Monday , June 21 2021
Breaking News
Home / ବିଶେଷ / ସେପ୍ଟେମ୍ବର ୧ରୁ ବିଜେପିର ଦେଶବ୍ୟାପୀ ଜନ ସମ୍ପର୍କ ଓ ଜନ ଜାଗରଣ ଯାତ୍ରା ଆରମ୍ଭ – ଧର୍ମେନ୍ଦ୍ର ପ୍ରଧାନ

ସେପ୍ଟେମ୍ବର ୧ରୁ ବିଜେପିର ଦେଶବ୍ୟାପୀ ଜନ ସମ୍ପର୍କ ଓ ଜନ ଜାଗରଣ ଯାତ୍ରା ଆରମ୍ଭ – ଧର୍ମେନ୍ଦ୍ର ପ୍ରଧାନ

ଜାମ୍ମୁ-କାଶ୍ମୀରରୁ ୩୭୦ ଧାରା ଉଚ୍ଛେଦ ପ୍ରସଙ୍ଗରେ ସାମ୍ବାଦିକ ସମ୍ମିଳନୀରେ କେନ୍ଦ୍ରମନ୍ତ୍ରୀଙ୍କ ଘୋଷଣା

ନୂଆଦିଲ୍ଲୀ/ଭୁବନେଶ୍ୱର, ୨୭/୦୮/୨୦୧୯(ଓଡ଼ିଶା ସମାଚାର)-୩୭୦ ଧାରା ଉଚ୍ଛେଦ ବିଷୟରେ ଦେଶର ସମସ୍ତ ଲୋକଙ୍କୁ ଅବଗତ ଓ ସଚେତନତା କରାଯିବା ନେଇ ଆସନ୍ତା ସେପ୍ଟେମ୍ବର ୧ରୁ ସେପ୍ଟେମ୍ବର ୩୦ ପର୍ଯ୍ୟନ୍ତ ଦଳ ପକ୍ଷରୁ ଦେଶବ୍ୟାପୀ ଜନ ସମ୍ପର୍କ ଓ ଜନ ଜାଗରଣ ଯାତ୍ରା ଆରମ୍ଭ କରାଯିବ ବୋଲି ସୋମବାର ନୂଆଦିଲ୍ଲୀ ସ୍ଥିତ ବିଜେପି ମୁଖ୍ୟାଳୟରେ କେନ୍ଦ୍ର ଜଳ ଶକ୍ତି ମନ୍ତ୍ରୀ ଗଜେନ୍ଦ୍ର ସିଂହ ଶେଖାୱାତଙ୍କ ଉପସ୍ଥିତିରେ ଏକ ସାମ୍ବାଦିକ ସମ୍ମିଳନୀ ଜରିଆରେ ସୂଚନା ଦେଇଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ।
କେନ୍ଦ୍ରମନ୍ତ୍ରୀ ଶ୍ରୀ ପ୍ରଧାନ କହିଛନ୍ତି ଯେ ୩୭୦ ଧାରା ସମ୍ପର୍କରେ ସୂଚନା ଏବଂ ଧାରା ଉଚ୍ଛେଦ ପରବର୍ତୀ ପରିବର୍ତନକୁ ଦେଶର ପ୍ରତ୍ୟେକ ଲୋକଙ୍କ ନିକଟରେ ପହଁଚାଇବା ପାଇଁ ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହ, ଦଳର କାର୍ଯ୍ୟକାରୀ ଅଧ୍ୟକ୍ଷ ଜେ.ପି ନଡ୍ଡାଙ୍କ ନେତୃତ୍ୱରେ ଆୟୋଜିତ ଚୂଡାନ୍ତ ବୈଠକରେ ଉପରୋକ୍ତ ନିଷ୍ପତି ନିଆଯାଇଛି ।
