ୍ବିଧାନର ୨୬୨ ଓ ୨୬୩ ଧାରା ଅନୁଯାୟୀ ଆନ୍ତଃରାଜ୍ୟ ନଦୀ ଜଳ ବିବାଦ ଆଇନ-୧୯୫୬ ଓ ଆନ୍ତଃରାଜ୍ୟ ରିଭର ବୋର୍ଡ-୧୯୫୬ ପରେ ୨୦୧୬ରେ ଜାତୀୟ ଭୂତଳ ଜଳ ବିଲ ଓ ଜାତୀୟ ଜଳ ଉପଯୋଗ ଢାଂଚା ବିଲ-୨୦୧୬ କେନ୍ଦ୍ର ଜଳ ସଂପଦ ବିଭାଗ ତରଫରୁ ପ୍ରସ୍ତାବିତ ହୋଇ ରହିଥିବା ବେଳେ ଏବେ ନଦୀ ଅବବାହିକା ପରିଚାଳନା ବିଲ -୨୦୧୮ ଜଳସେଚନ ସଂସଦୀୟ ଷ୍ଟାଣ୍ଡିଂ କମିଟିର ଅନୁମୋଦନ ପରେ ସଂସଦରେ ଆଲୋଚନା ପାଇଁ ରହିଛି । ଏଥିରେ ଥିବା ବିଭିନ୍ନ ପ୍ରାବଧାନରେ ରାଜ୍ୟମାନଙ୍କ ପ୍ରାଧାନ୍ୟ ରହୁନାହିଁ ବରଂ ଏହି ବିଲ ର ଢାଂଚା ପରୋକ୍ଷ ଭାବେ କେନ୍ଦ୍ରକୁ ସୁହାଇବ ବୋଲି ଶ୍ରୀ ମିଶ୍ର ଆଶଙ୍କା ବ୍ୟକ୍ତ କରିଥିଲେ ।
ଶ୍ରୀ ମିଶ୍ର କହିଥିଲେ ଯେ ଏଥିରେ ଆଂଚଳିକ, ସାମାଜିକ, ଅର୍ଥନୈତିକ, ସାଂସ୍କୃତିକ ତଥା ପରିବେଶ ଜନିତ ସ୍ଥିତି ଓ ନଦୀ ଅବବାହିକାରେ ଥିବା ଅଧିବାସୀମାନଙ୍କର ଜୀବନ ଜୀବିକାର ସ୍ଥିତି ଅନୁଶୀଳନ କରିବାର ଉପଯୁକ୍ତ ବ୍ୟବସ୍ଥା ନାହିଁ । ନଦୀ ଅବବାହିକାର ଜୈବ ବିବିଧତା ଓ ପରିବେଶ କୁ ସନ୍ତୁଳିତ କରିବା ସହ ଅନନ୍ୟ ଜୈବ ବିବିଧତା ସ୍ଥଳିଗୁଡିକ ପାଇଁ ସଠିକ ବ୍ୟବସ୍ଥା ନାହିଁ । ନଦୀ ପ୍ରବାହକୁ ବର୍ଷ ତମାମ ଅକ୍ଷୁଣ୍ଣ ରଖିବା ପାଇଁ ଏଥିରେ ବିଚାର ରଖାଯାଇ ନାହିଁ । ପୁଣି ଆନ୍ତଃରାଜ୍ୟ ଦ୍ୱନ୍ଦ୍ୱ ସମାଧାନ ପାଇଁ ଥିବା ଏକବର୍ଷ ସମୟସୀମା ଏବଂ ତାହା ନହେଲେ ପୁଣି ଆନ୍ତଃରାଜ୍ୟ ନଦୀ ଜଳ ବିବାଦ ଆଇନ -୧୯୫୬ ଦ୍ୱାରା ଆଉ ଏକ ବର୍ଷ ସମୟ ନିଆଗଲେ, ରାଜ୍ୟମାନଙ୍କର ନ୍ୟାୟ ପାଇବା ପ୍ରକ୍ରିୟାକୁ ତାହା ବିଳମ୍ବିତ କରିବ । ନଦୀର ଏହି ବେସିନ ବିଲ କୁ ଆନ୍ତଃରାଜ୍ୟ ବେସିନ ପରିଚାଳନା ବିଲ ବୋଲି ନାମିତ ନକରିବା ଏବଂ ଏହାର ବିଭିନ୍ନ ପ୍ରାବଧାନରେ ରାଜ୍ୟମାନଙ୍କର କ୍ଷମତାକୁ ସଂକୁଚିତ କରିବା ଏବଂ ଛୋଟମୋଟ ବ୍ୟବସ୍ଥା କୁ ପ୍ରସ୍ତାବିତ ବେସିନ କର୍ତର୍ୃପକ୍ଷଙ୍କ ମାଧ୍ୟମରେ ନିୟନ୍ତ୍ରିତ କରିବା ନେଇ ଶ୍ରୀ ମିଶ୍ର ଉଦବେଗ ପ୍ରକାଶ କରିଥିଲେ ।
ସଂପ୍ରତି ବ୍ରାହ୍ମଣୀ ଓ ମହାନଦୀର ଉପର ଅବବାହ ରେ ଥିବା ଛତିଶଗଡ଼ ଓ ଝାଡ଼ଖଣ୍ଡର ତଥା ଆନ୍ଧ୍ରପ୍ରଦେଶର ହୀରାମଣ୍ଡଳମ ପ୍ରକଳ୍ପରେ ହେଉଥିବା ବେଆଇନ ନିର୍ମାଣ ଓ ଉଲ୍ଲଂଘନ ସଂପର୍କରେ କେନ୍ଦ୍ରୀୟ ଜଳ ଆୟୋଗ ଓ ଅନ୍ୟାନ୍ୟ କେନ୍ଦ୍ରୀୟ ସଂସ୍ଥାମାନଙ୍କର ଅସମ୍ଭବ ନୀରବ୍ରଦଷ୍ଟା ଭୂମିକାର ତିକ୍ତ ଅନୁଭୂତି ଓଡ଼ିଶା ପାଇଛି । ଏହାପରେ ଉକ୍ତ ପ୍ରସ୍ତାବିତ ନଦୀ ବେସିନ ବିଲକୁ ବିଶେଷଜ୍ଞମାନଙ୍କ ମତ ନେଇ ସଠିକ ଆଲୋଚନା ସହିତ ଓଡ଼ିଶାର ସ୍ୱାର୍ଥ ରକ୍ଷା ପାଇଁ ସଜାଗ ରହିବାର ଆବଶ୍ୟକତା ରହିଛି ବୋଲି ଶ୍ରୀ ମିଶ୍ର ଦାବି କରିଥିଲେ । ରାଜ୍ୟ ଜଳ ସଂପଦ ବିଭାଗ ଏ ସଂପର୍କରେ ବସ୍ତୁ ସ୍ଥିତି ଓ ତଥ୍ୟ ରଖିବା ପାଇଁ ଅନୁରୋଧ କରିବା ପରେ ବାଚସ୍ପତି ଶ୍ରୀ ପାତ୍ର ଜଳ ସଂପଦ ମନ୍ତ୍ରୀଙ୍କୁ ନିର୍ଦ୍ଦେଶ ଦେଇ ଏ ସଂପର୍କରେ ବିଧାନସଭାରେ ବିବରଣୀ ଦେବାକୁ କହିଥିଲେ । ଓଡ଼ିଶା ସମାଚାର

Leave a Reply

Your email address will not be published.