Monday , June 21 2021
Breaking News
Home / ବିଶେଷ / ଭୁବନେଶ୍ୱରଠାରେ ପ୍ରବାସୀ ଓଡ଼ିଆ ଭବନ ଉଦଘାଟିତ

ଭୁବନେଶ୍ୱରଠାରେ ପ୍ରବାସୀ ଓଡ଼ିଆ ଭବନ ଉଦଘାଟିତ

ଭୁବନେଶ୍ୱର,୨୪/୦୨/୨୦୨୧ (ଓଡ଼ିଶା ସମାଚାର)- ଓଡ଼ିଶା ବାହାରେ ଭାରତବର୍ଷର ବିଭିନ୍ନ ମହାନଗର, ଅନ୍ୟାନ୍ୟ ପ୍ରଦେଶ ଓ ବିଦେଶରେ ବସବାସ କରୁଥିବା ଦେଢ଼କୋଟି ଓଡ଼ିଆ ନିଜର ମାତୃପ୍ରଦେଶର ସର୍ବାଙ୍ଗୀନ ବିକାଶ ପାଇଁ ମହତ୍ୱପୂର୍ଣ୍ଣ ଯୋଗଦାନ ପ୍ରଦାନ କରିପାରିବେ ବୋଲି ବିଶିଷ୍ଟ ବ୍ୟକ୍ତିମାନେ ମତ ପ୍ରକାଶ କରିଛନ୍ତି । ଏଠାକାର ୟୁନିଟ୍ -୨ ଠାରେ ପ୍ରବାସୀ ଓଡ଼ିଆ ଭବନର ଉଦଘାଟନ ଅବସରରେ ଉପସ୍ଥିତ ଅତିଥିମାନେ, ରାଜ୍ୟର ରାଜଧାନୀରେ ବିରାଜମାନ ଏହି ଭବନ, ଓଡ଼ିଶା ସହିତ ପ୍ରବାସୀ ଓଡ଼ିଆମାନଙ୍କର ସାମାଜିକ, ସାଂସ୍କୃତିକ ଓ ଭାଗବତ ସୁସମ୍ପର୍କ ରକ୍ଷା କରାଯିବା ଦିଗରେ ନିର୍ଣ୍ଣାୟକ ଭୂମିକା ଗ୍ରହଣ କରିବ ବୋଲି ଦୃଢ଼ ଆଶା ପୋଷଣ କରିଛନ୍ତି । ପ୍ରବାସୀ ଓଡ଼ିଆ ଭବନର ପରିଚାଳକ ସଂସ୍ଥା ନୂଆଦିଲ୍ଲୀସ୍ଥିତ ଓଡ଼ିଆ ମହାମଂଚ ଦ୍ୱାରା ଆୟୋଜିତ ଏହି ଉଦଘାଟନୀ ଉତ୍ସବରେ ମୁଖ୍ୟ ଅତିଥି ଭାବରେ ଯୋଗଦେଇ ରାଜ୍ୟ ଉଚ୍ଚ ଶିକ୍ଷା ମନ୍ତ୍ରୀ ଡଃ. ଅରୁଣ ସାହୁ, ପ୍ରବାସୀ ଓଡ଼ିଆମାନେ ରାଜ୍ୟର ସାମାଜିକ, ଆର୍ଥିକ ଏବଂ ବୌଦ୍ଧିକ ବିକାଶ ନେଇ ସକ୍ରୀୟ ସହଯୋଗ ଦେବାକୁ ଆହ୍ୱାନ ଜଣାଇଥିଲେ । ପ୍ରବାସରୁ ଆସୁଥିବା ଓଡ଼ିଆ ଭାଇଭଉଣୀମାନଙ୍କର ରହିବା ଓ ସେବା ତଥା ସୁବିଧା ପାଇଁ ଏହି ଭବନ ଏକ ଅସ୍ଥାୟୀ ଅତିଥିଶାଳା ଭାବରେ କାର୍ଯ୍ୟ କରିବ ବୋଲି ଡଃ. ସାହୁ କହିଥିଲେ । ଉତ୍ସବରେ ସମ୍ମାନିତ ଅତିଥି ଭାବରେ ଯୋଗଦେଇ ରାଜ୍ୟ ଗ୍ରାମଉନ୍ନୟନ ଓ ଶ୍ରମ ମନ୍ତ୍ରୀ ସୁଶାନ୍ତ ସିଂହ ଉପସ୍ଥିତ ପ୍ରବାସୀ ଓଡ଼ିଆ ମାନଙ୍କୁ ବଧାଇ ଜଣାଇବା ସାଙ୍ଗକୁ ପ୍ରବାସୀ ଓଡ଼ିଆ ଭବନର ଉତରୋତର ଉନ୍ନତି କାମନା କରିଥିଲେ । ସମାରୋହରେ ସାମିଲ ହୋଇ ବିଶ୍ୱ ଓଡ଼ିଶା ସମାଜର ଅଧ୍ୟକ୍ଷ କିଶୋର ଦ୍ୱିବେଦୀ, ସମଗ୍ର ପୃଥିବୀର ଓଡ଼ିଆମାନେ ଏକଜୁଟ ଓ ମଜବୁତ ଭାବେ ଛିଡ଼ା ହୋଇ ନିଜର ମାତୃ ରାଜ୍ୟର ମଙ୍ଗଳ ପାଇଁ ତନ, ମନ, ଧନ ପ୍ରଦାନ କରିବା ପାଇଁ ନିବେଦନ କରିଥିଲେ ।