୧ ମାସ ବ୍ୟାପୀ ହେବାକୁ ଥିବା ଜନ ସମ୍ପର୍କ ଓ ଜନ ଜାଗରଣ ଯାତ୍ରା ସମୟରେ ଦଳର ଶୀର୍ଷ ନେତୃତ୍ୱ, କେନ୍ଦ୍ରରେ ବରିଷ୍ଠ ମନ୍ତ୍ରୀ, ମୁଖ୍ୟମନ୍ତ୍ରୀ, ଉପ ମୁଖ୍ୟମନ୍ତ୍ରୀ, ରାଜ୍ୟର ବଡ ବଡ ନେତା ଏବଂ ଦଳର ରାଷ୍ଟ୍ରୀୟ ପଦାଧିକାରୀମାନେ ସମାଜର ପ୍ରମୁଖ ଲୋକ ଓ ପ୍ରବୃଦ୍ଧ ଲୋକଙ୍କୁ ବ୍ୟକ୍ତିଗତ ଭାବରେ ଭେଟିବେ । ସେମାନଙ୍କୁ ୩୭୦ ଧାରା ଉଚ୍ଛେଦ ପରେ ଜାମ୍ମୁ-କାଶ୍ମୀରରେ କଣ ଲାଭ ହୋଇଛି ଓ ସେଠାକାରବାସୀଙ୍କ ଜୀବନଶୈଳୀରେ କଣ ପରିବର୍ତନ ହୋଇଛି ଏ ବିଷୟରେ ଅବଗତ କରାଇବେ ।
ଜନଜାଗରଣ ଅଭିଯାନରେ ଦେଶର ସମସ୍ତ ରାଜ୍ୟର ରାଜଧାନୀରେ ୩୫ଟି ବଡ ଜନସଭା ଆୟୋଜନ
କରାଯିବ । ଟାୟର ୧ ଏବଂ ଟାୟର ୨ରେ ୩୭୦ ପ୍ରମୁଖ ସହରରେ ଘର-ଘର ସମ୍ପର୍କ ଏବଂ ଜନସଭା, ର୍ୟାଲି ମାଧ୍ୟମରେ ଦେଶର ପ୍ରତ୍ୟେକ ନାଗରିକଙ୍କୁ ଧାରା ୩୭୦ ଦ୍ୱାରା ଦେଶ ଏବଂ ଜାମ୍ମୁ-କାଶ୍ମୀରକୁ ହେଉଥିବା କ୍ଷତି ଏବଂ ଉକ୍ତ ଧାରା ହଟିବା ପରେ ହେବାକୁ ଥିବା ଲାଭକୁ ଅବଗତ କରାଇବେ । ଜନ ଜାଗରଣ ଅଭିଯାନ ବେଳେ ଜାମ୍ମୁ କାଶ୍ମୀର ଏବଂ ଲଦାଖର ଉଧମପୁର, ଶ୍ରୀନଗର, ଅନନ୍ତନାଗ, ବାରାମୁଳା, ସୋପେର, ଲେହ ଏବଂ କାରଗିଲରେ କାର୍ଯ୍ୟକ୍ରମ ଆୟୋଜନ କରାଯିବ ।
ସ୍ୱାଧୀନତା ପରେ ଦେଶର ଇତିହାସରେ ଅନେକ କମ୍ ସମୟ ଏପରି ଆସିଛି ଯେବେ ସାରା ଦେଶ ସବୁ ଭେଦଭାବକୁ ଭୁଲି ଯାଇ ଏକାଠୀ ହୋଇଛି । ବିଜେପିର ସବୁ ପୀଢିର ନେତା ଏହା ମାନି ଆସିଛନ୍ତି ଯେ ଅନୁଚ୍ଛେଦ ୩୭୦ ଦେଶ ଏକତାର ବିରୋଧରେ ଥିଲା । ୩୭୦ ଧାରା ଉଚ୍ଛେଦ ଐତିହାସିକ ଏବଂ ରାଷ୍ଟ୍ରୀୟ ଏକତା ପାଇଁ ଜରୁରୀ ନିର୍ଣ୍ଣୟ ଥିଲା ବୋଲି ସେ କହିଛନ୍ତି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ଗୃହମନ୍ତ୍ରୀ ଅମିତ ଶାହଙ୍କ ଦୃଢ ରାଜନୈତିକ ଇଚ୍ଛାଶକ୍ତି କାରଣରୁ ଧାରା ୩୭୦ ଉଚ୍ଛେଦ ହୋଇପାରିଛି ଏବଂ ଏତଦଦ୍ୱାରା ଏବେ ଜାମ୍ମୁ-କାଶ୍ମୀର ଏବଂ ଲଦାଖରେ ଭାରତ ସରକାରଙ୍କ ପ୍ରାୟ ସବୁ ଯୋଜନା ଲାଗୁ ହେବ । ଏଠାକାରବାସୀମାନେ ବିକାଶର ସମାନ ଅବସର ପ୍ରାପ୍ତ କରିବେ ବୋଲି ଶ୍ରୀ ପ୍ରଧାନ କହିଛନ୍ତି ।
ଉଲ୍ଲେଖନୀୟ ଯେ , ଜନସମ୍ପର୍କ ଅଭିଯାନର ଆୟୋଜନ କମିଟିର ଗଠନ ସଂଯୋଜକ କେନ୍ଦ୍ରମନ୍ତ୍ରୀ ଶ୍ରୀ ଧର୍ମେନ୍ଦ୍ର ପ୍ରଧାନଙ୍କ ନେତୃତ୍ୱରେ କରାଯାଇଛି । ଏହି କମିଟିରେ ସହ-ସଂଯୋଜକ ଭାବେ ରାଷ୍ଟ୍ରୀୟ ମହାସଚିବ ଶ୍ରୀ ମୂରଲୀଧର ରାଓ, ସଦସ୍ୟ କେନ୍ଦ୍ର ମନ୍ତ୍ରୀ ଡା. ଜିତେନ୍ଦ୍ର ସିଂହ, ମୂରଲୀଧରନ, ପ୍ରାକ୍ତନ କେନ୍ଦ୍ରମନ୍ତ୍ରୀ ଶ୍ରୀ ରାଜବର୍ଦ୍ଧନ ସିଂହ ରାଠୋର ଏବଂ ଶ୍ରୀ ଗୌରବ ଭାଟିଆ ଅଛନ୍ତି । ସେହିପରି ଜନଜାଗରଣ ଅଭିଯାନର କାର୍ଯ୍ୟକୁ ତଦାରଖ ଦାୟିତ୍ୱ ଦଳ ପକ୍ଷରୁ ଶ୍ରୀ ଗଜେନ୍ଦ୍ର ସିଂହଙ୍କୁ ନ୍ୟସ୍ତ କରାଯାଇଛି । ଶ୍ରୀ ସିଂହଙ୍କ ନେତୃତ୍ୱରେ ଗଠିତ ହୋଇଥିବା କମିଟିରେ ଥିବା ଅନ୍ୟ ସଦସ୍ୟମାନେ ହେଲେ ରାଷ୍ଟ୍ରୀୟ ଉପାଧ୍ୟକ୍ଷ ବୈଜୟନ୍ତ ପଣ୍ଡା, କେନ୍ଦ୍ର ମନ୍ତ୍ରୀ ଶ୍ରୀ ପ୍ରହ୍ଲାଦ ଯୋଶୀ, ଦଳର ରାଷ୍ଟ୍ରୀୟ ସଚିବ ଶ୍ରୀ ସତ୍ୟା କୁମାର ଏବଂ ଲେହର ଲୋକପ୍ରିୟ ସାଂସଦ ଶ୍ରୀ ଜାମୟାଙ୍ଗ ସୋରେଙ୍ଗ୍ ନାମମ୍ୟାଲ ଏବଂ ଯୁବ ସାଂସଦ ଶ୍ରୀ ତେଜସ୍ୱୀ ସୂର୍ୟା ଅଛନ୍ତି । ଓଡ଼ିଶା ସମାଚାର

About admin

Check Also

ଅନାଥ ପିଲାମାନଙ୍କ ସର୍ବାଙ୍ଗୀନ ବିକାଶ ପାଇଁ ଆଶୀର୍ବାଦ ଯୋଜନା ଘୋଷଣା କଲେ ମୁଖ୍ୟମନ୍ତ୍ରୀ

ଭୁବନେଶ୍ୱର,୨୦/୦୬/୨୦୨୧(ଓଡ଼ିଶା ସମାଚାର)-  ଅନାଥ ପିଲାମାନଙ୍କ ସର୍ବାଙ୍ଗୀନ ବିକାଶ ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଶୀର୍ବାଦ ଯୋଜନା ଘୋଷଣା କରିଛନ୍ତି । …

Leave a Reply

Your email address will not be published. Required fields are marked *