ଉପସ୍ଥିତ ମାନ୍ୟଗଣ୍ୟ ବ୍ୟକ୍ତିମାନଙ୍କ ମଧ୍ୟରେ ବିଧାୟକ ଅନନ୍ତନାରାୟଣ ଜେନା, ବିଜୁ ଯୁବ ଜନତା ଦଳର ସଭାପତି ଡଃ. ବ୍ୟମକେଶ ରାୟ, ବରୀ ବିଧାୟିକା ସୁନନ୍ଦା ଦାସ, ପୂର୍ବତନ ସାଂସଦ ପ୍ରସନ୍ନ ପାଟଶାଣୀ, ବରିଷ୍ଠ ପ୍ରଶାସକ କୁଳମଣି ବିଶ୍ୱାଳ, ଚୌଧୁରୀ ରମାକାନ୍ତ ଦାସ, ବିଶିଷ୍ଟ ସଂଗୀତଜ୍ଞ ମୋହିତ ଚକ୍ରବର୍ତୀ ଏବଂ ସମାଜସେବୀ ଶୁଭଶ୍ରୀ ଦାସ ପ୍ରମୁଖ ଅନ୍ତର୍ଭୁକ୍ତ ଥିଲେ ।
ପ୍ରବାସୀ ଓଡ଼ିଆ ନେତୃବୃନ୍ଦଙ୍କ ମଧ୍ୟରେ ଏହି ସମାବେଶରେ ବେଙ୍ଗାଲୁରୁରୁ ନିହାର ସାମନ୍ତରା, ମୁମ୍ବଇରୁ ହିତେଶ ମିଶ୍ର, ଦିଲ୍ଲୀରୁ ବିଭୁପ୍ରସାଦ ସାହୁ, ଅବନୀ ସାହୁ, କାବେରୀ ବେହେରା, ସୁଶ୍ରୀ ସଙ୍ଗୀତା, ଇତିଶ୍ରୀ ପ୍ରହରାଜ ଓ ମାନେସରରୁ ଉମାଶଙ୍କର ପଣ୍ଡା ପ୍ରମୁଖ ଯୋଗଦେଇଥିଲେ । ସମଗ୍ର କାର୍ଯ୍ୟକ୍ରମର ସୁଚାରୁ ରୂପେ ଆୟୋଜନ ଓ ସୁସମ୍ପାଦନା କରିବାରେ ଓଡ଼ିଆ ମହାମଞ୍ଚର ଦୁଇ ନିର୍ଦ୍ଧେଶକ ଗୋବର୍ଦ୍ଧନ ଧଳ ଏବଂ ମନୋଜ ନାୟକ ତଥା ଭାଷା ଆନ୍ଦୋଳନର ଆବାହକ ପବିତ୍ର ମହାରଥା ମୁଖ୍ୟ ଭୁମିକା ଗ୍ରହଣ କରିଥିଲେ । ଉତ୍ସବ ପରିଚାଳନାରେ ମହାମଂଚର ବରିଷ୍ଠ ସଦସ୍ୟ ରାକେଶ ବିଶ୍ୱାଳ, ତନ୍ମୟ ସ୍ୱାଇଁ ଓ ଅରୁଣ ସାହୁ ପ୍ରମୁଖ ସହଯୋଗ କରିଥିଲେ । ଓଡ଼ିଶା ସମାଚାର

About admin

Check Also

କରୋନା କାହାଣୀ : ସ୍ୱାମୀର ମୃତ୍ୟୁ ଖବର ପାଇ ସ୍ତ୍ରୀର ଆତ୍ମହତ୍ୟା ଉଦ୍ୟମ , ଗ୍ରାମବାସୀଙ୍କ ଦ୍ୱାରା ଉଦ୍ଧାର

ଗରଦପୁର,୨୦/୬/୨୦୨୧(ଓଡ଼ିଶା ସମାଚାର)- ଗରଦପୁର ବ୍ଲକ୍ ଅନ୍ତର୍ଗତ ତେଣ୍ଡାକୁଡ଼ା ପଂଚାୟତରେ ଗତ ଦୁଇ ଦିନ ମଧ୍ୟରେ ଦୁଇଟି କରୋନା ମୃତ୍ୟୁ ଘଟିଛି …

Leave a Reply

Your email address will not be published. Required fields are marked *